famli we i stap stadi long skripja

Sam Aedia blong Kam Antap long Famli Skripja Stadi

Famli skripja stadi i wan wei we i gat moa paoa blong helpem famli blong yu blong lanem gospel. Hamas japta mo hamas minit yu stap rid olsem wan famli i no impoten, be wanem i impoten, i we yu stap traehad blong mekem oltaem. Taem yu mekem skripja stadi i kam wan impoten pat blong famli laef blong yu, bae yu stap helpem ol memba blong famli blong yu blong kam kolosap moa long wanwan long olgeta mo long Jisas Kraes mo bildimap testemoni blong olgeta antap long fandesen blong toktok blong Hem.

Tingting long olgeta kwestin ia:

• ?Olsem wanem nao yu save leftemap tingting blong ol memba blong famli blong stadi long ol skripja olgetawan?

• ?Wanem nao yu save mekem blong leftemap tingting blong ol memba blong famli blong oli serem wanem we oli stap lanem?

• ?Olsem wanem nao yu save tokbaot moa ol prinsipol we yu stap lanem insaed long Doktrin mo Ol Kavenan long evri dei, taem yu gat wan taem blong tij?

Tingbaot se hom i nambawan ples blong lanem gospel. Yu save lanem mo tijim gospel long hom long sam wei we i no posibol blong mekem insaed long wan klas long Jos. Yusum tingting blong yu blong krietem wan wei we yu save helpem famli blong yu blong lanem samting aot long ol skripja.

Sam Aktiviti Aedia

Tingting long sam long ol aedia ia blong mekem famli skripja stadi blong yu i kam moa gud:

Yusum miusik

Singsing ol singsing we oli kam sapotem ol prinsipol we oli stap tijim insaed long ol skripja. I gat wan hym o wan singsing blong ol pikinini we oli putum i stap long lis insaed long aotlaen blong wanwan wik. Yu save askem ol kwestin abaot ol toktok, o ol sentens insaed long ol toktok blong singsing ia. Antap long singsing, famli blong yu i save mekem ol aksen we oli go wetem ol singsing, o lisin long ol singsing olsem bakgraon miusik long semtaem we oli stap mekem sam nara aktiviti.

Serem ol skripja we oli gat mining

Givim taem long ol memba blong famli blong oli serem ol ples long ol skripja, we oli bin stadi olgetawan, we oli faenem se i gat mining long olgeta.

Yusum toktok blong yuwan

Invaetem ol memba blong famli blong yusum toktok blong olgetawan, mo talemsot wanem oli lanem aot long ol skripja we yufala i stap stadi long olgeta.

Yusum ol skripja ia long laef blong yu

Afta we yu ridim wan skripja, askem ol memba blong famli blong serem ol wei we skripja ia i go wetem laef blong olgeta.

Askem wan kwestin

Invaetem ol memba blong famli blong askem wan kwestin blong gospel, mo afta, spendem taem blong lukaotem ol ves we i gat ansa long kwestin ia.

Hangem wan skripja i stap

Jusum wan ves we yu luk se i gat mining long yu, mo raetem mo hangem long wan ples we ol memba blong famli bae oli luk plante taem. Invaetem ol nara memba blong famli blong oli gat wanwan taem blong jusum wan skripja blong hangem.

Mekem wan Lis blong ol skripja

Olsem wan famli, jusum plante defren ves we bae yu wantem toktok raon long hem long wik ia.

Lanem ol skripja baehat

Jusum wan skripja we i gat mining long famli blong yu, mo invaetem ol memba blong famli blong lanem skripja ia baehat; yufala i mekem hemia taem yufala i ripitim skripja ia evri dei, o taem yufala i stap plei wan memori gem.

Ol lesen we oli yusum samting long hem

Faenem sam samting we i go wetem ol japta mo ol ves we yufala i stap ridim olsem wan famli. Invaetem ol memba blong famli blong tokbaot olsem wanem wanwan samting we yu karem, i go wetem ol tijing insaed long ol skripja.

Jusum wan topik

Bae ol memba blong famli oli gat wanwan taem blong jusum wan topik we famli bae i stadi long hem tugeta. Yusum Topical Guide, o Bible Dictionary, o Gaed long Ol Skripja (olskripja.ChurchofJesusChrist.org) blong faenem skripja we i go wetem topik.

