!Luk !Ami blong Hae King!
Bambae i wan glad, blong evri man we i kasem Melkesedek Prishud, blong gat blesing blong save tij, lanem samting mo givim seves saedsaed tugeta.
Ol brata blong prishud we mi lavem. Hem i wetem tingting we i stap daon we mi stanap long fes blong yufala long histri taem ia, wetem wok we dia profet mo Presiden Russel M. Nelson i bin givim long mi. Mi lavem tumas mo mi sastenem gudfala man ia blong God mo niufala Fas Presidensi.Mi ademap witnes blong mi long hemia blong Elda D. Todd Christofferson mo ol nara Brata blong mi long Kworom blong Olgeta Twelef Aposol, se ol jenis ia we oli anaonsem tedei long naet, oli tingting blong Lod.
Olsem we Presiden Nelson i talem, hemia i wan samting we mifala i bin prea from mo tokbaot mo tinghevi long hem, hemia mifala ol senia Brata blong Jos, mo blong wan longfala taem. Mifala i wantem save tingting blong Lod mo mekem ol kworom blong Melkesedek Prishud oli kam strong moa. Insperesen i kam, mo tedei long naet, profet i talemaot tingting blong Lod. “[I tru we Lod God bambae i no mekem wan nara samting moa be !bae i talemaot sikret blong hem long ol wokman blong hem, ol profet!]” !Yumi gat bigfala blesing blong gat wan profet we i stap laef tedei!
Truaot long laef blong mitufala, Sista Rasband mo mi, i bin travel raon long wo l from ol wok blong Jos mo wok blong mi. Mi luk eni kaen yunit insaed long Jos: !wan smol branj long Rasia we namba blong olgeta we oli holem Melkesedek Prishud, oli kaontem long han nomo; wan niu wod we i stap gro long Afrika, we ol hae pris mo elda oli mit olsem wan bodi nomo from namba blong ol man we oli kasem Melkesedek Prishud i no bigwan tumas; mo sam wod we oli stanap gud finis, !we namba blong ol elda i bigwan tumas nao oli mas serem kworom i go long 2 kworom!
Evri ples we mitufala i go long hem, mitufala i witnesem han blong Lod we i stap go fastaem long ol wokman blong Hem, i stap mekem ol pipol oli rere, mo i go fored blong mekem se evri pikinini blong Hem oli save kasem blesing folem evri nid we oli gat. ?Hem i no bin promes se: “bambae [hem i] go long fored blong [yumi]. Bambae [hem i] stap long raet han blong [yumi], mo long lef blong [yumi], mo Spirit blong [hem] bambae i stap insaed long hat blong [yumi], mo ol enjel blong [hem] oli stap raonem [yumi], blong sapotem [yumi]?”
Taem mi tingting long yufala evriwan, mi tingbaot hym ia “!Luk, Ami blong Hae King!
Elda Christofferson i bin ansarem plante kwestin we bae i kam antap afta long anaonsmen ia se ol grup blong ol hae pris mo kworom blong ol elda, long level blong wod, oli kombaen long wan yunaet ami blong ol brata blong Melkesedek Prishud.
Ol jenis ia, bambae i helpem ol kworom blong ol elda mo ol Rilif Sosaeti blong oli joenem wok blong olgeta. Hemia tu, bambae i mekem wok blong oganaesem wok blong kworom wetem bisoprik mo wod kaonsel i go simpol. Mo i letem bisop i givimaot moa responsabiliti long presiden blong kworom blong ol elda mo presiden blong Rilif Sosaeti, blong mekem se bisop mo ol kaonsela blong hem, oli save lukluk nomo long ol fas diuti blong olgeta—speseli blong prisaed ova long ol yang woman, mo ol yang man we oli kasem Aronik Prishud.
Ol jenis long ol oganaesesen mo ol wok blong Jos oli no niu. Long 1883, Lod i bin talem long Presiden John Taylor: “[Long saed] blong manejem mo oganaesem Jos blong mi mo Prishud, mi talemaot long yu, se wanwan taem, tru long ol rod we mi putum finis, bae mi soemaot evri samting we i nid blong fiuja divelopmen blong Jos mo blong mekem Jos i kam stret moa, blong stretem mo blong mekem kingdom blong mi i save gohed.”
