Seil I Go Stret long Ol Marsol Aelan
Taem yumi seil i go tru long ples we solwota i rafraf, wanwan long yumi i risivim givhan blong ol memba we oli fetful blong helpem yumi save gobak long hom blong yumi long Heven.
Ol olfala seila i bin folem san, mun mo ol sta blong gaedem olgeta. Long naet oli kipim ae blong olgeta i stap oltaem long Not Sta, posisen we i stap long hem i soem wan angka long skae blong ol seila, we i helpem olgeta blong seil folem wan stret rod i go kasem ples we oli wantem kasem.
Long Ol Marsol Aelan long Bigfala Si blong Pasifik, ol seila oli bin faenem wan nara teknik. Longwe, ol defren wei we wef i ron, o i kam antap, mo i ron bitwin ol smol aelan mo ol bigfala aelan long wan wei we i semmak. Wan seila we i kasem gud trening i save travel plante handred mael taem hem i folem ol defren kaen paten blong wef —wanwan i olsem wan wei rod—long wan aelan i go long nara aelan. Olgeta we oli save se ol wef ia oli stap wea mo oli stap go wea, i save lidim ol nara travela blong go sef long ol ples blong olgeta.
Blong ol memba blong Jos, Jisas Kraes i eksampol blong yumi we i stret evriwan, we stret laet ia blong Hem nao i stap givhan long yumi. Ol loa mo odinens blong Hem, olsem ol wef we oli stap kam antap, i save lidim yumi i go sef long hom blong yumi long heven. Be blong yumi evriwan, i gat ol narafalawan, we wok blong seves mo sapot blong olgeta oli wok tugeta wetem rol blong Masta blong sip. Insaed long ol stori ia, tri memba blong Marsol Aelan oli serem olsem wanem ol naraman oli bin helpem olgeta blong gotru long ol wota ia we oli fulap long ston mo strong win we i lidim olgeta oli kam long Kraes.
Paoa blong Wan Woman we I Stret Mo Gud
Hirobo Obeketang i sidaon long jea blong hem mo smael. Hem mo waef blong hem, Linda, i jes finis long famle haos naet wetem ol fo pikinini blong tufala mo ol sista misinari. Oli bin gat wan naes fis dina wetem ol misinari, wan ful fis we oli endem wetem ol ae mo tel blong hem— we i olsem wan kastom long Majuro we i kapitol blong ol Marsol Aelan. Taem Hirobo i tokbaot laef blong hem, hem i talemaot olsem wanem hem i glad from Jos, gospel, mo famle blong hem, speseli waef blong hem.
Hemia long Jun 2009. Wan dei afta we oli krietem Stek blong Marsol Aelan, oli bin singaotem Hirobo blong stap olsem fas stek eksekutiv sekretari. Hirobo, olsem we niu stek presiden Arlington Tibon i tokbaot hem, “i strong tumas,” wan long ol fetful lida long aelan.
Be Hirobo i faswan blong talemaot se bifo hem i no bin olsem. I tru, hem i presem waef blong hem moa se hem nao hem i strongwan—hem nao i bin mekem se laef blong hem i defren tedei. Hem i eksplenem, “Mi bin baptaes taem mi bin gat eit yia, be taem mi kasem 16 yia, mi nomo kam aktiv tumas.”
Sam yia afta, hem mo Linda i bin stat blong stap tugeta, nomata we tufala i no bin mared. Linda i no bin wan memba blong Jos. Long yia 2000, i no longtaem afta we Linda i bin faenem se Hirobo i bin baptaes olsem wan pikinini, hem i stat blong gat intres long Jos mo stat blong mitim ol sista misinari.
“Hem i bin stadi blong tu yia mo disaed se hem i wantem blong kasem baptaes,” Hirobo i talem. “Mitufala i mas mared fastaem, be mi no bin intres blong mared. Mi bin konfius; mi bin stap long wol ia blong ol temtesen. Mi no bin andastanem se famle i impoten, mo mi no bin kea tumas o mi no bin wantem lisin long wan man.”
Linda, nomata hem i no baptaes yet, i bin lukaotem ol pikinini mo tijim olgeta long ol wei blong Jos. Evri yia hem i askem Hirobo blong maredem hem mekem se hem i save kasem baptaes; evri taem hem i talem no. Sam yia afta, tu long ol gel blong hem, tufala i bin baptaes, be Hirobo i no bin stap long baptaes blong tufala.
Afta, long yia 2006, boe blong tufala we i gat naen yia, Takao, i bin ded from wan strok mo strong fiva. Kolosap 300 memba blong Majuro distrik i bin kam long fenerol blong sapotem famle ia.
“Sapot blong olgeta i bin wan bigfala samting long mi,” Hirobo i talem. “Mi bin stat blong tingting se God i mas traem blong talem wan samting long mi.”
