Kopi blong orijinol buk blong Buk blong Momon.

1–7 Febwari

Doktrin mo Ol Kavenan 10–11

“Blong Yu Save Kamaot Olsem Man we I Win”

Blong stap raetemdaon ol tingting mo ol filing blong yu taem yu stap ridim ol skripja, i olsem blong planem ol sid; iven ol smol tingting mo filing bae oli save lidim yu blong kasem wan revelesen blong yuwan we i gat mining.

Raetemdaon Ol Filing mo Tingting blong Yu

Taem we translesen blong Buk blong Momon i stap gohed, wan kwestin i bin kam antap: ?Wanem nao bae Josef Smit mo Oliva Kaodri i nid blong mekem abaot ol pej blong translesen ia we oli bin go lus? Bae nomol samting we i kam long maen bae i blong gobak, mo transletem bakegen pat ia we i bin lus, be Lod i bin luk wan samting we tufala i no bin save luk—ol rabis man we oli mekem plan blong jenisim ol toktok long ol pej ia blong givim tu tingting abaot wok blong insperesen we Josef i bin stap mekem. God i bin gat wan plan blong spolem ol hadwok blong Setan mo stretem wanem i bin lus. Plan ia i bin stat plante taosen yia bifo taem we profet Nifae i bin filim insperesen blong krietem wan seken histri we i tokbaot semfala taem ia. Afta long hemia, Momon i bin kasem insperesen blong putum histri ia insaed long Buk blong Momon from “wan waes stamba tingting” we Lod i save long hem (luk long Ol Toktok blong Momon 1:3–7.

“Waes blong mi,” Lod i talem long Josef, “i bigwan moa bitim ol trik blong devel” (Doktrin mo Ol Kavenan 10:43). Hemia i wan mesej we i mekem tingting i kwaet long wan taem olsem hemia blong yumi, we, ol hadwok we oli no stop, blong enemi ia, i stap kam strong moa blong mekem fet blong yumi i nomo strong. Olsem Josef, yumi save “stap fetful mo gohed” blong mekem wok we God i bin singaotem yumi blong mekem (ves 3). Afta long hemia, bae yumi faenem se Hem i bin givim wan wei finis blong mekem se “ol get blong hel bambae oli no save win” agensem yumi (ves 69).

Luk long Saints, 1:51–61.

Sam Aedia blong Skripja Stadi blong Yuwan

Doktrin mo Ol Kavenan 10:1–33

Setan i wantem blong prapa spolem gud wok blong God.

Setan i wantem moa blong yumi fogetem se hem i stap—o, blong yumi no luk se hem i stap traem blong lidim tingting blong yumi (luk long 2 Nifae 28:22–23). Be ol toktok blong Lod we oli stap insaed long Doktrin mo Ol Kavenan 10 oli stap soem se Setan i stap wok oltaem blong agensem wok blong God. Taem yu stap ridim ol ves 1–33, faenemaot olsem wanem Setan i lukaot blong prapa spolem gud wok blong God long taem blong Josef (luk tu long ol ves 62–63). ?Wanem semmak samting yu luk long ol wei we Setan i stap wok long hem tedei? Yu save askem Lod blong helpem yu blong luk olsem wanem nao Setan i save temtem yu. ?Wanem yu lanem aot long seksen 10 we i save helpem yu blong stanap agensem ol hadwok blong Setan?

Doktrin mo Ol Kavenan 10:34–52

“Waes blong [Lod] i bigwan moa bitim ol trik blong devel.”

Moa long 2,400 yia bifo i kam, Lod i bin mekem rere wan rod blong riplesem ol pej ia blong Buk blong Momon we oli bin lus (luk long 1 Nifae 9). ?Wanem nao yu lanem abaot Lod aot long Doktrin mo Ol Kavenan 10:34–52? ?Wanem pruf nao blong waes blong Lod mo samting we Hem i save se bae i hapen bifo taem we yu yu bin luk insaed long laef blong yu?

Histri we God i bin mekem i rere blong tekem ples blong ol pej ia we oli bin lus, naoia yumi faenem i stap long 1 Nifae i go kasem Omnae. ?Long wanem wei nao, ol stori mo ol tijing insaed long histri ia, oli “givim moa andastaning abaot gospel” long yu? (Doktrin mo Ol Kavenan 10:45).

Momon I Stap Raetemsot Histri long Ol Buk, i kam long Tom Lovell

Doktrin mo Ol Kavenan 11

Sapos mi askem God, bambae mi kasem samting.

