Bildim Wan Fanis Wol long saed blong Spirit mo blong Proteksen
Taem yumi laef folem gospel blong Jisas Kraes, taem yumi dipen long Atonmen blong Sevya mo gohed fored wetem fet, be i no fraet, yumi kam strong agensem ol trik mo ol rop blong trap blong enemi.
Ol dia brata mo sista blong mi, olsem konfrens i stap kam blong en, mi givim tangkyu long Papa blong yumi long Heven from ol kaonsel, trutok, mo revelesen we oli bin serem long pulpit ia truaot long tufala dei we i bin pas. Yumi bin kasem tijing long ol wokman we God i singaotem olgeta blong talemaot tabu tok blong Hem long yumi. Lod i rimaenem yumi long ol revelesen blong ol lata-dei ia, “nomata oli kamaot tru long voes blong miwan o … tru long voes blong ol wokman blong mi, i semmak. ”
Taem mi lukluk long bigfala kongregesen blong Ol Sent, mo long maen blong mi, mi luk ol memba oli stap wajem Jeneral Konfrens raon long wol, mi tingbaot kam tugeta, long Buk blong Momon, taem Jisas Kraes i kamaot long Ol Man blong Nifae afta we oli hangem Hem long kros. Hem i tijim olgeta gospel mo leftemap tingting blong olgeta,“Taswe, yufala i gobak long haos blong yufala, mo tingting hevi long ol samting we mi bin talem, mo askem long Papa, long nem blong mi, blong yufala i save andastanem.”
“Gobak long haos blong yufala, mo tingting hevi”hem i nekis step blong tekem i kam long hat ol toktok blong ol profet mo ol lida blong Jos we oli bin talem long tabu taem ia. Ol hom we Kraes i senta long hem oli ol fanis wol blong kingdom blong God long wol long wan dei we taem, olsem ol profet ol tokbaot, “bae devel hem i toktok nogud long ol hat blong ol pikinini blong ol man, mo mekem olgeta blong kam kros agensem samting we i gud.”
Ol pipol ol bin bildim ol fanis wol truaot long histri blong kipim olgeta oli sef from ol enemi aotsaed. Plante taem ol fanis wol oli tekem tu wan taoa we wan wajman—olsem ol profet—oli givim woning long saed blong nogud paoa mo ol atak we oli stap kam.
Long eli taem blong ol paeonia blong Yuta, bubuman blong mi Thomas Rasban mo famli blong hem oli sam long ol fas man we Presiden Brigham Yang i sendem blong go stap long Hiba Vale, long ol naes Wasaj Maonten blong Yuta.
Long 1859, Thomas i bin help blong bildim Heber fort, we oli bildim blong protektem olgeta. I bin wan simpol fanis blong ol log blong koten wud we oli putum wan i saetem narawan we i putum limit blong ol sef haos. Oli bildim ol log haos insaed long fanis wol semmak olsem fanis wol. Fanis ia i givim tugeta proteksen mo sefti long olgeta paeonia famli taem oli stap mekem ol hom blong olgeta mo wosipim Lod.
I semmak tu long yumi. Ol haos blong yumi oli fanis wol agensem ol ivel blong wol. Long ol hom blong yumi yumi kam long Kraes taem yumi lanem blong folem ol komanmen blong Hem, tru long stadi long ol skripja mo prea tugeta, mo taem yumi helpem wanwan long yumi blong stap long rod blong kavenan. Niu wei we oli tokbaot, blong wanwan man, woman mo famli i stadi long hom tru long Kurikulom Kam, Folem Mi, oli raetem “blong mekem dip jenis long laef mo helpem yumi kam moa olsem Jisas Kraes” Taem yumi mekem olsem, bae yumi kam olsem wanem Pol i singaotem “[ol niu man].” wetem hat blong mo wol blong yumi i stap wan wetem God. Yumi nidim kaen paoa ia blong fesem mo blokem ol atak blong enemi.
Taem yumi laef wetem fasin blong givim yumi, we yumi bon long Jisas Kraes, bae yumi filim we Tabu Spirit i stap wetem pis, i lidim yumi long trutok, i givim insperesen blong yumi laef klin inaf blong kasem ol blesing blong Lod, mo stap olsem wan witnes se God i stap laef mo stap lavem yumi. Evri samting i hapen insaed long fanis wol blong ol hom blong yumi. Be tingbaot, ol hom blong yumi oli gat paoa semmak nomo olsem paoa blong wanwan long yumi insaed long ol fanis wol blong hom blong yumi.
Presiden Nelson i bin tijim: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.” Olsem ol profet, sia, mo reveleta blong Lod long dei ia, wajman ia antap long taoa blong fanis wol blong yumi, Jos blong Jisas Kraes blong Ol Lata-dei Sent, Hem i luk finis ol fas muv blong enemi.
