Tingbaot Olgeta we Oli Gat Wan Gudfala Laef
J. Ruben Klak Junia: Wan Man Wetem Ol Spesel Presen
Josua Ruben Klak Junia i bin bon long Gransvil, Yuta, long 1 Septemba 1871. Nomata we hem i kasem smol edukesen nomo mo i no bin save go long hae skul, mama blong hem i stap tijim hem, mo hem i laekem blong lanem samting. Hem i graduet olsem faswan long klas blong hem long Yunivesiti blong Yuta wetem wan digri long saed blong saens mo i gohed blong kasem wan loa digri long Yunivesti blong Kolombia loa skul long Niu Yok Siti.
Brata Klak i bin maredem Luasin Aneta Savaj long Sol Lek Tempol long 1898, mo tufala i kam papa mo mama blong fo pikinini.
Wetem loa digri blong hem ia mo wan smat maen, J. Ruben Klak Junia i kasem wan wok long wan loa mo sosol seves kampani we oli save gud long hem, we i bin mekem se oli nemem hem i kam ambasada blong Yunaeted Stet i go long Meksiko long 1930. Wok ia i en, taem oli bin sastenem Brata Klak olsem Seken Kaonsela long Presiden Hiba J. Grant long Fas Presidensi long 6 Epril 1933. Nomata we hem i wan hae pris long taem ia, hem i no wan Jeneral Atoriti. Oli bin odenem hem wan Aposol semtaem we oli sastenem hem i kam olsem Fas Kaonsela long Presiden Grant long Oktoba 1934. Presiden Klak i gohed blong stap olsem wan kaonsela long Presiden Joj Albet Smit mo Presiden Deved O. MaKei.
Long medel blong plante kontribusen blong hem long Jos, wan we i moa defren hem i eksampol blong fasin blong gat tingting we i stap daon we hem i bin setemap taem Deved O. Makei i bin kam Presiden blong Jos. Hem i bin singaotem Presiden Klak blong kam Seken Kaonsela blong hem. From Presiden Klak i bin sev olsem Fas Kaonsela long ol Fas Presidensi fastaem, sam oli ting se hem i harem nogud smol, be Presiden Klak i bin eksplenem se: Taem yu mekem wok blong Lod, hem i no weaples yu bin givim seves long hem we i impoten, be hem i olsem wanem nao yu bin givim seves. Long Jos blong Jisas Kraes blong Ol Lata-dei Sent, wan i tekem gud ples we oli bin singaotem hem long hem, ples we wan i no askem o i no save talem no long hem.”1
Presiden Klak i bin ded long 6 Oktoba 1961.
Fas Presidensi long 1945 (long lef): J. Ruben Klak Junia, Hiba J. Grant, mo Deved O. MaKei.
Presiden Klak (lef) wetem Lamon Toronto, misin presiden.