Nao. Smol toktok i go long yufala, ol brata we yufala i ol hae pris—!Yufala i mas save se mifala i lavem yufala! !Papa blong yumi long Heven i lavem yufala! Yufala i wan nambawan pat blong ami blong prishud blong Hae King, mo mifala i no save muvum wok ia i go sapos i no from gud fasin blong yufala, seves, eksperiens mo stret mo gud fasin blong yufala. Alma i tijim se God i singaotem ol man oli kam hae pris from bigfala fet mo gud wok blong olgeta blong stap tijim mo givhan long ol narawan. Eksperiens ia, oli nidim naoia i bitim bifo.
Long plante wod, yumi gat ol hae pris we, naoia, bambae oli gat janis blong prisaed ova long wan elda olsem kworom presiden. Yumi bin gat bifo, ol elda we oli bin prisaed ova long ol hae pris: ol elda oli stap olsem ol branj presiden long sam pat blong wol we i gat ol hae pris oli stap long branj, mo i gat ol branj we oli gat wan kworom blong ol elda nomo i oganaes i stap mo i gat ol hae pris i stap.
Hem i wan glad wan glad blong evri man we i kasem Melkesedek Prishud blong gat blesing blong save tij, lanem samting mo givim seves saedsaed tugeta wetem evri memba blong wod blong olgeta. Long weaples yu stap long hem, mo nomata wanem situesen blong yu, mifala i stap invaetem yu blong yu prea, stap fetful mo gat glad blong akseptem niufala janis blong lidim man, o blong oli lidim yu, mo blong yu givim seves long yuniti, olsem wan bodi blong ol brata blong prishud.
Naoia, bambae mi tokbaot sam moa samting, we i nid blong kliarem taem yumi stap muv i go blong stat praktisim tingting blong Lod long saed blong oganaesesen blong ol kworom blong Hem blong tabu prishud.
?Wanem nao i nid blong stretem long stek kworom blong ol hae pris? Ol stek kworom blong ol hae pris bambae oli gohed blong wok. Ol stek presidensi bambae oli gohed blong stap olsem presidensi blong stek kworom blong ol hae pris. Be, olsem we Elda Christofferson i bin talem finis, ol memba blong stek kworom blong ol hae pris, Insaed long hem, i gat nomo ol hae pris we oli stap naoia long stek presidensi, olgeta we oli memba blong wod bisoprik, olgeta we oli memba blong stek hae kaonsel, mo petriak we i stap wok. Ol klak blong wod mo stek, mo ol eksekutiv sekretari, oli no memba blong stek kworom blong ol hae pris. Taem wan i stap wok olsem wan hae pris, petriak, Seventi o Aposol, mo i stap visitim wan wod mo i wantem go long prishud miting, bambae hem i go wetem kworom blong ol elda.
Taem oli stap rilisim ol brata we oli stap long ol koling ia, bambae oli gobak long hom yunit blong olgeta olsem ol memba blong kworom blong ol elda.
?Wanem nao i rol blong stek kworom blong ol hae pris? Stek presidensi i mit wetem ol memba blong kworom blong hae pris blong kaonsel tugeta, blong testifae mo blong givim trening. Ol stek miting olsem we oli putum i stap long ol hanbuk blong yumi, bambae oli gohed, be oli jenisim tu samting:
Wan, ol wod mo ol stek bambae oli nomo gat prishud eksekutiv komiti miting. Sapos i gat wan spesel samting i kamaot long wan wod, olsem ol famli mata we i no blong tokbaot, o i gat wan spesel jalenj blong welfea, bambae oli save tokbaot long wan bisoprik miting we oli invaetem moa pipol long hem. Ol nara samting we oli no praevet tumas, oli save tokbaot long wod kaonsel. Wanem we oli bin save long hem olsem stek prishud eksekutiv komiti miting, naoia bae oli singaotem “hae kaonsel miting.”
Sekenwan, yia miting blong evri hae pris we oli odenem olgeta insaed long stek, bambae i nomo tekples. Be, stek presidensi bambae i gohed blong holem yia miting blong stek kworom blong ol hae pris olsem we oli bin anaonsem tedei.