Ol brata mo sista. Yumi stap long wo wetem Setan from ol sol blong ol man. Laen blong faet ia, oli bin raetem finis long laef blong yumi bifo laef long wol ia. Setan mo wan aot long tri grup blong ol pikinini blong Papa long Heven oli bin tanem olgeta i gowe long ol promes blong kasem laef we i no save finis. Stat long taem ia, ol wokman blong enemi oli stap faet wetem ol fetful man we oli jusum blong folem plan blong Papa.
Setan i save se God i stap kaontem ol dei blong hem, mo taem blong hem i kam sot. Hamas we hem i smat mo save trikim man, bae hem i no save win. Be, faet blong winim wanwan long ol sol blong yumi i gohed strong.
Blong proteksen blong yumi, yumi mas bildim wan fanis wol blong spirit mo proteksen blong sol blong yumiwan, wan fanis wol we bae i devel i no save gotru long hem.
Setan i wan waes snek, i kam sloslo insaed long maen mo hat blong yumi taem yumi putum ol han blong yumi daon, taem yumi fesem wan harem nogud o lusum hop. Hem i trikim yumi wetem ol swit toktok, promes blong isi laef, kamfot o i mekem yu filim hae blong sot taem taem yu stap daon nomo. Hem i talem se hae tingting, fasin blong no stap kaen, no stap ones, no stap glad, mo rabis fasin i oraet mo wetem “taem yumi nomo save harem wan samting long hat blong yumi.” Spirit i save lego yumi. “Mo olsem ia nao devel i giaman long ol sol blong olgeta, mo i lidim olgeta i gowe sloslo daon long hel.”
Long narasaed, samtaem yumi filim Spirit i strong tumas taem yumi singim ol pres i go long God wetem ol toktok olsem ia:
Taem yumi bildim fanis wol long saed blong paoa blong spirit, bae yumi save kamaot long ol temtesen blong enemi, tanem baksaed blong yumi long hem, mo filim pis blong Spirit. Yumi save folem eksampol blong Lod mo Sevya blong yumi, Hem we taem hem i kasem temtesen long waelples, i talem, “Go biaen long mi Setan. ” Yumi wanwan i mas lanem wetem eksperiens blong laef hao blong mekem hemia.
Stret mo gud stamba tingting ia oli tokbaot gud insaed long Buk blong Momon taem Kapten Moronae i stap rere long Ol Man blong Nifae blong fesem ol atak we i kam long wan man we i giaman, i tosta long blad, mo hanggri from paoa, we i Amalekaea. Moronae i bin bildim fanis wol blong protektem Ol Man blong Nifae “blong mekem se oli save laef blong leftemap nem blong Lod, God blong olgeta mo blong oli save holem taet wanem we ol enemi blong olgeta i bin singaotem stamba tingting blong ol Kristin man.” Moronae hem i wan man we i “stanap strong long Kraes,” mo ol pipol blong hem, oli bin fetful “blong obei ol komanmen blong God… mo stanap agensem nogud fasin.”
Taem Ol Man blong Leman oli kam blong faet, oli bin sapraes long priperesen blong Ol Man blong Nifae mo oli bin lus. Ol Man blong Nifae oli talem tangkyu “long Lod, God blong olgeta, from paoa blong Hem we i bigwan tumas blong mekem olgeta i kam fri long ol enemi blong olgeta.” Oli bin bildim ol fanis wol long aotsaed, mo oli bin bildim fet long Lod Jisas Kraes long insaed—dip insaed long sol blong olgeta.
?Wanem sam long ol wei we yumi save mekem yumiwan i strong long ol taem blong trabol mekem se yumi save kam ol “tul long han blong God blong karem i kam bigfala wok ia”? Yumi lukluk long ol skripja.
Yumi stap obei. Lod i bin givim oda long Papa Lihae blong sendem ol boe blong hem i gobak long Jerusalem mo “lukaotem ol buk ia, mo karem olgeta i kamdaon long waelples” Lihae i no bin askem kwestin; hem i no bin wantem save from wanem mo olsem wanem. Mo Nifae tu we i bin ansa. “Bae mi go mo mekem ol samting we Lod i askem mi blong mekem.”
?Yumi stap tekem aksen wetem semmak fasin blong obei blong Nifae? ?O ating bae yumi wantem blong kwestinim ol komanmen blong God olsem ol brata blong Nifae we from oli no gat fet, i lidim olgeta blong tanem olgeta i gowe long Lod? Fasin blong obei, taem oli praktisim wetem “wan hat we i tabu evriwan,” i wanem we Lod i askem long yumi.
Yumi trastem Lod , Hem we i talem long Josua taem hem i rere blong lidim ol man blong Isrel i go long promes graon. “Tingting blong yu i mas strong, mo yu mas stanap strong oltaem. Yu yu no mas fraet, mo tingting blong yu i no mas foldaon from we mi bambae mi stap wetem yu long weples bae yu yu go long hem.” Josua i trastem ol toktok ia mo talem long ol pipol “Yufala i mas mekem yufala i klin long fes blong Hae God fastaem from we tumoro, hem bambae i mekem ol merikel long medel blong yumi.” Lod i serem ol wota blong Jodan, mo wokbaot blong ol man Isrel long waelples, i en afta 40 yia.
