Yumi Tokbaot Kraes

Sakem sin, Tanem Yu I Go long Lod, mo Kam Gud Evriwan

I kam long Deved L. Frisknejt

Kurikulum Dipatmen

Hem we i bin sakem ol sin blong hem, hem i kasem fogivnes, mo Lod i nomo tingbaot ol sin ia bakegen (luk long D&C 58:42).

I no longtaem tumas wan gud mo fetful woman we mi save long hem i bin kasem rabis kil long wan aksiden blong trak. Long ol kil blong hem ia, i gat ol rib mo bun blong bak we oli brok. Pat blong tritmen blong hem i nidim hem blong i stap werem wan sapot long bak mo nek blong hem, mekem se hem i no save muvum rib o bak blong hem. Sapot ia i mekem hem i harem nogud. Be hem i mas stap olsem. Sapot ia i givim rod blong bak mo nek blong hem i save kam gud bakegen.

Fasin blong sakem sin i olsem sapot ia. Taem yumi mekem sin, yumi givim kil long sol blong yumi, mo yumi nidim tabu tritmen blong i save mekem yumi kam gud bakegen. Fasin blong sakem sin i givim rod we i letem Sevya, tru long paoa blong Atonmen, blong i hilim yumi (luk long 3 Nifae 9:13). Sapos sam pat blong sakem sin i mekem yu yu no filim gud tumas—olsem wan sapot long wan bak we i brok—yumi mas sakem sin from i gat nid.

Presiden Dita F. Ukdof, Seken Kaonsela long Fas Presidensi, i bin tijim: “Tru fasin blong sakem sin i karem yumi kambak blong mekem wanem we i raet. Blong sakem sin tru, yumi mas luksave ol sin blong yumi mo filim sore from, o gat sore olsem hemia blong God, mo talemaot ol sin ia long God. Sapos ol sin blong yumi oli bigwan tumas, yumi mas talemaot tu long prishud lida we i gat atoriti. Yumi nidim blong askem God from fogivnes mo mekem evri samting we yumi save mekem blong stretem ol nogud samting we ol aksen blong yumi bin mekem. Fasin blong sakem sin i minim wan jenis blong maen mo hat—yumi stop blong mekem ol samting we i rong, mo stat blong mekem ol samting we i raet. Hemia i mekem se yumi gat wan niu gud fasin long fes blong God, blong yumiwan, mo blong fesem laef.”¹

Taem yumi finisim gud rod blong fasin blong sakem sin ia, risal blong hem, hem i hiling, help, mo hapines. Doroti J. R. Waet i bin raetem:

Tingting long ol wota blong ae we oli foldaon aotsaed long bodi,

Yet oli klinim ol sol blong yumi insaed.²

Lod i stap askem strong oltaem wetem lav, mo fasin blong winim tingting se yumi mas sakem sin, from Hem i wantem mekem yumi kam gud bakegen. Hem i bin safa long bodi blong Hem mo long spirit blong pem praes from ol sin blong yumi sapos yumi sakem sin. Hem i eksplenem taem:

Hem i bin talem se Hem i safa ol samting ia blong evri man blong mekem se oli no save safa sapos oli sakem sin.

Be sapos oli no wantem sakem sin, oli mas safa olsem we Hem tu i bin safa;

Safaring ia i mekem Hem,—we i God, we i Hae long evriwan— i seksek from ol soa long bodi, mo blad blong Hem i ronaot long evri hol blong skin blong Hem, mo Hem i safa tugeta long bodi mo spirit, mo i mekem Hem i no wantem dring kap ia we i konkon, mo i mekem se Hem i wantem holemtaet Hem.

Nomata long hemia, Hem i bin givim glori i go long Papa, mo Hem i bin dring mo finisim wok blong Hem blong mekem rere evri samting blong ol pikinini blong man.

Mekem se Hem i komandem yumi bakegen blong sakem sin (luk long D&C 19:16–20).

Bae yumi sakem sin naoia, tanem yumi i go long Lod, mo kam gud bakegen.

Ol Not

1. Dieter F. Uchtdorf, “Point of Safe Return,” Liahona, Mei 2007, 100.

2. Dorothy J. R. White, “Repentance,” Ensign, Julae 1996, 27.

Wanem nao ol blesing blong fasin blong sakem sin mo fogivnes?

• Tabu Spirit bae i talemaot long yumi se oli bin fogivim yumi.

• God bae i tekemaot hevi samting we i mekem yumi filim rong from ol sin blong yumi.

• Bae yumi filim paoa blong Tabu Spirit i wok moa long yumi.

Blong kasem moa infomesen long topik ia, luk long Esikel 33:15–16; Alma 12:33–34; 36:13, 17–20; mo Boyd K. Packer, “The Brilliant Morning of Forgiveness,” Ensign, Nov. 1995, 18–21.

Ol Blesing blong Fasin blong Sakem Sin

“Sin, hem i taem yumi save mo stap brekem loa we i kam long heven. Atonmen blong Jisas Kraes hem i presen we i kam long God blong ol pikinini blong Hem blong stretem mo winim wanem i kam afta long sin. …

“Presen blong Atonmen blong Jisas Kraes i givim long yumi, long evri taem mo long evri ples, ol blesing blong fasin blong sakem sin mo fogivnes.”

Presiden Dita F. Ukdof, Seken Kaonsela long Fas Presidensi, “Point of Safe Return,” Liahona, Mei 2007, 99, 101.

From Wanem Fasin blong Sakem Sin I Hilim Yumi?

Elda Nil L. Andesen blong Kworom blong Olgeta Twelef Aposol i help blong ansarem kwestin ia long jeneral konfrens toktok blong hem ia “Sakem sin … Blong Mi Save Mekem Yu Kam Gud Bakegen” (Liahona, Nov. 2009, 40–43). Profet Alma i helpem yumi tu blong andastanem fasin blong sakem sin mo Atonmen (luk long Alma 42).

1. Fasin blong yumi blong sakem sin i letem yumi blong gat raet blong yusum Atonmen blong Kraes mo kam gud bakegen. Safaring blong Kraes long Getsemane mo long Golgota i bin pemaot ol sin blong yumi evriwan. Hem i save mo wantem tumas blong fogivim ol sin blong yumi.

2. Taem yumi sin, yumi tanem baksaed long God. Hemia i mekem spirit blong yumi i harem nogud.

3. Taem yumi sakem sin, yumi “go-bak” long God. Hemia i helpem harem sore blong yumi blong i kam daon. Fogivnes i tekemaot tu “rong long ol hat blong yumi” (Alma 24:10) mo i karem “pis blong tingting” (Mosaea 4:3), i kam mekem se i mekem yumi kam gud bakegen.

Tingting blong serem wetem eniwan, testemoni blong yu long ol blesing we i bin kam long yu olsem wan risal blong fasin blong sakem sin.

Yang boe we i lusum rod i bin kambak long papa blong hem wetem tingting we i stap daon mo i talem, “Papa, mi mi mekem i nogud long fes blong God, mo long fes blong yu tu. Naoia i no moa stret blong yu singaot mi, se mi mi pikinini blong yu” (Luk 15:21). Papa blong hem i welkamem hem long hom. Semmak olsem, bae Papa long Heven i welkamem yumi taem yumi sakem sin.

Kambak blong Yang Boe we I Lusum Rod, i kam long Jemes Tisot