Jisas Kraes I Sevya mo Ridima blong Mi

I kam long Ana Maria Koben mo Kristina Franko

Yu save yusum lesen ia mo aktiviti blong lanem moa abaot stamba toktok blong Praemeri long manis ia.

“Mifala i biliv we tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel” (Ol Toktok blong Bilif 1:3).

Wanem nao bae yu glad blong givim long wan we yu lavem tumas, tumas? Sevya blong yumi, Jisas Kraes, i lavem yumi tumas nao Hem i givim laef blong Hem blong yumi.

Papa long Heven i bin save se sapos yumi sin mo mekem ol mistek, bae yumi no save go stap wetem Hem bakegen. Mekem se Pikinini blong Hem, Jisas Kraes, i givim Hemwan blong kam Sevya blong yumi. Papa long Heven i bin jusum Hem blong sevem yumi from Hem wan nomo we i save laef long wan laef we i no gat sin.

Jisas i bin safa mo ded blong sevem yumi long ded mo sin blong yumi. Aksen blong lav ia oli singaotem Atonmen, yumi save sakem ol sin blong yumi, kasem fogivnes, mo kam klin mo klin gud olsem we Jisas i klin.

Jisas i bin krusifae mo ded, be afta tri dei Hem i bin laef bakegen long ded. Hem i laef bakegen! From Hem i bin laef bakegen long ded, yumi tu, bae yumi laef bakegen long ded. Hemia i minim se ol bodi blong yumi mo spirit bae i kam tugeta bakegen blong oltaem.

I tru, Jisas Kraes i Sevya mo Ridima blong yumi. Hem i eksampol we i stret evriwan blong yumi evriwan. Hem i bin tijim yumi olsem wanem blong mekem gud long yumi wanwan wetem fasin blong stap kaen. Hem i bin tijim yumi olsem wanem blong givim seves long wanwan long yumi. Hem i bin tijim yumi olsem wanem blong kam moa gud. Yumi no save mekem blong laef long wan laef we i stret evriwan olsem we Hem i bin mekem, be yumi save gobak stap wetem Jisas mo Papa long Heven, tru long fasin blong stap obei ol komanmen mo mekem bes blong yumi. Yumi nidim blong folem Jisas Kraes evri dei.