Droem wan pikja

Ridim sam ves olsem wan famli, mo afta, givim taem blong ol memba blong famli oli droem wan samting we i go wetem wanem yufala i stap ridim. Spenem taem blong toktok raon long wanwan droing.

Aktem wan stori

Afta we yu stap ridim wan stori, invaetem ol memba blong famli blong oli aktem stori ia. Afta long hemia, tokbaot olsem wanem stori i go wetem wanem wanwan i stap gotru long hem hemwan, mo wetem wanem yufala i stap gotru long hem olsem wan famli.

Stap Tijim Ol Pikinini

Sapos yu gat ol yang pikinini insaed long famli blong yu, hemia samfala aktiviti we i save helpem olgeta blong lanem samting:

Singsing

Ol hym mo ol singsing insaed long Children’s Songbook mo Singsing Tabu mo Singsing blong Ol Pikinini, oli tijim doktrin wetem paoa. Wanwan aotlaen insaed long buk ia, i gat wan singsing i stap. Yusum topics index (indeks blong ol topik) long en blong buk ia, Children’s Songbook blong faenem ol singsing we oli go wetem ol prinsipol blong gospel we yu stap tijim. Helpem ol pikinini blong yu blong luk olsem wanem ol singsing ia oli go wetem wanem i stap hapen insaed long laef blong olgeta.

Lisin, o aktem wan stori

Ol yang pikinini oli lavem tumas ol stori—blong ol skripja, blong laef blong yu, blong histri blong Jos, o ol stori we oli stap long ol magasin blong Jos. Lukaotem sam wei blong yusum olgeta blong talem stori. Oli save holem ol pikja, o sam samting; oli save dro ol pikja blong wanem oli stap harem, oli save aktem stori, o iven help blong talem stori. Helpem ol pikinini blong yu blong luksave ol trutok blong gospel insaed long ol stori we yu stap serem.

Ridim wan skripja

Ol yang pikinini, maet oli no save rid tumas, be yu save yusum olgeta blong lanem samting aot long ol skripja. Yu save lukluk nomo long wan ves ia nomo, wan ki sentens, o ki toktok.

Luk long wan pikja o lukluk wan vidio

Askem ol kwestin abaot wan pikja o vidio we i go wetem wan gospel prinsipol we yufala i stap toktok raon long hem. Eksampol. Yu save askem: “?Wanem i stap hapen long pikja ia? ?I mekem yu harem olsem wanem? Gospel Laebri Ap, Gospel Media Library long ChurchofJesusChrist.org, mo children.ChurchofJesusChrist.org oli ol gud ples blong lukaotem ol pikja mo ol vidio.

Krietem samting

Ol pikinini oli save bildim samting, droem, o kalarem samting we i go wetem stori o prinsipol we oli stap lanem.

Tekpat long ol lesen we oli yusum samting long hem

Wan simpol lesen we i yusum samting i save helpem ol pikinini blong yu blong i andastanem wan prinsipol blong gospel we i had blong andastanem. Taem yu stap yusum ol lesen we oli yusum samting, faenem ol wei blong letem ol pikinini blong yu oli tekpat. Bambae oli lanem moa aot long wan eksperiens we oli tekpat long hem, bitim wan we oli jes stap lukluk nomo wan samting.

Rolplei

Taem ol pikinini oli rolplei long wan situesen we bae oli save fesem long ril laef, bae oli save andastanem moa olsem wanem blong yusum wan gospel prinsipol long laef blong olgeta.

Ripitim ol aktiviti

Ol yang pikinini oli nidim blong harem sam tingting plante taem blong save andastanem olgeta. Eksampol. Maet bae yu serem wan skripja stori plante taem long plante defren wei—olsem ridim stori aot long ol skripja, blong talem sot long toktok blong yuwan, soem wan vidio, letem ol pikinini oli help blong talem stori, invaetem olgeta blong aktem wan stori, mo sam narafala moa.

Joenem ol samting ia long ol gol blong olgetawan.

