Trening long Saed blong Hanbuk I Tokbaot Moa Wok blong Fasin blong Sevem Man
Long taem blong wan wol lidasip trening long Febwari 2011, ol memba blong Fas Presidensi mo Kworom blong Olgeta Twelef Aposol oli bin givim instraksen long olgeta we oli tekem pat blong yusum ol niufala hanbuk long fasin we i moa gud. Miting i blong folemap wol lidasip trening we i bin tekem ples long Novemba 2010 long taem we oli jes presentem ol hanbuk ia.
Ol spika oli tokbaot moa long fasin blong yusum ol hanbuk long wan wei we i givim moa insperesen, hamas i impoten blong andastanem stamba blong doktrin blong ol niufala hanbuk ia, olsem wanem blong yusum ol prinsipol blong mekem ol program blong Jos oli folem ol situesen, mo olsem wanem ol jenis blong hanbuk ia, oli save yusum blong mekem wok blong fasin blong sevem man, mo rol blong ol woman insaed long ol kaonsel.
Olgeta we oli bin tekem pat long brodkas ia i gat, Presiden Henri B. Aering, Fas Kaonsela long Fas Presidensi; Ol elda ia: Rasel M. Nelson, Dalin H. Oks, Rijad G. Skot, Robet D. Hels, Jefri R. Holan, Deved A. Bedna, Kwentin L. Kuk, D. Tod Kristofeson, mo Nil L. Andesen blong Kworom blong Olgeta Twelef Aposol; Ol elda ia: Kreg K. Kristensen; Brus D. Pota mo W. Kreg Swik blong Olgeta Seventi; mo ol jeneral presiden blong ol okseleri.
Yusum Ol Hanbuk Wetem Moa Insperesen
Taem hem i talem se miting ia i “nambatu janis blong faenemaot olsem wanem blong yusum gud moa hanbuk,” Presiden Aering i bin leftemap tingting blong ol lida blong mekem paoa blong olgeta blong kasem revelesen i kam antap.
“Tru long Spirit nomo bambae yufala i save olsem wanem blong yusum wanem we yufala i stap ridim insaed long hanbuk,” hem i talem. “… Ating long yufala, i no posibol blong wet blong kasem o hop blong kasem plante revelesen we yu nidim long seves blong yu evri dei. Bae i no save kam sapos i no gat fet mo hadwok, be hem i posibol.”
Presiden Aering i bin promesem se taem ol lida oli wok mo prea blong “andastanem mo folem ol toktok blong laef” we oli givim long olgeta, Lod bae i helpem olgeta blong givim seves mo lidasip we i go bitim paoa blong olgeta bakegen.
Stamba Doktrin blong Ol Hanbuk
“Hanbuk ia i folem doktrin,” Elda Oks i talem, “mo i moa sot bitim hanbuk bifo from se long plante topik, hem i no givim ol rul o givim daereksen. Be, hem i givim ol prinsipol we ol lida we oli insperesen oli save yusum … folem lokol situesen blong olgeta.”
Elda Bedna mo Elda Kristofeson, tufala i bin givim woning long ol lida blong no skipim stat blong ol japta blong Hanbuk 2 blong oli mas savegud ol polisi we oli stap long ol japta ia. Ol fas japta oli putum stamba doktrin blong andastanem mo yusum ol prinsipol mo ol polisi we oli kam afta.
Elda Bedna i bin talem se blong mekem se ol hanbuk oli “stanap long prinsipol, mo i no gat tumas rul, i wan samting we i nidim moa Spirit long yumi evriwan.”
Ol Prinsipol blong Stretem Folem Situesen
“Long saed blong doktrin, kavenan, mo polisi we Fas Presidensi mo Olgeta Twelef oli putum, yumi no aot long wanem i stap long hanbuk,” Elda Nelson i talem. “Yumi stretem ol aktiviti nomo folem situesen blong yumi nomo blong oli go wetem ol lokol nid.”
Folem Elda Pota, japta 17, “Wan Sem Fasin mo Fasin blong Stretem Folem Situesen,” oli bin putum blong helpem ol lokol lida blong folem Spirit mo faenemaot wanem i stret blong stretem sam program. Japta ia i eksplenem wanem we i no save jenis mo i givim faef kondisen we oli mas folem blong save stretem program folem situesen: situesen blong famle, no gat transpot mo komunikesen, smol kworom o klas, no gat inaf lida, mo ol sekiuriti kondisen.
“Blong mekem ol stret jenis we i folem situesen, i no mekem Jos i nomo strong; i mekem i kam strong moa,” Elda Pota i talem long wan toktok blong hem we Elda W. Kreg Swik blong Olgeta Seventi i ridim. Taem oli mekem ol jenis we i kam tru long insperesen, ol lokol lida oli no mas filim se oli stap mekem nomo wanem we i naf bitim long wanem we i moa gud. “Evri yunit blong Jos i gat ol doktrin, ol odinens, prishud paoa, mo ol presen blong Spirit we i nidim blong sevem man mo blong ol pikinini blong God i kam olsem wan god,” Elda Pota i raetem.
Wok blong Fasin blong Sevem Man
Ol jenis we oli bin mekem long ful Hanbuk 2 oli mekem blong wok blong fasin blong sevem man i gohed. Presiden Aering i bin talem: “Hanbuk bae i kam wan rij samting blong yufala taem yufala i yusum blong helpem ol narafala man blong jusum rod we i go long laef we i no save finis. Hemia nao stamba tingting blong hem.”