Hem i stat blong tingting se ating hem i risen from wanem nao waef blong hem i no save baptaes, nomata we hem, Hirobo, i wan memba blong Jos. “Hem i stap kam strong mo moa strong. Hem i rili givim insperesen long mi,” hem i talem.
“Mekem se mi sidaon mo tingbaot olsem wanem mi bin go tru haf wei long laef blong mi finis. Mi bin askem miwan, ‘Bae mi gohed blong mekem wanem we mi stap mekem naoia? Mi gat wan janis blong wok blong God long seken haf blong laef blong mi?’ Mi bin stat blong mekem ol prea blong mi mo tingting blong kambak long jos blong stat wok blong God.”
Hirobo i stat blong stadi wetem ol misinari mo lanem bakegen doktrin. Presiden Nelson Blik blong Masol Aelan Majuro Misin i bin kam fren blong hem, semmak wetem ol memba mo presiden blong distrik, Arlington Tibon. Long en, Hirobo i komitim hemwan blong kambak, mo nekis samting we hem i bin save, hem i no jes atendem sakramen miting nomo, be Sandei Skul tu mo prishud miting. Laswan, Hirobo i kam antap long wan tingting.
“Taem mi bin kambak, mi bin talem, ‘Hemia nao. Hemia nao wanem bae mi mekem.’ Mo i bin jenisim fulwan laef blong mi.”
Hirobo mo Linda i bin mared long 30 Ogis 2008. I no longtaem afta, hem i kasem Aronik Prishud mo baptaesem waef blong hem. Tu manis afta, Hirobo i bin kasem Melkesedek Prishud mo oli bin singaotem hem olsem distrik eksekutiv sekretari.
Hirobo i luk waef blong hem mo smael. “Hem i no bilivim se mi nao mi bin baptaesem hem,” hem i talem. “Traem tingbaot—i tekem waef blong hem eit yia, stat long yia 2000 kasem yia 2008. Mi sapraes tumas long hem.”
Eksampol blong Wan Papa we I Stret Mo Gud
Samtaem gaed blong yumi, olsem wan seila, i wok kolosap wetem yumi blong helpem yumi long wanem we yumi nidim blong save blong mekem se yumi save gotru long laef wetem sakses. Plante taem, seila i mekem gud hemia taem hem i stap soem gud eksampol blong yumi folem. Hemia i semmak wetem Frank, papa blong Patrisia Horiuji.
Afta we hem i mitim ol misinari, Frank i gohed blong invaetem olgeta oltaem blong kam dina. I no longtaem hem i stat blong tekem ol lesen. Be i no gat wan nating long famle blong hem i intres long Jos. “Taem mifala i luk ol misinari oli kam,” Patrisia i talem, “bae mifala evriwan i ronwe—mi mo ol yang brata mo sista blong mi.”
Afta, Frank i bin baptaes long Julae 2007 mo misin presiden Nelson Blik nao i mekem baptaes blong hem. I bin wan taem we ol samting i klia long Patrisia mo ol brata mo sista blong hem.
“Mi bin luk papa blong mi i stat blong jenis,” hem i talem. “Mi bin save se sapos gospel i save tajem hat blong papa blong mi, i save tajem hat blong mi mo jenisim laef blong mi. Mekem se mi disaed blong stadi long Buk blong Momon mo Baebol. Brata blong mi mo mi i bin gat wan faet bifo long hemia, mo mi neva fogivim hem. Afta mi bin ridim ol skripja se sapos yu fogivim ol narafala man, bae God i fogivim yu.” (Luk long 3 Nifae 13:14–15.)
Patrisia i luksave se hem i mas fogivim brata blong hem blong mekem se hem i save statem blong jenisim laef blong hem, kam klin, mo gat pis. Mo hem i bin mekem.
“Afta we mi bin sakemaot ol rabis fasin blong mi mo jenis i kam long wan niu woman we i stap obei ol komanmen, mi bin glad tumas. Mi bin save se mi mas baptaes blong mi save stap long tru Jos,” hem i talem. “Jos i putum mi long stret rod. I seperetem mi long ol rabis samting we oli bin stap spolem mi. I bin tijim mi blong respektem papa mo mama blong mi, blong stap long skul, mo blong stap oltaem long stret rod.”
Paoa blong Wan Man we I Stret Mo Gud
Lidia Kaminaga, semmak olsem Hirobo Obeketang, i bin bon insaed long Jos, be, i nomo bin kam long Jos tumas taem hem i yangfala. Be stori blong wokbaot blong hem blong i kambak, i spesel mo impoten.
Lidia mo hasban blong hem, Kaminaga Kaminaga, tufala i bin groap insaed long Jos. “Mi neva gat tu tingting abaot ol tijing blong Jos,” Kaminaga i talem. “Mi bilivim olgeta oltaem.”
