Long En Mi Bin Lisin
“Hem i wan olfala fren, mo hem i no wan deit,” mi bin talem long miwan. Be from wanem Spirit i gohed blong stap talem long mi blong no stap long ples ia?
Long sekendri skul, mi bin gat blesing wetem wan jalenj blong mekem praktikol blong mi long wan taon we i stap longwe long hom. Wan olfala fren blong mi i bin stap kolosap long ples ia, mo nomata mitufala i no serem sem fet, wanem we mitufala i defren long hem i no bin stopem mitufala blong stap olsem ol gufala fren.
Taem mi mitim Madelin blong fas taem (oli bin jenisim nem), mitufala tugeta i bin wok wetem ol nara yang woman we oli bin wan gudfala eksampol blong Ol Lata-dei Sent. Mi bin tingbaot Spirit i bin poenemaot ol smosmol samting we i defren bitwin wanwan yang woman ia, i bin eksplenem olsem wanem se ol smol joes tu, oli save putum wan rod i stap blong folem afta long laef. Mi bin tingbaot ol filing ia long saed blong spirit blong plante yia.
Naoia we mitufala i bin mit afta long plante yia, Madelin mo mi i bin mekem plan blong go aot tugeta long wan taem. Taem naet ia i kam, mi sapraes we mi bin fraet tumas. Mi bin tekem wan tren i go long taon blong hem, mo taem mi stap kam moa kolosap, wan voes insaed long maen mo hat blong mi i talem se, “Yu nid blong deitem olgeta nomo we oli gat ol hae standet.”
“Hemia i no wan deit,” mi bin tingting. “Mi jes go luk wan olfala fren nomo.” Spirit i ripitim woning ia, i pusum mi kasem taem we mi haremsave se i tru, hem i bin wan deit mo mi stat blong tingting long ol standet mo laef stael blong fren blong mi naoia. “Hem i save se mi mi wan LDS,” mi traem blong talem long tingting blong mi. “Hem i save long standet blong mi, mo bae i no gat wan problem.”
Be, mi bin stap tingting se ating “ol samting we i defren” long mitufala we mi bin luksave bifo i bin mekem rod blong mitufala i go wanwan bitim wanem we mi bin tingting long hem. Mekem se mi folem smol voes blong Spirit, mo singaotem fren blong mi blong kanselem plan. Mi bin fraet tumas blong mekem hem i harem nogud. Olsem wanem mi save eksplenem wok blong spirit long wan fren we i no laekem misin blong Tabu Spirit?
Mi bin eksplenem se mi no bin filim gud long wan long ol aktiviti we mifala i bin plan blong mekem long naet ia mo mi hop se hemia bae i givim mi wan gudfala risen blong no save go aot long naet ia. Hem i harem nogud mo i givim wan tingting blong jenisim plan blong mifala. Mi harem olsem we mi laef bakegen mo mi agri long jenis ia from mi ting “Ating from aktiviti ia nao i mekem se Spirit i stap wonem mi.” Be wari we mi bin filim i no bin go.
Mifala i bin gat gudfala taem long naet ia, be long wanwan taem, Spirit i bin talem long mi, woning we mi bin kasem fastaem finis i impoten. Long fas ples, i luk olsem i no gat wari, be taem naet i stap gohed, i klia se nating we mitufala i kamaot long semfala ples, mitufala i stap go long ol daereksen we i defren olgeta. Ol standet blong mitufala oli no bin semmak—i go kasem ol smol samting. Taem hem i putum oda from waen, mi eksplenem se bae mi no save pem alkol. Hem i respektem tingting blong mi mo i bin pem blong hemwan.
Wari blong mi long saed blong spirit i bin gohed blong gro taem naet ia i stap gohed. Taem dina i finis, mi stap long en blong jea blong mi, rere blong go, from mi save se lasfala tren blong naet bae i go i no longtaem mo mi stap longwe tumas blong tekem wan taksi. Fren blong mi i luksave wari blong mi mo i talem se mi save silip long ples blong hem. Naoia Spirit i nomo save lego mi, i konfemem wanem mi bin save finis: blong stap hem i no wan tinging blong folem.
Taem mi wokbaot wetem hem blong go lego hem long haos blong hem, mi bin wokhad blong luk se evri samting i oraet. Hem i askem, “yu sua se yu no wantem stap?” Mi bin sua. Hem i no bin fos o kros, be Spirit i bin toktok kwaet nomo mo i bin moa klia bitim saon blong tanda. Bae mi no save mestem tren blong mi!
Mi bin wet kasem taem we mi save hem i stap insaed, afta mi ron kwik wetem evri paoa blong mi blong kasem stesen blong tren long stret taem. Long taem ia, mi stap tingting long Josef long Ijip taem hem i ronwe long temtesen (luk long Jenesis 39:7–12).
Taem mi tingtingbak long ol samting we oli bin hapen long naet ia, mi filim tugeta samting ia, fraet mo tankyu: fraet from wanem bae i save hapen, mo tangkyu long kompanionsip blong Tabu Spirit. Spirit i bin toktok, mo nomata mi sapos blong lisin long hem finis long stat, mi glad se long en mi bin lisin.
Hem i bin klia se lukluk blong mi long situesen blong naet ia i no bin klia olsem we Lod i bin luk lia long hem. Olsem Aesaea i bin rekodem:
“Hae God i talem se, tingting blong mi i no olsem tingting blong yufala,mo fasin blong mi i no olsem fasin blong yufala.
“Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala” (Aesea 55:8–9).
Sam joes yumi fesem long laef,yumi mekem kwik mo yumi fogetem. I gat ol nara joes we oli kam wetem ol lesen taem yumi mekem gud bae yu neva fogetem. Mi glad tumas blong save se taem yumi harem save mo folem voes blong Tabu Spirit—mo taem yumi mekem kwiktaem—bae i moa isi long yumi blong save stap long rod we Jisas Kraes i bin soem long yumi blong folem.
Pikja i kam long Jef Wod