“8–14 Febwari. Doktrin mo Ol Kavenan 12–13: ‘Antap long Hed blong Yufala, Ol Wokman we Yumi Wok Tugeta,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“8–14 Febwari. Doktrin mo Ol Kavenan 12–13; Josef Smit—Histri 1:66–75,” Kam Folem Mi—Blong Wanwan Man, Woman mo Famli: 2021
8–14 Febwari
Doktrin mo Ol Kavenan 12–13; Josef Smit—Histri 1:66–75
“Antap long Hed blong Yufala, Ol Wokman we Yumi Wok Tugeta”
Josef Smit mo Oliva Kaodri, tufala i bin kasem sam moa save taem tufala i bin stap prea abaot ol trutok we tufala i bin lanem insaed long ol skripja (luk long Josef Smit—Histri 1:68). ?Olsem wanem nao bae yu folem eksampol blong tufala?
Raetemdaon Ol Filing mo Tingting blong Yu
Plante pipol raon long wol, maet oli neva harem abaot wan ples we oli singaotem Hamoni, Pensilvania. Be plante taem, Lod i bin jusum sam ples we i defren smol blong ol bigfala samting oli hapen insaed long kingdom blong Hem. Long wan ples we i gat plante tri, kolosap long Hamoni, long namba 15 Mei 1829, Jon Baptaes i givim kamkamaot, olsem wan we i laef bakegen long ded, long Josef Smit mo Oliva Kaodri. Hem i putum han blong hem antap long hed blong tufala mo i givim Aronik Prishud long tufala, i singaotem tufala “ol wokman blong mi” (Doktrin mo Ol Kavenan 13:1).
Blong Lod i tekem tufala i ol wokman semmak olsem Jon Baptaes, we i bin baptaesem Sevya mo i bin mekem rod i rere blong Hem i kam (luk long Matiu 3:1–6, 13–17), maet bae i wan situesen we i mekem tingting blong tufala i stap daon, maet i bigwan tumas long yufala yang man ia, we tufala i gat samples twante yia i ova. Long tetaem ia, Josef mo Oliva, oli no bin save gud tufala, semmak olsem we man i no save wea ia Hamoni. Be seves long wok blong God, oltaem hem i abaot hao yumi givim seves, i no abaot huia i stap luk. Be, i nomata we wanem yu mekem i smol mo man i no luk, yu tu, yu wan nara wokman long bigfala wok ia blong Lod.
Sam Aedia blong Skripja Stadi blong Yuwan
Lod i wantem mi stanemap stamba tingting blong Saeon.
Josef Naet Senia, mo waef blong hem, Poli, tufala i bin mitim Josef Smit taem we, taem hem i gat 20 yia, hem i stat blong fam blong olgeta long Kolesvil, Niu Yok. Josef Naet i tokbaot Josef Smit se hem i bes wokman we hem i bin gat. Hem i bin bilivim testemoni blong Josef Smit abaot ol buk we oli wokem long gol, mo hem i tekem Poli blong go visitim Josef Smit taem hem i bin stap transletem Buk blong Momon long hom blong hem long Hamoni, Pensilvania. Poli i bin biliv wantaem nomo. Blong haf laef blong olgeta, Josef mo Poli, tufala i bin stap fetful nomo long gospel ia we i kambak. Moa long 60 memba blong Naet famli oli bin joenem Jos mo oli bin help blong stanemap Jos long Niu Yok, Ohaeo, Misuri, Nauvu, mo long en, Sol Lek Siti.
Josef Naet i bin wantem blong save olsem wanem hem i save help insaed long wok ia blong Lod. Ansa blong Lod, (we naoia hem i Doktrin mo Ol Kavenan 12) i blong “olgeta evriwan we oli wantem tumas blong mekem wok ia i kamtru mo stanemap wok ia” (ves 7)—wetem yu tu. ?Hem i minim wanem long yu blong “mekem i kamtru mo stanemap stamba tingting blong Saeon? (ves 6). ?Olsem wanem ol prinsipol mo ol fasin we oli stap long ol ves 7–9 oli helpem yu blong mekem hemia?
Luk long “The Knight and Whitmer Families,” Revelations in Context, 20–24.
Jon Baptaes i bin putumbak Aronik Prishud.
