Givim Seves Insaed long Jos
“Evri Samting Ia I Blesem Mi”
Sapos hem i Satedei, bae yu faenem Elvira Guagliarelo i stap bisi blong wok insaed long kijin blong hom blong hem long Pueto Madrin, we i stap long ol so blong Ajentina Nuevo long Saot provins blong Jubut.
Hem i mesarem aot flaoa mo wota mo afta i pusum han from ol narafala samting blong kuk. Taem hem i wok hem i no toktok tumas, ol aksen blong hem oli toktok bigwan bitim ol toktok blong hem. I tru, hem i stap long wan wok blong Lod.
“Mi filim gud from mi save se mi stap mekem wan samting we i gud,” Sista Guagliarelo i talem taem hem i stap miksim ol samting we bae hem i kukum. Hem i tingting long Sevya taem hem i stap wok, i stap glad wetem tingting ia se risal blong seves blong hem bae i helpem ol narafala memba blong Jos blong oli tingbaot Hem.
Sista Guagliarelo, we i gat 82 yia, i laekem blong givim seves olsem wan visiting tija, help blong lidim miusik long wod blong hem, mo mekem bred blong oli yusum long odinens blong sakramen—wan koling hem i bin mekem gud blong kolosap 10 yia nao. Hem i rere long wan ful bred hemwan eli long wik finis, be long Satedei hem i setem taem i stap blong i mekem bred “speseli blong Jos nomo,” hem i talem. “Mi talem long miwan, ‘mi mas mekem bred, mo afta mi mas go long jos.’ Mi no wantem blong mestem.”
Taem helt blong hem i gud, hem i save go tu long tempol—mo mekem wan 20 aoa trip i go long Not long bas evri yia blong go long Buenos Aeres Ajentina Tempol.
“Sista Guagliarelo i stap hapi oltaem blong givim seves long evri wei we hem i save mekem,” bisop blong hem, Iesus Santos Gumiel i talem. “Ol wod memba oli save se oli save trastem hem. Nomata long yia blong hem, hem i fetful blong rere long bred evri Satedei mo blong kam long jos evri Sandei. Hem i wan gudfala eksampol.”
Sista Guagliarelo i bin mitim ol fultaem misinari long 1962 long Mar del Plata, Saot blong Buenos Aeres, taem hem i stap wok long wan haos blong silip we ol misinari ia oli stap long hem. Taem hem i luksave olgeta taem oli stap noknok long ol doa fiftin yia afta, we hem i bin muv i go long Pueto Madrin, hem i bin tekem ol lesen, i bin baptaes, mo i statem laef blong hem blong givim seves insaed long Jos.
Tedei hem i laef hemwan, be hem i no filim se hem i stap hemwan. Hem i gat ol skripja blong hem mo famle wod blong hem, mo hem i stap toktok wetem Papa blong hem long Heven oltaem tru long prea. Antap long hemia, hem i laekem kompanionsip blong Spirit, we Lod i bin promesem long olgeta we oli givim seves long Hem taem oli givim seves long ol narafalawan.1
“Evri samting ia i blesem mi,” Sista Guagliarelo i talem wetem wan smael. “Jos i putum yumi blong wok, mo hemia i mekem mi mi glad. Mi stap faenem glad oltaem blong givim seves long Papa blong yumi long Heven.”
Elvira Guagliarelo
Antap: foto i kam long Maekel R. Moris