We Yumi Wan

I Kam long Reyna I. Aburto

Seken Kaonsela long Jeneral Presidensi blong Rilif Sosaeti

Blong save kasem tabu ples blong yumi long en, yumi nidim wanwan long yumi, mo yumi nid blong stap wan.

Wan long ol kriesen long wol ia we i gud tumas, i monak bataflae. Long wan trip long Meksiko, blong spendem Krismes wetem famle blong man blong mi, mifala i go visitim wan haos blong prea, wan ples we plante milian monak bataflae oli stap spendem winta long hem. Hem i intresting tumas blong luk wan samting olsem, mo blong mifala i tingtingbak long eksampol blong yuniti mo fasin blong stap obei ol loa we ol kriesen blong God oli soemaot.

Ol monak bataflae oli save travel gud. Oli yusum posisen blong san blong faenem daereksen we oli nid blong go long hem. Evri springtaem, oli travel plante kilometa, aot long Meksiko i go long Kanada, mo evri Septemba, oli gobak long semfala bus long Meksiko. Oli mekem hemia evri yia, oli flaeflae sloslo i go. Long travel blong olgeta, oli hip tugeta long naet long ol tri blong oli protektem olgeta long kolkol mo ol samting we i save kakae olgeta.

Wan grup blong ol bataflae, oli singaotem kaledoskop. ?Hemia i no wan gud pikja? Wanwan bataflae long wan kaledoskop, i wan kaen nomo mo i defren, be yet, ol smol bebet ia we i no strong, wan Krieta we i gat lav i bin mekem, mo i save laef, travel, kam plante, mo save givim laef taem oli aot long wan flaoa i go long nara flaoa, mo saksakem polen blong flaoa. Mo nomata wanwan bataflae i defren, oli wok tugeta blong mekem wol ia i wan ples we i moa naes mo i karem moa frut.

Olsem ol monak bataflae, yumi stap wokbaot i gobak long hom long heven, ples we bae yumi mit bakegen wetem Papa mo Mama blong Heven. Semmak olsem ol bataflae, yumi bin kasem ol tabu fasin we i letem yumi travel tru long laef blong save [mekem] kasem mak we oli krietem yumi from. Olsem olgeta, sapos yumi wivim hat blong yumi i joen tugeta, Lod bambae i protektem yumi olsem wan mama faol i pulum tugeta ol smol faol blong hem andanit long wing blong hem mo i mekem yumi kam olsem wan kaledoskop.

Ol gel mo boe, yang woman mo yang man, ol sista mo ol brata. Yumi stap tugeta long wokbaot ia. Blong save kasem tabu ples blong yumi long en, yumi nidim wanwan long yumi, mo yumi nid blong stap wan. Lod i givim komanmen long yumi: “Stap wan; sapos yufala i no stap wan, yufala i no blong mi.”

Jisas Kraes i stamba eksampol blong yuniti wetem Papa blong Hem. Oli stap wan long stamba tingting, long lav, mo long ol wok, wetem tingting blong Pikinini we i draon insaed long tingting blong Papa.”

?Olsem wanem yumi save folem stret eksampol evriwan blong Lod, long saed blong yuniti blong Hem wetem Papa blong Hem, mo kam wan wetem Tufala mo wetem wanwan long yumi?

Wan insperesen paten i stap long Ol Wok 1:14. Yumi stap ridim: “Ol man oli gogohed we oli wan, mo joen tugeta long prea, wetem ol woman.

Hem i impoten blong luk se toktok ia, “we oli wan” o “joen tugeta” i kamaot plante taem insaed long buk blong Ol Wok, we yumi stap ridim wanem olgeta we oli folem Jisas, oli bin mekem stret afta we Hem i go antap long heven olsem wan man we i laef bakegen long ded, mo tu, ol blesing we oli bin kasem from ol hadwok blong olgeta. Hem i impoten tu se yumi faenem wan semmak paten long medel blong ol fetful long graon blong Amerika long taem ia we Lod i bin visitim mo tijim olgeta. “Joen tugeta” i minim blong agri, blong stap wan, mo evriwan tugeta.

Sam long olgeta samting we ol fetful Sent oli bin mekem tugeta long tugeta ples ia, oli we oli bin testifae abaot Jisas Kraes, oli bin stadi long toktok blong God, mo oli bin givgivhan long wanwan long olgeta wetem lav.

