Stap Yusum Kam Folem Mi—Blong Wanwan Man, Woman mo Famli

?Buk Ia Hem I blong Huia?

Buk ia i blong wanwan man, woman mo famli insaed long Jos. Oli raetem blong helpem yu lanem gospel i gud moa—yuwan, o wetem famli blong yu. Sapos yu no bin stap stadi long gospel oltaem long bifo, buk ia i save helpem yu blong statem. Sapos yu gat finis wan gudfala evri dei fasin blong stadi long gospel, buk ia i save helpem yu blong gat ol eksperiens we oli gat moa mining.

?Olsem Wanem Mi Save Yusum Buk Ia?

Yusum buk ia long eni wei we i save helpem yu. Maet bae yu faenem i isi olsem wan gaed o wan help blong mekem skripja stadi blong yuwan mo wetem famli. Yu save yusum hemia tu long haos naet. Ol aotlaen oli haelaetem ol impoten prinsipol we oli stap long Doktrin mo Ol Kavenan; hem i givim sam stadi aedia mo aktiviti blong wanwan man, woman mo famli, mo i givim wan ples we yu save raetemdaon ol filing blong yu long hem.

Kam Folem Mi—Blong Wanwan Man, Woman mo Famli, oli no minim blong riplesem o kompit wetem ol gudfala samting we yu stap mekem. Folem spirit blong i gaedem yu blong luksave olsem wanem yu save mekem stadi blong yuwan long toktok blong God.

?Olsem Wanem Nao Buk Ia I Go Wetem Wanem I Stap Hapen long Jos?

Ol aotlaen blong buk ia, oli oganaesem folem wan riding taemtebol blong wik. Kam Folem Mi—Blong Praemeri mo Kam Folem Mi—Blong Sandei Skul oli stap folem semfala taemtebol. Blong sapotem ol hadwok blong yu blong lanem mo laef folem gospel ia insaed long hom blong yu, ol tija blong yu, long Jos, bae oli givim janis long yu blong save serem ol eksperiens, ol tingting, mo ol kwestin blong yu abaot ol skripja we yu bin stap stadi long hem long hom.

From se oli stap tijim Sandei Skul tu (2) taem nomo long wan manis, bae ol tija blong Sandei Skul oli save jusum blong skipim wan lesen, o blong joenem tu (2) aotlaen blong save folem gud wik taemtebol we i stap. Yu mas fil fri blong stretem ol taemtebol blong yu taem i no gat ol nomol miting blong Jos long Sandei. Eksampol, taem i gat wod o stek konfrens, o taem i gat tempol dedikesen. Long ol wik ia we i gat ol nara samting, mifala i stap invaetem yufala blong gohed blong stadi long Doktrin mo Ol Kavenan long hom.

?Mi Mi Nidim blong Folem Taemtebol Ia?

Taemtebol ia bambae i helpem yu blong ridim finisim Doktrin mo Ol Kavenan bifo en blong yia. Antap long hemia, taem yu stap folem sem taemtebol olsem ol narawan, bae i save lidim yu blong gat ol eksperiens we oli gat mining long hom, long jos, mo long evri nara ples. Yu no mas filim se taemtebol ia i fosem yu blong ridim evri ves ia; taemtebol ia hem i wan gaed blong helpem yu blong kipim spid blong yu. Impoten samting i we yu stap lanem gospel yuwan mo wetem famli.