Ol Praes we Yumi Kasem blong Bildimbak Samting
Taem mi bin luk ol damej we etkwek i bin mekem, mi bin harem nogud. Be afta, mi luksave se God i lavem olgeta we oli ded semmak olsem olgeta we oli bin laef.
From se mi stap long Sangae, Jaena, mi bin gat janis blong go wetem wan grup blong skul long Sijuan Provins long Saot Wes Jaena blong help bildim ol haos blong olgeta we etkwek i bin spolem ples blong olgeta sam yia i pas finis. Mifala i bin wokhad, mo putum brikis, tantanem simen, pusum wilbaro we i fulap long ol brikis, mo pasem brikis folem “grup blong laen” blong ol man. I kam long seken dei, bak blong mi i soa, mo ol hanglav blong mi i brokbrok. Be, trip ia i wan eksperiens we mi no save fogetem mo i mekem testemoni blong miwan i kam strong moa mo olsem wanem wanwan man i impoten, wan long ol valiu blong Ol Yang Woman.
Taem mi stap wokhad evri dei, mi luk se bilif blong mi long hamas mi impoten i kam antap. Mi filim gud long miwan from mi bin mekem ol samting blong mekem situesen blong laef blong olgeta we oli no gat wanem we mi gat, i kam antap moa.
Mifala i bin gat janis blong visitim wan skul long eria ia. Taem mifala i kasem skul, wan grup blong ol naesfala pikinini i ron i kam stret long mifala. Taem mi luk ol naesfala smol pikinini ia, mi luksave olsem wanem oli impoten tu. Oli ol naesfala pikinini blong God, mo mi filim strong se Hem i lavem mo save wanwan long olgeta.
Kolosap en blong trip blong mi, mifala i bin gat janis blong go long wan risot, ples we bae mifala i go kakae lanj long hem. Taem mifala i kasem longwe, be, mifala i faenem se etkwek i bin spolem. Hem i wan bigfala damej we mi neva luk long laef. I mekem mi wantem krae. Ol siling mo wol blong bilding ia oli foldaon i gobak insaed, ol tri we oli stap kolosap oli foldaon, mo i gat ol brikis we oli brokbrok evri ples. Wan bigfala ston antap long hil i rol i kam daon mo smasem wan saed blong wan bilding, mo mekem siling mo wol i foldaon i gobak insaed. I bin gat wan saed sus we i stap long fored blong wan long ol doa.
Taem mi tingbaot samting ia mo save se ol pipol oli bin ded long etkwek ia, mi traehad blong andastanem olsem wanem Papa long Heven i save letem samting ia i hapen. Olsem wanem? Hem i no bin lavem olgeta? Afta mi tingting i gobak long wanem mifala i bin tokbaot long klas blong Ol Yang Woman mo luksave se, yes, Hem i bin lavem olgeta. Hem i bin save mo lavem olgeta wanwan. Olgeta we oli bin ded long dei ia, evriwan oli ol pikinini blong God. Long stat, i bin mekem mi harem nogud moa taem mi tingbaot samting ia. Be afta, mi bin luksave se ol pipol ia oli bin stap long spirit wol mo oli save gobak long Papa long Heven bakegen. Tingting ia i bin leftemap tingting blong mi mo givim mi wan filing blong pis.
Mi save se mi wan pikinini blong God, mo olsem wanem mi impoten. Yumi evriwan i pikinini blong Papa blong yumi long Heven, we i save gud yumi wanwan. Hem i lavem yumi wetem wan lav we i moa dip mo strong moa bitim we yumi save tingbaot. Save ia, mi bin plantem dip insaed long hat blong mi taem mi bin wok wetem mo givim seves long medel blong ol pipol we oli bin safa gud long etkwek long Sijuan.
Asli Daeia (raet) i bin help blong bildim bakegen ol hom blong olgeta we oli stap long Sijuan afta 2008 etkwek, hemia long Jaena.
Asli Daeia i givim foto wetem glad