Japta 5 i tekem tugeta anda long wan taetol “Wok blong Fasin blong Sevem Man Insaed long Wod mo Stek” ol topik we fastaem oli lukluk long hem wanwan; hemia i tekem memba misinari wok, fasin blong holemtaet ol niu konvet, mo fasin blong mekem ol memba oli aktiv, wok blong tempol mo famle histri, mo tijim gospel.
“Pol i bin talem se long dispensesen ia, dispensesen blong taem we i fulwan, evri samting bae oli kam tugeta wanples long Kraes,” Elda Bedna i talem (luk long Efesas 1:10). “I gat wan wok nomo.”
Eksampol, wanem we sam oli ting fastaem olsem ol seperet misin blong Jos, naoia oli “semfala wok long ol defren ples” hem i talem. Misinari wok i blong talemaot gospel, mo invaetem ol narafala blong kasem ol tabu odinens mo mekem ol kavenan. Blong mekem olgeta Sent oli kam stret evriwan—wetem wok blong holemtaet man, mekem man i aktiv, mo tij—i wok blong invaetem ol pipol blong ona long ol odinens mo ol kavenan. Blong pemaot ol dedman tru long wok blong famle histri mo tempol, i wok blong givim janis blong kasem ol odinens mo mekem ol kavenan blong olgeta we oli bin ded.
Elda Holan i bin talem se ol jenis long hanbuk ia i mekem se yumi andastanem se ol lida blong kworom mo ol okseleri oli no stap nomo long wod kaonsel blong tingting nomo long kworom blong okseleri memba blong olgeta nomo, be oli serem responsabiliti blong gudfala laef long saed blong spirit, blong evri memba.
Elda Kuk i bin help blong mekem i klia moa olsem wanem sam long ol jenis blong ol polisi long Hanbuk 2 oli givhan long wok blong fasin blong sevem man.
Hem i poenemaot olsem wanem ol bisop mo ol wod kaonsel we oli mit blong tokbaot ol nid blong gudlaef oli impoten from we naoia i nomo gat ol welfea miting. Hem i eksplenem olsem wanem rol blong ol lida blong Melkesedek Prishud oli kam antap blong givim kaonsel long ol memba blong kworom. Mo tu, hem i mekem i klia moa ol jenis we i givim raet long ol papa we oli no klin inaf evriwan blong go long tempol blong tekem pat long ol odinens mo ol blesing blong ol memba blong famle long sam situesen nomo.
“Yumi no stap long bisnis blong ranem ol program mo manejem wan oganaesesen,” Elda Bedna i talem. “Hem i wan nid be hem i no inaf. Hemia i wok blong fasin blong sevem man. Mo taem yumi stat blong tingbaot ol odinens mo ol kavenan, nao ol prishud lida bae oli askem kwestin ia, wanem nao hem i nekis odinens we man o woman ia o famle blong hem i nidim long laef blong olgeta, mo long wanem wei nao yumi save help blong mekem olgeta oli rere from?”
Ol Woman Insaed long Kaonsel
Elda Skot i tokbaot wari blong hem se, long sam ples, ol lida oli stap mestem janis blong tekem ol woman taem oli kaonsel tugeta. “Taem oli save leftemap tingting blong ol woman blong oli tekempat long wan wod kaonsel miting, ol aedia blong olgeta, oltaem, oli help mo i kam tru long insperesen,” hem i talem.
Ol lida, oli save leftemap tingting ia blong tekempat taem oli singaotem ol sista long nem blong olgeta mo taem oli talemaot tangkyu blong olgeta from ol tingting mo wanem oli givim, Elda Skot i eksplenem.
“Wan gudfala blesing we i kam long ol hom blong ol prishud lida” we oli folem ol gaedlaen ia, hem i we “ol man ia, oli save kam blong luksave moa ol tabu rol blong ol waef blong olgeta long hom blong olgeta,” hem i ademap.
Hem i bin tijim hamas hem i impoten blong bigfala namba blong ol memba blong kaonsel oli mas agri. Taem i gat filing ia, wan lida i save luk mo singaotem wan vot. Long ol taem we ol memba bae oli no vot fulwan, ol lida oli mas askem kaonsel long wanwan memba blong wod kaonsel, talem tangkyu long ol tingting we oli serem, i mekem wan desisen, mo i askem ol memba blong kaonsel blong joen blong sapotem desisen ia. Elda Skot i poenemaot we i impoten blong holem ol samting we oli tokbaot long ol wod kaonsel oli konfidensiol.
Ol Risal we Yumi Wantem Luk
Elda Nelson i endem trening taem hem i talem ol trifala hop we i stap: se fasin blong mekem samting i simpol bae i letem blong oli yusum taem mo risos long wan moa gudfala wei, se paoa blong prishud bae i gro long wanwan man we i kasem prishud blong blesem wanwan man mo woman mo evri famle insaed long Jos, mo se wanwan memba bae i filim blong givim ful tingting blong hem mo fasin blong hem olsem wan disaepol.
Long wok blong fasin blong sevem man, ol lida blong prishud oli mas tingting long ol nekis odinens mo nid blong wanwan man o woman mo olsem wanem blong helpem hem blong rere from samting ia.
Foto i kam long Kreg Daemon, © IRI
Ol lida blong Jos oli talem se ol man mo ol woman oli mas gat ikwol janis blong serem ol tingting blong olgeta long ol lidasip miting.
FOTO I KAM LONG KREG DAEMON