?Yumi save gat moa long wan kworom blong ol elda? Ansa hem i, yes. Folem tingting we i stap long Doktrin mo Ol Kavenan Seksen 107, ves 89, taem wan wod i gat wan bigfala namba blong ol aktiv man we oli kasem Melkesedek Prishud, ol lida oli save oganaesem moa long wan kworom blong ol elda. Long ol kes olsem, wanwan kworom bae i mas balens, i mas gat ikwol namba blong ol man folem yia, eksperiens mo prishud ofis mo paoa.
Mi testifae se taem yumi stap muv fored wetem kworom ia we i kam tru long insperesen, mo stretem ol wod mo stek blong yumi, bambae yumi luk wan bigfala namba blong ol blesing. Bae mi givim samfala eksampol.
Anda long daereksen blong bisop, i gat moa prishud risos we oli save help wetem wok blong fasin blong sevem man. Hemia i tekem wok blong pulum Isrel i kam tugeta tru long tempol mo famli histri wok, mo stap wok wetem ol famli, ol man mo ol woman we oli gat nid, mo stap helpem ol misinari blong tekem ol sol oli kam long Jisas Kraes.
Taem ol fas prisaeding lida oli kambak blong serem eksperiens blong olgeta wetem kworom blong ol elda, bambae yumi gat wan kworom membasip we i kam strong moa.
Bambae i gat plante defren presen mo man we i save mekem wok insaed long kworom.
Bambae i moa isi mo man i stap blong lukluk long ol ejen nid insaed long wod mo kworom, mo blong mekem ol wok blong givhan.
Bambae wok blong stap tijim man mo yuniti bae i kam antap taem wan niu elda mo wan hae pris wetem eksperiens, tufala i serem ol eksperiens, mo wok saedsaed insaed long ol miting blong kworom, mo wok we oli givimaot insaed long ol kworom.
Ol bisop mo ol branj presiden bae oli kam fri, mo bae oli save wok strong moa long ol koling blong olgeta blong stap lukaot long ol sipsip mo blong givhan long olgeta we oli stap long nid.
Mifala i andastanem se wanwan wod mo stek i defren. Mifala i andastanem ol samting we oli defren, mo mifala i hop se bambae yufala i folem ol jenis ia kwiktaem stret afta long jeneral konfrens ia. !Yumi kasem daereksen we i kam long wan profet blong God! Hemia wan bigfala blesing mo responsabiliti.!Bambae yumi mekem long evri stret mo gud fasin mo wetem strong tingting!
Mi rimaenem yufala se: atoriti blong prishud i kam folem rod blong setem apat mo odenem man, be ril prishud paoa, paoa ia blong tekem aksen long nem blong Lod Jisas Kraes, i kam nomo tru long fasin blong laef long wan stret mo gud laef.
Lod i talemaot long Profet Josef Smit, profet blong Restoresen:
“Luk mo luk gud, bambae mi lukaotem ol grup blong pipol blong yufala, mo bae mi mekem rere ol elda mo sendem olgeta i go long ol pipol ia.
“Luk, bambae mi mekem wok blong mi i muv hariap moa long stret taem.”
I tru. Hemia i wan taem we Lod i stap muvum wok blong Hem i go hariap.
Bambae yumi yusum janis ia blong tingtingbak mo kam antap long laef blong yumi, blong yumi stretem yumi i laen stret wetem tingting blong Hem, blong mekem se yumi gat raet long ol plante blesing we Hem i bin promesem long olgeta we oli tru mo oli stap fetful.
Ol brata. Tangkyu from evri samting we yufala i stap mekem blong yufala i pat blong bigfala wok ia. Bambae yumi go fored long bigfala wok ia we i gat ona.
O, taem wo bae i finis,
Taem hadtaem mo raorao i stop,
Taem evri samting i sef i stap
Insaed long vale blong pis,
Long fes blong King we i no save finis,
Bigfala mo strong pipol ia
Bambae oli presem nem blong hem blong oltaem,
Mo hemia nao singsing blong olgeta:
Tedei, yumi evriwan i stanap olsem ol witnes blong Lod we i talemaot tingting blong Hem tru long profet blong Hem, Presiden Russell M. Nelson. Mi testifae se hem i profet blong God we i stap long wol. Mi witnes blong Lod Jisas Kraes, we i bigfala Ridima mo Sevya blong yumi. Hemia i wok blong Hem mo hemia i tingting blong Hem, mo wok mo tingting ia, mi talem tabu testemoni blong mi abaot hemia long nem blong Jisas Kraes, amen.