Olgeta we oli bin stap folem Lod, oli bin wan long stamba tingting mo ol wok. Oli bin save se huia olgeta, oli bin save wanem we oli mas mekem, mo oli bin mekem wetem lav long God mo long wanwan long olgeta. Oli bin pat blong wan naes mo bigfala kaledoskop we i stap muv fored we oli joen tugeta.

Samfala long ol blesing we oli bin kasem, oli we, oli bin fulap long Tabu Spirit, ol merikel oli bin tekem ples long medel blong olgeta, Jos i bin gro, i no gat raorao long medel blong ol pipol, mo Lod i bin blesem olgeta long saed blong evri samting.

Yumi save ting se risen from wanem oli bin stap joen gud i we, wanwan i bin savegud Lod. Oli bin stap kolosap long Hem, mo oli bin ol witnes blong tabu misin blong Hem, blong ol merikel we Hem i bin mekem, mo blong Laef Bakegen long Ded blong Hem. Oli bin luk mo tajem ol mak blong han mo leg blong Hem. Oli bin savegud se Hem nao i Mesaea blong promes, Ridima blong Wol. Oli bin save se: “Hem i stamba blong hiling, pis mo progres we i no save finis.”

Nomata we yumi no bin luk Sevya blong yumi wetem ae blong bodi blong yumi, yumi save kam blong save se Hem i stap laef. Taem yumi stap kam kolosap long Hem, taem yumi stap lukaotem wan witnes blong yumiwan tru long Tabu Spirit mo tabu misin blong Hem, bambae yumi kam blong andastanem gud stamba tingting blong yumi; lav ia blong God bambae i stap insaed long hat blong yumi; Bambae yumi gat strong tingting ia blong joen tugeta insaed long kaledoskop blong famli, wod, mo komuniti blong yumi; mo bambae yumi givgivhan long wanwan blong yumi, long ol niu mo moa gud wei.”

Ol merikel oli hapen taem ol pikinini blong God oli wok tugeta, we Spirit i lidim olgeta blong go kasem ol narawan long nid.

Yumi harem fulap stori blong lav we yumi soem long ol pipol taem ol disasta oli kasem wan ples. Eksampol. Taem taon blong Yuston i fesem bigfala wota we i ron long las yia, ol pipol oli fogetem nid blong olgeta bakegen mo oli go help. Wan kworom presiden i singaotem help long komuniti, mo oli oganaesem 77 sip kwiktaem. Ol man blong help ia oli go raon long ol ples we i damej mo oli tekem ol ful famli i go long wan mitinghaos, mo oli bin haed long ples ia mo kasem help we oli nidim. Ol memba mo olgeta we oli no memba oli wok tugeta wetem wan stamba tingting.

Long Santiago, Jile, wan Rilif Sosaeti presiden i wantem blong helpem ol man we oli aot long Haiti i go stap long komuniti blong hem. Taem hem i toktok tugeta wetem ol prishud lida blong hem, hem mo sam nara lida oli gat tingting blong givim ol klas blong lanem Spanis long olgeta ia, mo helpem olgeta blong stap gud insaed long niu ples mo hom blong olgeta. Evri Satedei moning, ol misinari oli kam tugeta wetem ol studen blong olgeta. Filing blong yuniti insaed long bilding ia i wan eksampol blong insperesen blong ol pipol we oli kamaot long ol defren bakgraon be oli joen tugeta.

Long Meksiko, ol handred blong ol memba oli travel plante aoa blong helpem olgeta we oli laef tru long tufala bigfala etkwek. Oli kam wetem ol tul, ol masin, mo lav long neiba blong olgeta. Taem ol volontia oli kam tugeta long wan long ol mitinghaos blong yumi, i stap wetem long instraksen, meya blong Iksuatan taon i krae bigwan taem hem i luk eksampol blong stret lav blong Kraes.

Lod, naoia, i stap givim janis long yumi blong kaonsel tugeta evri manis long prishud kworom mo Rilif Sosaeti, blong mekem se yumi save tekpat moa insaed long wod mo branj kaledoskop—wan ples we yumi evriwan i fit insaed mo ples we oli nidim yumi evriwan.

