Wan Kavenan I blong Oltaem
Taem hem i abaot ol desisen we mi bin mekem olsem pat blong wan kavenan wetem wan Papa long Heven we i lavem mi tumas, hem i no mata wanem nao wol i talem.
Taem mi bin wan yang gel, Yang Woman presiden blong mifala i givim wan presen long wanwan yang woman: wan pikja blong tempol. Hem i tokbaot ol kavenan long mifala mo laef long wan klin laef. Afta hem i leftemap tingting blong mifala blong putum wan gol blong go long tempol wan dei.
Mi bin tekem kaonsel blong sista ia long hat blong mi mo disaed blong mekem taem blong stap rere i kam faswan long lis blong mi. I no bin gat wan tempol long Kosta Rika long taem ia, be mi bin save long baptaes blong mi wanem nao hem i wan kavenan, mo mi luk fored long wan janis blong mekem moa kavenan wetem Lod.
I no gat wan memba blong famle blong mi i wan memba blong Jos long taem ia, mekem se oli no tijim gospel long hom blong mifala. Yet, mi disaed se mi save lanem abaot ol gospel standet miwan mo folem olgeta. Fasin blong mi blong rere i minim tu blong atendem seminari, nomata we oli holem eli long moning. Hem i gat tu blong no deit go kasem we mi gat 16 yia. Mo i minim blong kipim loa blong jastiti—i tru i no wan samting we i popula o we ol fren blong mi oli save long hem, be i wan samting we mi save se mi save mekem from mi bin mekem kavenan wetem Lod se bae mi mekem.
Stap stadi long olgeta skripja, tugeta long seminari mo miwan, i givim strong tingting long mi blong laef long laef we i gat klin fasin mo klin tingting. Mi tingbaot taem mi bin kasem insperesen speseli abaot ol 2000 yang boe blong faet. Olsem long Alma 53:20–21 i talem, ol yang man ia “oli strong long taem blong faet, mo tu long paoa mo oli no les long wanem oli mekem; be luk i no hemia nomo—oli ol man we oli bin tru long evri taem long eni samting we ol lida blong olgeta blong ami i trastem long olgeta blong mekem. … Oli bin ol man we oli ones mo oli tru, from we ol papa mo mama blong olgeta i bin tijim olgeta blong holem ol komanmen blong God mo blong wokbaot stret long fored blong hem.” Mi tu, mi wantem blong stap fetful long ol samting we oli trastem mi blong mekem, olsem ol kavenan blong baptaes blong mi tu.
Mi kam blong andastanem moa long ol kavenan taem oli bin singaotem mi blong go long El Salvador Is Misin. Taem mi bin kasem endaomen blong mi long tempol, Doctrine and Covenants 82:10 i kam long maen blong mi, se Lod i no save mekem wan samting taem yumi mekem wanem Hem i talem; be taem yumi no mekem wanem Hem i talem, yumi nogat wan promes. Truaot long misin blong mi, aedia ia blong ol kavenan—abaot yumi mekem pat blong yumi mo Hem i mekem pat blong Hem—i mekem mi wantem mekem evri bes blong mi. Taem mi bin mekem olsem, mi mo ol kompanion blong mi i bin kasem blesing long ol wok blong mifala.
Misin blong mi, hem i bin longtaem finis, be mi gohed blong faenem paoa taem mi stap gohed blong stap kipim ol kavenan blong mi. Mi bin kasem blesing blong givim seves blong seven yia long San Jose Kosta Rika Tempol. Blong givim seves olsem wan wokman blong tempol i bin givim mi oltaem ol janis blong tingbaot ol kavenan we mi bin mekem. Mi bin faenem ol sem samting taem mi givim seves long oganaesesen blong Ol Yang Woman, mo mi traem blong tijim, long oganaesesen ia, ol kavenan we oli impoten olsem we ol lida oli bin tijim mi.
Blong stap kipim ol kavenan blong yumi, i no oltaem isi. Eksampol, plante pipol oli luk loa blong jastiti (o, long sam ples, praktis blong relijin) olsem nating nomo. Laki, from mi no filim se olgeta we oli nogat sem bilif long mi o taem we i stap pas oli givim moa hadtaem long mi. Mi lukbak long wanem we mi bin filim olsem wan yang woman taem lida blong mifala i leftemap tingting blong mifala blong rere mo laef long wan wei we i save mekem mifala i kasem ol tempol kavenan. Desisen we mi bin mekem long taem ia, i hemia we mi stap folem kam kasem tedei.
Mi save stanap strong long ol desisen blong mi from oli no ol desisen we mi mekem miwan, o blong miwan. Be, oli ol desisen we mi bin mekem olsem pat blong wan kavenan wetem wan Papa long Heven we i lavem mi tumas. I nomata wanem wol i talem. Mi bin promesem Lod se bae mi obei ol komanmen blong Hem. Hem i poen blong givim ona. Ol kavenan we mi bin mekem long baptaes mo ol kavenan we mi bin mekem long tempol oli laef yet semmak olsem long dei we mi bin mekem olgeta. Wan kavenan wetem God hem i blong oltaem.
Blong stap laef long wei we God i askem yumi blong laef folem i no isi oltaem, be mi testifae se i posibol. Yumi save kasem tras mo paoa taem yumi laef folem ol kavenan blong yumi, mo yumi save tru se Papa long Heven bae i neva livim yumi stap yumiwan. Wetem Hem long saed blong yumi, yumi save mekem evri samting (luk long Moronae 7:33).
Ol kavenan we mi bin mekem long baptaes mo ol kavenan we mi bin mekem long tempol oli laef yet olsem long dei we mi bin mekem olgeta.
Ol pikja oli kam long Skot Gria