Fogivim Hem Olwe Gogo I No Save Finis
Long medel blong laef we i fulap long ol samting we i blokem rod mo ol samting we oli no stret, yumi evriwan i mas glad from ol seken janis.
Ol mistek, oli wan tru samting blong laef. Blong lanem blong plei piano, i nid blong i no posibol sapos yu no mekem ol taosen mistek—ating wan milian olsem. Blong lanem wan niufala lanwis, wan i mas fesem sem blong mekem ol taosen mistek—mebi wan milian olsem. Iven ol wol top atlet oli neva stop blong mekem mistek.
“Sakses”, olsem we oli talem, “i no from se man i no foldaon, be i blong hem i aot long wan foldaon, mo wan nara foldaon, mo no lusum gudfala fasin blong hem.”
Taem hem i inventem lampul blong laet, oli talem se Thomas Edison i talem: “Mi no bin mekem mistek 1 taosen taem. Lampul ia, mi inventem long 1 taosen step.” Charles F . Kettering i singaotem ol mistek ia “ol fingga poslaet long rod blong kasem samting.” Mi hop se wanwan mistek we yumi mekem, i kam wan lesen blong waes, i tanem ol ston we oli blokem rod oli kam ol ston blong wokbaot antap long ol.
Fet blong Nifae we i neva muvmuv, i bin helpem hem blong aot long wan foldaon, mo wan nara foldaon kasem taem hem i kasem ol bras buk. I tekem Moses 10 taem bifo hem i gat sakses blong ronwe long Ijip wetem Ol Laen blong Isrel.
Yumi save askem: sapos tugeta, Nifae mo Moses, tufala i stap mekem wok we Lod i sendem tufala from, ?from wanem Lod i no kam mo helpem tufala blong gat sakses long fas taem nomo we tufala i traem? ?From wanem Hem i letem tufala—mo from wanem Hem i stap letem yumi—blong gat problem mo foldaon taem yumi traem blong win? Long medel blong plante impoten ansa long kwestin ia, hemia samfala:
-
Faswan, Lod i save se “olgeta samting ia bambae oli givim eksperiens long yumi, mo bae i blong gud blong yumi.
-
Seken, i blong letem yumi save “oli testem samting we i konkon blong mekem se oli save glad long wanem we i gud.”
-
Nambatri, blong pruvum se “faet ia i blong Lod,” mo hem i tru long gladhat nomo we yumi save mekem wok blong Hem mo kam olsem Hem.
-
Nambafo, blong helpem yumi developem mo kasem plante fasin olsem hemia blong Kraes, we oli no save kam klin sapos i no gat samting i kam agens mo sapos oli no stap insaed long “oven blong faea blong hadtaem.”
Long medel blong laef we i fulap long ol samting we i blokem rod mo ol samting we oli no stret, yumi evriwan i mas glad from ol seken janis.
Long 1970, olsem wan niu studen long BYU, mi enrol long wan fas kos long ol stamba blong Fisik we Jae Ballif i tijim, we i bae gudfala profesa. Afta we hem i finisim wanwan yunit blong kos ia, bae i givim wan eksam. Sapos wan studen i kasem C mak, mo i wantem wan moa gud mak, Profesa Ballif bae i letem studen blong tekem wan nara eksam we i abaot sem topik. Sapos studen i kasem B mak long nambatu taem, mo i no glad yet, bae profesa i letem hem i tekem wan nambatri mo nambafo tes, i go olsem.Taem hem i bin givim plante seken janis long mi, hem i bin helpem mi blong kam gud moa, mo long en, winim wan A long klas blong hem.
Hem i wan spesel mo waes profesa, we i givim insperesen long ol studen blong hem blong gohed blong traem—blong tekem se wan lus i wan tijing, i no wan trabol, mo i no nid blong fraet blong foldaon o lus, be blong lanem samting aot long hem.
I no longtaem, mi ring i go long bigman ia 47 yia afta we mi tekem Fisik kos blong hem. Mi askem hem from wanem hem i glad blong letem ol studen blong hem blong traem eksam fulap taem blong mekem mak i kam antap. Ansa blong hem i: “Mi wantem blong stap long sem saed blong ol studen.”
Nomata we yumi talem tangkyu from ol seken janis afta long ol mistek, o foldaon blong tingting, yumi stap sapraes long gladhat blong Sevya blong givim yumi ol seken janis blong winim sin, o winim hat we i foldaon.
I no gat wan moa i stap long saed blong yumi bitim Sevya. Hem i letem yumi mekem mo mekem bakegen eksam blong Hem. Blong kam olsem Hem, i nidim plante plante seken janislong ol evri dei faet blong yumi wetem man ia we i folem fasin blong wol, olsem blong kontrolem ol samting we bodi i wantem, lanem blong gat longfala tingting mo stap fogiv, winim les fasin, mo ronwe long ol sin blong minim blong no stretem sin, be hemia sam nomo. Sapos blong mestem rod i fasin blong man, ?hamas taem bae yumi mas foldaon blong mekem se fasin blong yumi i nomo folem hemia blong man, be hemia blong heven? ?Plante taosen? Mebi i wan milian.
From se Hem i save se rod ia we i smol mo i no isi bambae i fulap long ol tes mo bae yumi mestem rod evri dei, naoSevya i bin pem wan bigfala praes blong givim yumi plante janis olsem, we i nid, blong yumi save pasem eksam blong laef ia. Oposisen ia, we Hem i letem i kam, plante taem yumi luk se yumi no save winim, mo i hevi tumas blong karem, be yet, Hem i no lego yumi i stap we yumi no gat hop.