Yumi stanap from trutok olsem profet Abinadae i bin mekem long Buk blong Momon. Oli bin arestem hem, karem i go fored long King Noa mo ol rabis pris blong hem, Abinadae i bin tijim ol ten komanmen mo bin tijim wetem paoa we bae Kraes i “kamdaon long medel blong ol pikinini blong ol man, mo… karem bak ol pipol blong hem.” Afta, wetem fet we i dip insaed long hem, hem i talem, “O God, tekem sol blong mi.” mo Abinadae i bin safa, long ol soa blong ded tru long faea.”
Yumi mekem mo riniu ol tabu kavenan taem yumi tekem pat long sakramen mo yumi wosip insaed long tempol. Sakramen i stamba pat long wosip blong yumi long Sandei wosip, taem yumi stap kasem promes blong “oltaem gat Spirit blong hem i stap wetem [yumi].” Wetem tabu odinens ia yumi komitim yumi blong tekem long yumi nem blong Jisas Kraes, blong folem Hem, mo blong karem responsabiliti blong yumi long tabu wok ia olsem Hem i mekem. Insaed long tempol yumi save “putum long saed ol samting blong wol ia” mo filim we Lod i stap mo bigfala pis blong Hem. Yumi save lukluk nomo long ol bubu blong yumi, ol famli blong yumi, mo laef we i no save finis long ples we Papa i stap long hem. From hemia nao, Presiden Nelson i bin talem i no longtaem i pas long Rom “Gudfala samting we bae i kamaot long tempol ia, man i no save kaontem.”
Yumi mas gat fasin blong stap tru long evri samting yumi mekem. Yumi mas developem fasin blong luksave samting mo gat disiplin blong mekem se bae yumi no nid blong faenemaot oltaem wanem i raet mo wanem i rong. Yumi mas tekem long hat blong yumi, woning blong Pita, Aposol blong fas Jos we i talem: “Yufala i mas lukaot gud. Yufala i mas rere, from we enemi ya blong yufala Setan, i olsem wan laeon we i stap singaot bigwan, i stap lukaot man blong i kakae.”
Taem yumi gohed strong blong mekem yumi kam strong moa, yumi kam olsem Jisas Kraes, olsem ol tru disaepol blong Hem, wetem ol sol blong yumi long proteksen blong Hem.
Testemoni blong yu abaot Jisas Kraes i fanis wol blong yuwan, sekiuriti blong sol blong yuwan. Taem we bubuman blong mi wetem ol brata paeonia blong hem oli bin bildim Heber fort, oli bin putum wan log long wan taem, kasem we fanis wol ia i “kam joen gud tugeta” mo oli bin kasem proteksen. I semmak tu long testemoni. Wan afta long narawan yumi kasem wan witnes we i kam long Tabu Spirit taem Hem i toktok long spirit blong yumi, i tijim trutok long ol insaed pat blong yumi.” Taem yumi laef folem gospel blong Jisas Kraes, taem yumi dipen long Atonmen blong Sevya mo gohed fored wetem fet, be i no fraet, yumi kam strong agensem ol trik mo ol rop blong trap blong enemi. Ol testemoni blong yumi i joenem yumi i go long ol heven, mo yumi kasem blesing wetem “trutok long evri samting.” Mo, semmak olsem wan fanis wol i bin protektem ol paeonia, yumi tu, yumi stap sef insaed long ol han blong lav blong Sevya we i raonem yumi.
Profet Ita i tijim, “Eni man we i biliv long God i save gat tru hop blong kasem wan wol we i moa gud, yes, mo tu kasem wan ples long raet han blong God, we hop ia i kam tru long fet, i mekem wan angka long ol sol blong ol man, we bae i mekem olgeta i strong mo oli no muvmuv, oltaem oli mekem ol gudfala wok, mo i lidim olgeta blong leftemap nem blong God.”
Ol dia brata mo sista. Mi lego wetem yufala blesing blong mi blong go fored wetem tras long Lod mo long gospel blong Hem. Putum ol han blong yu raon long olgeta we oli lusum rod, mo wetem paoa blong Spirit insaed long yu, lidim olgeta wetem lav blong oli kambak insaed long fanis wol long saed blong spirit mo proteksen. Lukaot “blong kam olsem Jisas” long evri samting we yu mekem, kamaot long ivel mo temtesen, stap ones long hat, stap wokbaot stret mo klin gud, soem lav mo jareti, mo lavem Lod, God blong yu wetem strong tingting blong wan tru disaepol.
Ol testemoni blong yumi abaot gospel blong Jisas Kraes, ol hom blong yumi, ol famli blong yumi, mo membasip blong yumi insaed long Jos blong Jisas Kraes blong Lata–dei Sent, bae oli save stap olsem ol wanwan fanis wol blong yumi blong proteksen, we i raonem yumi mo protektem yumi long paoa blong ivel. Long hemia, mi serem tabu witnes blong mi, long nem blong Lod mo Sevya blong yumi, iven Jisas Kraes, amen.