Evri rod blong yumi oli defdefren, be yet, yumi wokbaot long rod ia tugeta. Rod blong yumi i no wanem yumi bin mekem o weples yumi bin go long hem; hem i abaot weples yumi stap go long hem mo huia yumi stap, tugeta. Taem yumi kaonsel tugeta we Tabu Spirit i lidim yumi, yumi save luk weples yumi stap long hem, mo weples oli nidim yumi long hem. Tabu Spirit i givim yumi wan visen long wanem ae blong bodi blong yumi i no save luk, from se revelesen i stap olbaot long medel blong yumi, mo taem yumi putum revelesen ia i go wanples, yumi save luk moa samting.

Taem yumi stap wok long yuniti, stamba tingting blong yumi i blong lukaotem mo mekem tingting blong Lod. Wanem i pusum yumi i lav ia we yumi filim long God mo long ol neiba blong yumi. Mo wanem we yumi sapos blong wantem moa i blong wok wetem strong tingting blong yumi save rere long rod bifo bigfala kambak blong Sevya blong yumi. Wan wei ia nomo we bae yumi save mekem olsem, i blong joen tugeta.

Semmak olsem ol monak bataflae ia, bae yumi gohed long wokbaot ia tugeta wetem wan tingting, wanwan long yumi wetem ol fasin blong yumi mo givhan blong yumi, we yumi wok blong mekem wol ia i moa naes mo i karem moa frut.—wan smol step long wan taem mo tingting we i agri wetem ol komanmen blong God.

Lod blong yumi, Jisas Kraes, i bin promesem se taem yumi kam tugeta long nem blong Hem, Hem i stap long medel blong yumi. Mi testifae se Hem i stap laef mo Hem i bin laef bakegen long ded long wan naes spring moning olsem tedei. Hem i Hae Monak blong evri monak, “King blong evri king, mo Lod blong evri lod.”

Bae yumi wan wetem Papa mo Stret Pikinini blong Hem, olsem we Tabu Spirit i stap lidim yumi long hem, hemia i prea blong mi wetem tingting i stap daon, long nem blong Jisas Kraes, amen.

Ol Not

1. Luk long Abraham 3:26; 4:7, 9–12, 15, 18, 21, 24–25.

2. Wan intresting samting abaot ol monak bataflae i we i tekem trifala jeneresen blong mekem trip i go long Not i go long Kanada. Be, wan supa jeneresen i mekem ful trip i go long Saot i go long Meksiko, i spendem winta longwe, mo afta, i mekem fas flae blong olgeta i gobak long Not.(Luk long “Flight of the Butterflies” [video, 2012]; “‘Flight’: A Few Million Little Creatures That Could,” WBUR News, Sept. 28, 2012, wbur.org.)

3. Luk long “Why Do Monarchs Form Overnight Roosts during Fall Migration?” learner.org/jnorth/tm/monarch/sl/17/text.html.

4. Luk long “What Is a Group of Butterflies Called?” amazingbutterflies.com/frequentlyaskedquestions.htm; luk long also “kaleidoscope,” merriam-webster.com. Kaleidoscope i kam long Grik toktok ia kalos (“naes tumas”) mo eidos (“sep”).

5. Luk long “Famli: Wan Ofisol Toktok I Go long Wol,” 35338852,

6. Doctrine and Covenants 88:19; luk tu long Doctrine and Covenants 88:25.

7. Luk long Mosaea 18:21.

8. 3 Nifae 10:4.

