“From wanem famle blong mi i gat ol problem nomata we mifala i stap go long jos, gat famle haos naet, mo traem blong laef folem gospel? Wanem moa mifala i mas mekem?”

Blong stap laef folem gospel i karem blesing i kam, be i no minim se bae yu no fesem ol jalenj. Ol hadtaem oli save mekem fet blong yu i kam strong taem i lidim yu blong askem help blong Papa long Heven. Taem yu winim ol problem wetem help blong Hem i tijim yu olsem wanem blong mekem ol joes we i gud mo i stret.

Yu bin tokbaot situesen ia olsem wan famle? Taem yufala i toktok raon tugeta, yu save faenem ol tingting we oli save help. Yufala i bin prea mo livim kakae olsem wan famle blong kasem ol ansa? Yufala i stadi long ol skripja mo ol toktok blong konfrens? Ating famle blong yu i nidim blong mekem sam jenis blong mekem situesen i kam gud moa, o ating yu nid nomo blong holemtaet, mo wet wetem tingting i stap daon mo gat tras se Lod bae i helpem yu long ol taem blong hadtaem (luk long Mosaea 24:15).

Sapos ol narawan oli mekem famle blong yu oli harem nogud, traem blong fogivim olgeta be no blemem olgeta. Fogivnes i no save stretem problem kwiktaem, bae hem i karem pis i kam mo mekem problem i kam moa isi blong lukluk long hem.

Setan i stap atakem ol famle from paoa blong olgeta i impoten tumas long Jos mo long komuniti. Mekem se, stanap strong oltaem. Go long Jos oltaem, gat famle haos naet, mo laef folem gospel. Fasin blong stap obei i helpem yu blong filim Tabu Spirit, mo hem i save lidim yu blong faenem ol ansa we yu stap lukaotem. Laef long wan strong famle, iven wan famle blong winim ol problem, hem i wan long ol moa impoten gol we yu save gat.

Yusum Ol Gaed We Oli Bin Givim Long Yumi

Ating wan famle i no save kam strong kasem taem we hem i kasem hadtaem. Laki nomo se yumi no save fesem ol hadtaem blong yumi yumiwan; Papa long Heven i wantem yumi blong yumi kam antap yumiwan mo olsem ol famle. Blong helpem yumi, Hem i givim long yumi ol impoten tul blong lidim yumi, olsem ol skripja, wan profet we i laef, ol nara lida blong Jos, mo Tabu Spirit. Oli save helpem yumi andastanem mo laef folem ol gospel prinsipol we bae i save karem glad i kam long yumi mo ol famle blong yumi. Antap long hemia, neva fogetem blong talem long papa mo mama blong yu se yu glad mo lavem olgeta. Mi save se Lod bae i rere long wan rod blong famle blong yu blong kam wan, stap strong, mo kam antap. Mi save God i odenem famle.

Jared L.,18 yia, Mindanao, Filipins

Akseptem Tingting blong Papa long Heven

Mi ting se wan wei we Papa long Heven i traem yumi, hem i tru long ol problem. Wanem yumi no mas fogetem hem i we, Hem i Papa blong yumi mo from samting ia, Hem i lavem yumi tumas mo mekem se Hem i wantem wanem i gud long yumi. Mi save se wan wei nomo blong winim ol problem, hem i blong stanap strong mo akseptem tingting blong Papa.

Jose K., 18 yia, Ankas, Peru

Lanem Samting Long Ol Hadtaem blong Yu

Nomata hamas yu traehad, bae i gat jalenj oltaem nomo. Ol hadtaem ia oli blong helpem yumi yumi blong yumi gro. Hem i dipen long olsem wanem yu tekem aksen long ol jalenj ia. Ki, hem i blong lanem samting aot long olgeta jalenj ia. Tekem wan step i gobak mo luk wanem i stap go raon long yu. Prea from hadtaem we yu stap fesem mo gat fet se Lod bae i helpem yu blong gotru long olgeta. Oli save kam olsem wan paoa long yu, mo yu yu save kam wan paoa long ol narawan.

Makensi K.,18 yia, Jihuahua, Meksiko

Ridim Famle Ofisol Toktok

Ol problem oli kam nomata yu talem prea blong yu o no. Oli no blong panisim yumi be blong mekem yumi strong. Ol problem yumi fesem long laef oli givim wan janis long ol famle blong wok tugeta. Taem famle blong mi i go tru long ol problem blong mane, mo wantem nomo blong faenem taem blong stap tugeta, mifala i kam moa kolosap long mifala wanwan mo Papa blong mifala long Heven.Wan samting we mifala i mekem long taem blong ol hadtaem, hem i blong ridim “Famle: Wan Ofisol Toktok I Go Long Wol.” I mekem mifala i tingbaot tabu rilesensip we mifala i serem mo olsem wanem i impoten blong kipim ol kavenan blong mifala.

Ana G.,15 yia, Jojia, YSA

Gat Fet long Lod

Wanem i helpem mi taem mi askem kwestin from wanem famle blong i gat problem, iven taem yumi mekem evri samting yumi save mekem, hem i stori blong Job mo hamas hem i bin go tru. Job 19:25–26 i rid: “Be mi mi save we God i stap long heven. Mo biaen, hem bambae i kam, i tok long saed blong mi blong talemaot we mi mi stret. Nating we sik i spolem skin blong mi finis, be long bodi ya blong mi bambae mi mi luk hem.” Job i bin fesem sam long ol bigfala jalenj, mo yet hem i save se Ridima blong hem i laef! Taem yumi save tingting mo laef olsem Job i bin mekem, mi save se bae yumi save winim ol problem mo luk se yumi gat wan Ridima, we hem i stap leftemap yumi tru long ol hadtaem ia.

Megan B., 17 yia, Yuta, YSA

Fesem Ol Problem Wetem Hop

Ol problem oli mekem yumi kam moa strong taem yumi fesem wetem stret fasin. Wanem yu nid blong mekem i blong fesem problem wetem hop mo strong paoa long tingting. Bae yu traem blong mekem gud blong kam long jos mo traem blong laef folem gospel, mo save se tru samting hem i we ol problem blong yu oli blong mekem yu i kam klin gud mo mekem yu yu kam gud moa long en. Traem tu blong luksave wanem we yu yu no stap mekem gud mo wokhad blong mekem gud. Traem oltaem blong helpem ol narawan, mo taem yu mekem, ol problem blong yu bae oli nomo hevi tumas. Antap long evri samting ia, toktok wetem Lod oltaem. Prea abaot ol problem blong yu mo askem Papa long Heven blong i lidim yu.

Remon A., 18 yia, Akra, Gana

Stanap Strong Kasem En

Famle hem i stamba blong plan blong krieta, mekem se Setan bae i mekem evri samting blong stopem yumi blong laef tugeta olsem wan famle we i hapi mo i tingting strong long gospel. Yumi save se bae yumi no save tingting se laef bae hem i isi, o se taem yumi go long jos mo gat famle haos naet, laef bae i fri long temtesen. Taem ol samting oli kam had, ridim ol skripja blong yu, prea, mo toktok olsem wan famle.

Elda Dadle, 21yia, Indonesia Jakata Misin