Long wan sentens nomo, Jon Baptaes i bin talemaot plante trutok abaot Aronik Prishud. Tingting blong raetem lis blong evri samting we yu lanem aot long seksen ia (wetem wanem i stap long heding blong seksen). Bae i save help blong stadi sam long ol sentens we yu faenem. Hemia samfala eksampol we yu save stat wetem:
-
“Ol ki blong seves blong ol enjel”: 2 Nifae 32:2–3; Moronae 7:29–32; Jeffrey R. Holland, “The Ministry of Angels,” Ensign o Liahona, Nov. 2008, 29–31; Gaed long Ol Skripja, “Ol Enjel,” olskripja.ChurchofJesusChrist.org
-
“Ol ki … blong gospel blong fasin blong sakem sin”: 3 Nifae 27:16–22; Doktrin mo Ol Kavenan 84:26–27; Dale G. Renlund, “The Priesthood and the Savior’s Atoning Power,” Ensign o Liahona, Nov. 2017, 64–67
-
“Ol boe blong Livae”: Ol Namba 3:5–13; Doktrin mo Ol Kavenan 84:31–34; Gaed long Ol Skripja, “Aronik Prishud,” “Livae,” olskripja.ChurchofJesusChrist.org
?Wanem blesing yu yu bin kasem tru long ol odinens blong Aronik Prishud?
Josef Smit I Baptaesem Oliva Kaodri, i kam long Del Parson
Ol odinens oli givim yumi rod blong kasem paoa blong God.
Sista Carole M. Stephens, foma kaonsela insaed long Jeneral Presidensi blong Rilif Sosaeti i bin tijim: “Ol prishud odinens mo kavenan, oli mekem se yumi save kasem ful promes blesing we i kam long God, we i stap tedei tru long Atonmen blong Sevya. Oli givim tul blong faet long ol boe mo ol gel blong God; ol tul blong faet ia oli paoa, paoa blong God, mo i givim yumi janis blong kasem laef we i no save finis” (“Do We Know What We Have?” Ensign o Konfrens Ripot, Nov. 2012).
Taem yu stap ridim Josef Smit—Histri 1:66–75, wetem not long en blong ves 71, tingting long wanem nao i bin givim insperesen long Josef mo Oliva blong askem abaot baptaes, mo tekem not long ol blesing we oli bin kasem afta we oli bin tekpat long ol prishud odinens ia. Tingting blong ridim ol raeting long jenol blong yu, we yu bin raetem afta we yu bin kasem ol odinens, o afta we yu bin raetemdaon ol memori blong yu abaot ol taem ia. ?Wanem blesing yu yu bin kasem tru long ol prishud odinens?
Luk tu long Doktrin mo Ol Kavenan 84:20–22; Saints, 1:65–68.
Sam Aedia blong Famli Skripja Stadi mo Famli Haos Naet
-
Doktrin mo Kavenan 12:8.?From wanem ol fasin o kwaliti we oli tokbaot long ol ves ia, yumi nidim olgeta taem yumi stap mekem wok blong Lod?
-
Doktrin mo Ol Kavenan 13.?Wanem bae i bildimap fet blong famli blong yu taem yu lukluk long wok ia blong putumbak Aronik Prishud? Vidio ia “Restoration of the Aaronic Priesthood” (ChurchofJesusChrist.org) o peinting we i go wetem aotlaen ia i save helpem famli blong yu blong gat wan pikja blong taem ia we oli putumbak Aronik Prishud. Bae oli save glad blong droem wan pikja blong taem ia folem wanem we oli stap ridim long Josef Smit—Histri 1:68–74? Oli save serem tu ol testemoni blong olgeta abaot paoa blong prishud insaed long laef blong olgeta.
Luk tu long “Priesthood Restoration Site” long history.ChurchofJesusChrist.org.
-
Josef Smit—Histri 1:68.?Olsem wanem yumi save folem eksampol blong Josef Smit mo Oliva Kaodri blong faenem ol ansa long ol kwestin blong yumi? Maet, taem yu stap rid tugeta, yu save mekem se hem i wan fasin blong stop smol, mo askem sapos eniwan i gat ol kwestin long wanem we oli stap ridim.
-
Josef Smit—Histri 1:71, not.?Wanem nao i tajem moa ol memba blong famli blong yu abaot ol toktok blong Oliva Kaodri? ?Wanem nao sam long ol “dei ia, oli dei we bae mi neva fogetem”?
-
Josef Smit—Histri 1:73–74.?Wanem samting nao Tabu Spirit i bin mekem long Josef mo Oliva? ?Wetaem nao Spirit i bin lidim famli blong yu blong andastanem ol skripja mo stap glad long Lod?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “The Priesthood Is Restored,” Children’s Songbook, 89.
Stap Kam Antap long Fasin blong Yumi blong Stap Tij
Stadi wan topik. Olsem wan famli, jusum wan topik we yu wantem stadi long hem long moa ditel. Olsem, long wik ia, maet bae yu wantem yusum Topical Guide o Gaed long Ol Skripja (olskripja.ChurchofJesusChrist.org) blong faenem ol skripja abaot Aronik Prishud.
“Antap long Hed blong Yufala, Ol Wokman we Yumi Wok Tugeta” i kam long Linda Curley Christensen