Famli skripja stadi i save givim insperesen long ol yut mo ol pikinini blong oli putum ol gol blong olgeta blong oli groap long saed blong spirit, bodi, waes, mo sosol laef (luk long Luk 2:52).

famli we oli stap smael tugeta

Stap Tijim Ol Yut

Sapos yu gat ol yut insaed long famli blong yu, hemia samfala aktiviti we i save helpem olgeta blong lanem samting:

Invaetem olgeta blong tij

Yumi stap lan moa taem yumi stap tijim wan samting bitim we taem yumi jes stap harem abaot samting nomo. Givim ol janis long ol yut blong oli lidim ol famli storian abaot ol skripja.

Joenem ol samting ia long seminari

Long yia ia, ol seminari studen oli stap stadi long Doktrin mo Ol Kavenan. Sapos ol yut blong yu oli stap go long seminari, invaetem olgeta blong serem wanem we oli bin lanem long seminari.

Yusum ol skripja long laef blong yumiwan

Samtaem ol yut oli no save luk gud olsem wanem doktrin mo ol prinsipol insaed long ol skripja oli save joen i go long laef blong olgeta. Helpem olgeta blong luk olsem wanem ol stori mo ol tijing insaed long ol skripja i joen wetem ol situesen we oli fesem long hom, long skul, o wetem ol fren blong olgeta.

Askem ol kwestin we oli leftemap tingting blong oli save stap tingting hevi.

Plante long ol yut oli ansarem gud ol kwestin we i letem olgeta oli talemaot ol tingting mo ol filing blong olgeta abaot ol skripja be i no blong stap ripitim nomo wanem ol skripja oli talem. Eksampol. Yu save askem: “?Wanem nao Lod i stap tijim yu long ol ves ia?” o “?From wanem yu ting se revelesen ia i gat mining long Ol Sent long ol yia 1830?”

Joenem ol samting ia long ol gol blong olgetawan.

Famli skripja stadi i save givim insperesen long ol yut mo ol pikinini blong oli putum ol gol blong oli groap long saed blong spirit, bodi, waes, mo sosol laef (luk long Luk 2:52).

Gat open tingting long ol kwestin

Wan kwestin we i kam long wan yut i wan spesel janis blong serem wan trutok mo lukaotem andastaning long wan topik we yumi gat tru intres long hem. Yu no fraet long ol kwestin, mo yu no sakemaot ol kwestin, iven sapos yu luk se ol kwestin ia oli no go wetem topik we yufala i stap toktok raon long hem. Hem i oraet sapos yu no gat evri ansa. Hom i stret ples blong lukaotem ol ansa tugeta.

Leftemap tingting blong olgeta blong serem ol niu tingting blong olgeta.

Ol yut oli gat ol spesel wei blong lukluk samting mo gat niu tingting blong tekpat long famli skripja stadi. Letem olgeta oli save se yu yu intres long wanem Spirit i stap tijim olgeta abaot ol skripja. Yu save iven askem olgeta blong serem ol niu tingting aot long stadi blong olgetawan.

No mekem sem samting oltaem

Sapos yu gat wan yut we i no wantem tekpat long famli skripja stadi, lukaotem ol wei blong konek wetem hem. Eksampol. Yu save karem gospel i kam insaed long ol storian blong yufala, o serem wan skripja we i gat mining long wan wei we bae hem i no filim se yu stap prij o yu mekem samting i go tumas? Skripja stadi i no nid blong luk semmak insaed long evri famli. Sam pikinini bae oli stadi gud moa sapos oli stadi ol skripja olgetawan wetem papa o mama. Prea oltaem mo folem smol voes blong Spirit.

Presiden Russell M. Nelson i talem: “Mi promes se taem yu stap wok strong blong jenisim hom blong yu i kam wan senta blong lanem gospel, wetem taem, bae ol Sabat dei blong yufala i rili kam wan glad. Ol pikinini blong yufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala, mo insaed long hom blong yufala, bae i kamdaon. Ol jenis insaed long famli blong yufala bae i bigwan mo i sapotem yufala” (“Blong Kam Ol Lata-dei Sent we I Givim Eksampol,”   Liahona, Nov 2018, 113).