Wik blong Ista

Yu save rere from Ista taem yu stap lanem abaot wanem we i bin hapen long wik bifo Jisas Kraes i bin krusifae mo laef bakegen long ded. Stat long eit dei bifo Ista, ridim ol samting we oli hapen mo ol ves blong skripja we oli listim blong wanwan dei.

Satedei

Wan impoten dei we oli singaotem Pasova, hem i afta sikis dei we bae i kam. Plante pipol i bin stap kam long Jerusalem blong oli save givim ol sakrifaes long tempol long dei ia. Jisas i bin wokbaot i go long Betani, wan vilej kolosap long Jerusalem. Bae hem i stap longwe blong faef naet wetem ol fren blong Hem, Lasaros, Meri, mo Mata. Meri i bin anoentem ol leg blong Hem wetem oel.

Luk long Jon 12:1–3.

Sandei

Jisas i bin wokbaot stat long Betani i go long Jerusalem. Hem i sidaon long wan donki mo go insaed long siti, olsem wan ves long OlTesteman i talem se bae i hapen olsem. Pipol i luksave Hem olsem king blong olgeta, mo singaot, “Hosana,” mo putum daon ol lif blong tri long fored blong konki blong blokem das i no go long Sevya. Jisas i bin visitim tempol mo gobak long Betani.

Luk long Sekaraea 9:9; Matiu 21:1–11; Mak 11:1–11.

Mandei

Jisas i bin luk ol pipol oli stap pem mo salem ol samting long tempol. From se Hem i wantem tempol blong i kam wan “haos blong prea,” Hem i ronemaot olgeta. Afta, hem i hilim ol pipol we oli no save wokbaot o oli blaen. Ol pris we oli jalus oli bin kros long Hem.

Luk long Matiu 21:12–17; Mak 11:15–19.

Tiusdei

Jisas i bin tijim ol pipol long tempol mo long wan hil kolosap we oli singaotem Hil blong Olif Tri.

Ol pris oli bin plan blong kilim Jisas. Wan long ol disaepol blong Hem, Judas Iskariot, i bin agri blong givim Jisas long wan praes blong 30 silva koen.

Luk long Matiu 25:31–46; 26:14–16.

Wednesdei

Ol skripja oli no talem wanem Jisas i bin mekem long dei ia. Ating Hem i spendem dei ia wetem ol disaepol blong Hem. Yu save ridim parabol blong ol ten yang gel, wan stori we Jisas i bin tijim long ol disaepol blong hem blong helpem olgeta blong oli rere from Seken Kaming blong Hem.

Luk long Matiu 25:1–13.

Tosdei

Ol disaepol blong Jisas oli bin rere long dei blong lafet blong kakae bred we i no gat is long hem (Pasova). Long taem blong Pasova, Jisas i bin talem long ol disaepol se wan long olgeta bae i spolem Hem. Afta, blong helpem olgeta blong tingbaot Hem, Hem i bin givim long olgeta sakramen; hemia hem i fas taem. Jisas i bin go long Garen blong Getsemane blong ded from ol sin blong yumi mo prea long God. Ol pipol oli bin kam wetem ol naef blong faet mo oli arestem Hem. Ol disaepol oli bin fraet mo oli ronwe.

Luk long Matiu 26:17–29, 36–56.

Fraedei

Oli bin tekem Jisas i go long hae pris, Kaeafas. Disaepol blong Jisas we i Pita i bin giaman se hem i no save Jisas. Gavna, Paelat mo Herod, oli bin askem ol kwestin long Jisas. Oli bin talem se Jisas i rong mo panisim Hem blong ded long kros. Oli bin nilim Jisas long kros. Wan rij man, nem blong hem Josef, i bin putum Jisas i ledaon long gref blong hem we i stap long hol blong ston. Mama blong Jisas, Meri mo Meri Magdala i bin visitim gref long hol blong ston.

Luk long Matiu 26:57–72; 27:1–2, 27–37; Luk 23:44–46, 50–56.

Satedei

Bodi blong Jisas i ledaon i stap long tum. Wan bigfala ston i stap long fored blong doa. Ol rabis pris oli bin askem Paelat blong gat ol gad oli stanap aotsaed long tum blong mekemsua se i no gat man i go insaed.

Luk long Matiu 27:57–66.

Ista Sandei

Jisas i bin laef bakegen long ded! Hem i bin girap mo nomo stap long tum. Wan enjel i kam daon long heven mo muvumaot ston ia.

Jisas i bin talem long ol disaepol blong Hem blong tijim mo baptaesem ol narafala man mo Hem i bin promes blong stap wetem olgeta oltaem.

Luk long Matiu 28.

Foto i kam long Matiu Reia; antap, stat long lef saed: Jisas I Go Aot long Betani long Naet i kam long Jemes Tisot; Kraes I Bin Go Insaed long Jerusalem Wetem Viktri, i kam long Hari Andison © IRI; Hiling blong Man we I Blaen, i kam long Hari Andison, mo yusum wetem raet blong Pacific Press Publishing, Inc., no mekem kopi; Voes we I kam long Heven, i kam long Jemes Tisot; smol pat blong pikja ia Faef long Olgeta Oli Bin Waes, i kam long Wolta Ren, wetem raet we i kam long Jos Histri Miusium; Kraes long Getsemane, i kam long Hari Andison © IRI; smol pat blong pikja ia Taem Oli Nilim Kraes long Kros, i kam long Hari Andison © IRI; Taem Oli Berem Kraes, i kam long Kal Henrij Bloj, yusum wetem raet blong Nasonal Histri Miusium long Frederiksborg long Hilerod, Denmark, no mekem kopi; andanit: Hem I Laef Bakegen long Ded, i kam long Del Pason