Be laef i bin defren blong Lidia. Taem hem i bin stap long yia seven, hem i talem, “Mi wan nomo long skul, mi wan Momon, mo mi filim se oli no intres long mi. Mi bin mekem wanem ol fren blong mi oli bin stap mekem. Wanem samting mi putum oli kam faswan, oli rong evriwan.”
Papa mo mama blong Lidia, tufala i bin sendem hem i go long Provo, Yuta, YSA, blong stap wetem ol famle, wetem hop se bae i save givim insperesen long Lidia blong laef folem gospel. Nomata hem i bin lanem ol samting we bae i helpem hem samtaem long laef, long taem ia hem i no bin intres blong kam gud long Jos.
Lidia i bin kambak long Marsol Aelan long Jenuware 2002, hemia wan manis stret afta we Kaminaga i kambak long misin long Japan. Tufala i mit smol taem afta. Nomata we Lidia i no bin laef folem ol standet blong Jos, Kaminaga i gohed blong kam long haos blong hem mo giaman blong kam visitim nifiu blong hem, Gari Sakius.
Afta sam taem, Kaminaga i kam antap wetem tingting blong toktok long papa mo mama blong hem blong tufala i save deit—long ol gud, mo klin aktiviti—wetem Lidia. Nomata oli stap traem blong talem long hem blong no deitem hem, Kaminaga i talem “talem long olgeta long en, ‘I gat wan janis yet blong hem blong jenis.’ Taem mi talem samting ia, filing insaed long rum ia i bin jenis. Papa blong hem i krae mo talem, ‘Oltaem mi wantem hem i kambak long Jos. Yu save traem.’”
Long fastaem Lidia i no tekem ol samting i series wetem Kaminaga. Hemia, from hem i wan misinari we i jes kambak we i luk klin gud, mo Lidia i no bin aktiv nating.
“Be hem i bin luk wan samting we mi no bin luk,” Lidia i ekskplenem. From we hem i no bin deitem wan man, Lidia i agri blong go aot wetem hem. “Hem i tekem mi kambak. Blong kam gelfren blong hem, mi nidim blong putum stret ol standet blong mi. Hem i mekem mi tingbaot ol kavenan blong mi we mi bin mekem long taem blong baptaes. Hem i mekem mi tingbaot plante samting we mi bin mestem plante, olsem ridim ol skripja mo famle haos naet. Kaminaga mo mi, mitufala i bin mekem ol seves projek tugeta. Mitufala i bin ridim Buk blong Momon. Mitufala i bin go long ol faeasaed. Hem i bin soem long mi olsem wanem blong laef long wan defren wei. Blong go long jos, i no blong go long sakramen miting nomo, be blong go long Sandei Skul mo Rilif Sosaeti tu.”
Taem tufala i spendem taem tugeta long ol deit we oli gud mo i leftemap tingting, laef blong Lidia i stat blong jenis mo testemoni blong hem i bin gro. Be, hem i gat sam samting yet blong stretem.
“I bin had blong kambak,” hem i talemaot. “Fasin blong sakem sin i no isi, be mi gat wan testemoni we i strong gud abaot fasin blong sakem sin. Long plante wei, deit blong mitufala hem i blong save gud moa wanwan long mitufala, mo, blong mi kambak long jos, blong luk ol samting long wan defren wei.”
“Hem i abaot rilesensip,” Kaminaga i talem.
Lidia mo Kaminaga i bin mared long 28 Novemba 2002. Wan yia afta, tufala i bin sil long Laie Hawae Tempol mo go long Brigham Yang Yunivesiti–Hawae. Naoia tufala i stap long Marsol Aelan wetem ol trifala pikinini blong tufala. Lidia i givim seves olsem Sandei Skul tija blong ol yang man mo yang woman long wod blong olgeta, mo Kaminaga i stap olsem presiden blong Ol Yang Man.
Olsem Hirobo, Patrisia, mo Lidia oli testifae, taem yumi praktisim fasin blong save wet longtaem mo fasin blong stanap strong mo stap lukaotem ol blesing blong Lod, plante samting i posibol. Olgeta we oli folem Sevya mo lisin long smol voes blong Tabu Spirit, oli save, olsem ol olfala seila we oli stap soem rod long ol travela blong go hom, mekem samting i defren long laef blong wan man.
Antap long lef: Hirobo Obeketang (i stap tu wetem famle blong hem long ol fas pej) i wok olsem wan hotel maneja. Andanit: Patrisia Horiuji i bin wan lida blong fas yang singgel adalt konfrens long Jun 2009 long Marsol Aelan (andanit long raet).
“Mi gat wan strong testemoni abaot fasin blong sakem sin,” Lidia Kaminaga i talem, luk long ples ia, hem i stap wetem hasban blong hem, Kaminaga, mo gel blong tufala, Welisa.
Ol foto oli kam long J. Peki, be nomo sapos oli raetem defren; foto blong seling bot © Getty Images