9. Doctrine and Covenants 38:27

10. Mosaea 15:7.

11. Ol Wok 1:14; oli ademap italik.

12. Sam long samting we ol Sent oli mekem long Jerusalem: jusum wan niu Aposol mo seven man we oli ones mo sapotem olgeta (luk long Ol Wok 1:26; 6:3–5); oli kam tugeta long dei blong Pentekos (luk long Ol Wok 2:1); testifae abaot Jisas Kraes (luk long Ol Wok 2:22–36; 3:13–26; 4:10, 33; 5:42); oli singaotem ol pipol blong sakem sin mo baptaesem olgeta(luk long Ol Wok 2:38–41); oli gohed blong felosip mo brekem bred, mo prea (luk long Ol Wok 2:42); oli bin stap tugeta mo evri samting blong olgeta i semmak (luk long Ol Wok 2:44–46; 4:34–35); oli go long tempol (luk long Ol Wok 2:46); Oltaem oli “stap kakae we tingting blong olgeta i stap daon, mo oli glad tumas”(Ol Wok 2:46); oli presem God mo ol pipol oli bin laekem olgeta (luk long Ol Wok 2:47); oli bin obei mo folem fet blong olgeta (luk long Ol Wok 6:7); oli bin stap prea oltaem mo stap mekem wok blong talemaot toktok (Ol Wok 6:4). Sam long olgeta samting we ol Sent oli bin mekem long graon blong Amerika: oli prijim gospel blong Jisas Kraes (luk long 3 Nifae 28:23); oli stanemap Jos blong Kraes (luk long 4 Nifae 1:1); oli baptaesem ol pipol (luk long 4 Nifae 1:1); evriwan i mekem i stret long nara man(luk long 4 Nifae 1:2); evri samting i semmak long medel blong olgeta (luk long 4 Nifae 1:3); oli bildimap ol taon (luk long 4 Nifae 1:7–9); oli mared (luk long 4 Nifae 1:11); oli wokbaot folem ol komanmen we oli kasem long Lod(luk long 4 Nifae 1:12); oli gohed long fasin blong livim kakae mo stap prea(luk long 4 Nifae 1:12); oli mit tugeta plante taem blong prea mo lisin long toktok blong Lod (luk long 4 Nifae 1:12).

13. Sam long olgeta blesing we Ol Sent oli bin kasem long Jerusalem: oli bin fulap long Tabu Spirit (luk long Ol Wok2:4; 4:31); oli kasem presen blong toktok long ol lanwis mo talem profesi mo talem ol gudfala wok blong God (luk long Ol Wok2:4–18); Ol Aposol oli bin mekem plante wok blong sapraes mo oli givim plante saen (luk long Ol Wok2:43); ol merikel oli bin hapen (luk long Ol Wok3:1–10; 5:18–19; 6:8, 15); moa pipol oli joenem Jos (luk long Ol Wok2:47; 5:14). Sam long ol blesing we olgeta Sent oli kasem long graon blong Amerika: oli pipol oli jenisim laef blong olgea i go long Lod (luk long 3 Nifae 28:23; 4 Nifae 1:2); wan jeneresen i kasem blesing (luk long 3 Nifae 28:23); i no gat agens mo raorao long medel blong olgeta (luk long 4 Nifae 1:2, 13, 15, 18); i no gat rijman o puaman (luk long 4 Nifae 1:3); “oli mekem evriwan oli kam fri, mo oli tekem pat long presen blong heven” (4 Nifae 1:3); i bin gat pis long graon (luk long 4 Nifae 1:4); ol bigfala merikel oli hapen (luk long 4 Nifae 1:5, 13); Lod i bin blesem olgeta plante (luk long 4 Nifae 1:7, 18); oli bin wok strong, mo oli bin kam plnate kwiktaem, mo oli kam naes mo kaen (luk long 4 Nifae 1:10); oli bin kasem ol blesing folem ol plante promes we Lod i bin mekem long olgeta (luk long 4 Nifae 1:11); “i no bin gat fasin blong agens long graon, from lav we oli gat long God we i bin stastap insaed long hat blong ol pipol” (4 Nifae 1:15); “ti no bin gat ol tingting blong wantem samting blong narafala man, o ol rao, o ol faet, o ol fasin blong slip olbaot, o ol giaman, o ol fasin blong kilim man i ded, o eni kaen fasin blong gat rabis tingting; mo i tru we i no save gat wan pipol we i moa hapi long medel blong evri pipol we han blong God i mekem olgeta” (4 Nifae 1:16); “i no bin gat stilman, o ol man blong kilim man i ded, mo tu, i no bin gat Ol Man blong Leman, o eni kaen pipol we oli singaotem Ol Man blong _; be oli stap wan; oli ol pikinini blong Kraes, mo oli gat raet long kingdom blong God” (4 Nifae 1:17); Lod i bin blesem olgeta long evri wok blong olgeta (luk long 4 Nifae 1:18).

14. Jean B. Bingham, “That Your Joy Might Be Full,” Liahona, Nov. 2017, 85.

15. Luk long 4 Nifae 1:15.

16. Jeffrey R. Holland, “Emissaries to the Church,” Liahona, Nov. 2016, 62.

17. Moronae 7:47.

18. Neil L. Andersen, insaed long “Auxiliary Panels Use New Training Library,” Liahona, Apr. 2011, 76.

19. Luk long Matiu 22:37–40.

20. Jekob 5:61.

21. Luk long Matiu 18:20.

22. 1 Timoti 6:15.