Blong kipim hop blong yumi i wok taem yumi stap fesem ol tes blong laef, gladhat blong Sevya i rere oltaemmo i stap oltaem. Gladhat blong hem i “wan tabu rod blong kasem help o paoa, wan paoa we i save letem ol man mo ol woman blong oli kasem laef we i no save finis mo kam olsem ol god afta we oli yusum evri paoa blong olgeta.” Gladhat mo ae blong Hem we i gat lav, i stap long yumi long ful wokbaot blong yumi taem Hem i givim insperesen, i mekem trabol i no hevi, i givim paoa, i mekem yumi fri, i protektem, i hilim, mo i givhan long ol pipol blong Hem, iven taem oli foldaon folem rod we i stret mo i no isi.
Fasin blong sakem sin, i wan presen we yumi save kasem we i letem mo i mekem se yumi aot long wanwan foldaon mo yumi no lusum gud fasin blong yumi. Fasin blong sakem sin i no wan seken plan sapos yumi foldaon. Fasin blong sakem sin, i plan ia nao blong Hem, from Hem i save se bae yumi mekem mistek. Hemia i gospel blong sakem sin, mo olsem Presiden Russell M. Nelson i bin talem: “Hem i wan laeftaem kurikulom.”
Long laeftaem kurikulom ia blong sakem sin, sakramen i rod we Lod i putum blong kasem oltaem fogivnes blong Hem. Sapos yumi tekem wetem wan hat we i gat sore mo wan spirit we i wantem sakem sin, Hem i givim yumi, fogivnes evri wik taem yumi progres aot long wanwan foldaon folem rod ia blong kavenan. From, “nomata ol sin blong olgeta, insaed blong mi i fulap wetem lav mo sore long olgeta.”
?Be hamas taem nao bambae Hem i fogivim yumi? ?Hem i save wet long hadtaem kasem wetaem? Long wan taem, Pita i askem Sevya: “Masta, Sapos wan brata blong mi i stap mekem i no stret long mi, mi mi mas fogivim hem hamas taem? ?Seven taem?
Maet, Pita i ting se seven i inaf blong tokbaot se i tumas blong stap fofogivim plante taem tumas mo gud hat i gat limit blong hem. Olsem ansa, Sevya i talem gud long Pita blong hem i no kaontem—blong no putum limit long fasin blong fogiv.
“Jisas i talem se: ‘Yu no save fogivim hem seven taem nomo. Yu mas fogivim hem olwe gogo i no save finis, [o seventi taem seven].”
Yes, Sevya i no putum limit long 490 taem. Hemia bae i minim se yumi mas tekem sakramen kasem 490 taem, mo afta, long 491 taem, wan man blong odit long heven i kam, i talem se: “Sore tumas, be kad blong yu blong sakem sin i nomo laef—stat naoia i go, yu stap yuwan nao.”
Lod i yusum matematik ia blong seventi taem seven olsem wan pikja blong Atonmen blong Hem we i no gat en, Lav blong Hem we i bigwan tumas, mo gladhat blong Hem we i no gat limit. Yes, mo evri taem we ol pipol blong mi oli sakem sin bae mi fogivim olgeta long ol fasin blong brekem loa blong olgeta agensem mi.
Be hemia i no minim se sakramen i kam wan raet blong mekem sin. Hemia nao wan risen we toktok ia i stap insaed long Buk blong Moronae: “Be evri taem we oli sakem sin mo lukaotem blong kasem fogivnes, wetem tru tingting,oli fogivim olgeta.”
Tru tingting i minim se yumi hadwok tru from mo mekem ol ril jenis. “Jenis” i stamba toktok we Gaed blong Ol Skripja i yusum blong talem mining blong fasin blong sakem sin: “Wan jenis insaed long maen mo long hat we i mekem se wan i gat niufala fasin long fored blong God, hemwan mo laef.” Kaen jenis olsem, i mekem man i gro long saed blong spirit. Sakses blong yumi, nao, i no aot long wan foldaon, mo wan nara foldaon, be i stap gro, i aot long wan foldaon, mo wan nara foldaon mo yumi no lusum gudfala fasin blong yumi.”
Long saed blong jenis, tingting long wei ia: “Ol samting we oli no jenis, oli stap semmak nomo.” Tingting ia i klia, mo mi no minim blong talem se yufala i no waes, be hemia i bigfala waes blong Presiden Boed K. Peka, we i bin ademap, “Mo taem yumi jenis finis ia—be yumi jenis ia nao, yumi no gobak.”
From se yumi no wantem gobak kasem taem we yumi kam olsem we Sevya i stap, nao yumi nid blong gohed blong girap evri taem we yumi foldaon, wetem wan filing blong wantem gohed blong gro mo progres i go, nomata long wiknes blong yumi. Long ol wiknes blong yumi, Hem i leftemap tingting blong yumi: “gladhat blong mi, i naf blong yu: taem we yu yu no gat paoa, paoa blong mi i save kam strong moa long yu.”
Wetem ol teknik blong tekem foto blong wan longfala taem mo foto we i tekem smol samting i kam bigwan, bae yumi luksave se yumi stap gro long bodi. Semmak, hamas yumi gro long spirit, bambae yumi no save luk, be nomo taem yumi luk long rives mira blong taem. Bae hem i waes blong lukluk i gobak biaen tru long mira ia, blong luksave progres blong yumi, mo givim insperesen long yumi blong mas wokbaot i go wetem strong bilif long Kraes, wetem wan stret mo klin hop.”
Mi mi talem tangkyu blong taem we i no save finis from lav mo kaen fasin, mo fasin blong gat longfala tingting tru long hadtaem blong Papa mo Mama blong mi long Heven mo Sevya, we oli letem yumi plante seken janis we yumi no save kaontem, folem rod ia i gobak long ples blong Olgeta. Long nem blong Jisas Kraes, amen.