Samfala long ol memba blong famli blong Josef Smit, wetem ol fren blong hem, oli bin askem hem blong askem tingting blong Lod long saed blong olgeta. Josef i bin glad blong mekem olsem, be Lod tu i bin wantem givim wan revelesen long wanwan long olgeta. Insaed long Doktrin mo Ol Kavenan 11, wan revelesen we Josef i bin kasem blong bigfala brata blong hem Haeram, Lod i bin talem se: “Bambae mi soemaot smol nomo, Spirit blong mi, … mo long taem ia nao bambae yu save evri samting we bambae yu askem long mi” (Doktrin mo Ol Kavenan 11:13–14).

Lod i talem se ol toktok blong Hem, oli blong “olgeta evriwan we oli wantem ol gudfala samting, mo oli bin sakem huknaef blong olgeta wetem strongfala paoa blong tekem kaekae we i stap” (ves 27). Insaed long Doktrin mo Ol Kavenan 11, ?wanem nao Lod i stap traem blong talem long yu abaot revelesen we i blong yuwan? o abaot fasin blong tekpat long wok blong God? ?Wanem nao ol nara mesej we Lod i gat blong yu?

Doktrin mo Ol Kavenan 11:15–26

Taem mi stap traem blong “kasem toktok [blong God],” bambae mi kasem Spirit mo paoa blong Hem.

Iven bifo we oli bin transletem Buk blong Momon, Haeram Smit i bin wantem tumas blong prijim gospel. Taem yu stap ridim ansa blong Lod from ol samting we hem i wantem, tingting se i minim wanem long yu blong “kasem toktok [blong God]” (ves 21). ?Olsem wanem nao we, taem yu bin kasem toktok blong God i bin helpem yu blong givim seves insaed long Jos? ?Olsem wanem nao hemia i tekem paoa blong God i kam insaed long laef blong yu?

Sam Aedia blong Famli Skripja Stadi mo Famli Haos Naet

Doktrin mo Ol Kavenan 10:5.?Wanem nao yumi lanem aot long ves ia abaot paoa blong prea? ?Olsem wanem yumi stap “prea oltaem”? (Blong gat sam tingting, luk long David A. Bednar, “Pray Always,” Ensign o Liahona, Nov. 2008, 41–44.)

Doktrin mo Ol Kavenan 10:38–46.Blong helpem famli blong yu blong toktok raon long wei we Lod i bin riplesem ol pej ia blong translesen blong Buk blong Momon we oli bin lus, maet ol memba blong famli oli save tokbaot wan samting we oli jes lusum. ?Oli harem olsem wanem taem oli faenemaot se i lus? ?Oli bin filim olsem wanem taem oli faenem bakegen? Nomata we oli neva bin faenembak ol pej ia we oli bin lus blong Buk blong Momon, ?olsem wanem nao Lod i bin mekem blong riplesem olgeta, folem wanem oli bin raetem long Doktrin mo Ol Kavenan 10:38–46?

Doktrin mo Ol Kavenan 10:55–70.Invaetem ol memba blong famli blong faenem o makem ol sentens we oli stat wetem “bambae mi, o bae mi,” o “mi, mi.” ?Wanem nao yumi lanem aot long ol sentens wetem toktok ia, “mi mi” we oli tokbaot huia i Jisas Kraes mo Hem i olsem wanem? ?Wanem nao yumi lanem aot long ol sentens we i gat toktok ia “mi mi” we i tokbaot ol samting we Hem i stap mekem? Leftemap tingting blong ol memba blong famli blong oli serem olsem wanem ol trutok ia oli bin mekem fet blong olgeta long Jisas Kraes i kam strong moa.

Doktrin mo Ol Kavenan 11:12–14.Sapos yufala i ridim ol ves ia, hem i save helpem ol memba blong famli blong yu blong luksave wetaem nao Spirit i stap toktok long olgeta. Yu save saenem wan tojlaet long floa, mo invaetem wan memba blong famli blong muv i go long ples we laet ia i stap saen long hem. ?Olsem wanem nao hemia i olsem blong stap folem Tabu Spirit we i stap lidim yu? ?Wanem eksperiens blong yumiwan nao bae yumi save serem?

Doktrin mo Ol Kavenan 11:15–30.Tingting blong mekem wan lis blong ol samting we Lod i talem long Haeram Smit blong mekem, blong mekem se bae hem i rere blong serem gospel. ?Wanem nao bae yumi wok long hem olsem wan famli?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Search, Ponder, and Pray,” Children’s Songbook, 109; luk long “Sam Aedia blong Kam Antap long Famli Skripja Stadi.”

Stap Kam Antap long Fasin blong Yumi blong Stap Tij

Yusum ol skripja ia long laef blong yu. Afta we yu ridim wan skripja, askem ol memba blong famli blong serem ol wei we mesej ia i go wetem laef blong olgeta. Eksampol. Oli save serem olsem wanem Spirit i bin lidim olgeta long ol wei we oli tokbaot insaed long Doktrin mo Ol Kavenan 11:12–13.

Josef mo Haeram Smit, i kam long Ken Corbett