“15–21 Febwari. Doktrin mo Ol Kavenan 14–17: ‘Stanap Olsem Wan Witnes,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“15–21 Febwari. Doktrin mo Ol Kavenan 14–17” Kam Folem Mi—Blong Wanwan Man, Woman mo Famli: 2021
15–21 Febwari
Doktrin mo Ol Kavenan 14–17
“Stanap Olsem Wan Witnes”
Samfala memba blong famli blong Josef Smit, wetem ol fren blong hem, oli bin askem hem blong askem wanem Lod i bin wantem olgeta blong mekem. Taem yu stap ridim ol revelesen ia, tingting se God i soem wanem rod long yu.
Raetemdaon Ol Filing mo Tingting blong Yu
Iven we wok blong translesen i bin stap gohed gud, taem i kasem Mei 1829, situesen long Hamoni i kam moa had blong Josef, Ema, mo Oliva. Ol rabis aksen we i kam long ol neba i bin stap kam antap, be sapot blong famli blong Ema i stap go daon. From se hem i filing se Hamoni i nomo wan sef ples, Oliva i bin toktok long wan fren we i talem se hem i gat intres long wok blong Josef: Deved Witma. Deved i bin stap wetem papa mo mama blong hem, mo wetem ol brata mo sista blong hem long Feyet, Niu Yok, samples 160 kilometa longwe. Hem i bin mitim Oliva wan yia bifo, mo Oliva i bin raetem sam leta i go long hem stat long tetaem ia, mo i bin serem ol eksperiens blong hem we hem i bin stap wok wetem Profet. Deved o eniwan insaed long famli blong hem, i neva mitim Josef. Be taem we Oliva i bin askem sapos hem mo Josef bae i muv i go long hom blong Witma blong finisim wok blong transletem Buk blong Momon, famli Witma i rere finis blong openem doa blong olgeta. Mo Lod i bin gat plante moa blong givim long famli Witma bitim wok ia blong givim wan haos long Profet. Hem i bin gat ol spesifik instraksen blong olgeta, we yumi save faenem long Doktrin mo Ol Kavenan 14–17, mo wetem taem, bae oli kam wan long ol stamba famli blong Jos mo ol witnes blong Restoresen ia we i bin stap hapen.
Blong save moa abaot Witma famli, luk long Saints, 1:68–71.
Sam Aedia blong Skripja Stadi blong Yuwan
Mi save tekpat long “wok we i bigwan mo i gudfala,” we i blong God.
Taem we hem i bin mitim Josef Smit, Deved Witma i bin wan yang man we i bin dediketem hem long wok blong hem long fam blong famli. Be Lod i bin gat wan defren wok blong Deved i mekem—nomata we, long sam wei, i kolosap semmak long wok blong fam. Taem yu stap rid long Doktrin mo Ol Kavenan 14:1–4, luk olsem wanem Lod i komperem wok blong Hem long kaen wok ia we Deved i bin save gud long hem. ?Wanem nao yu lanem abaot wok blong Lod aot long wei we Hem i stap komperem ol wok ia?
?Olsem wanem nao yu “sakem huknaef blong [yu]? (ves 4). Luk ol promes we Lod i givimaot truaot long seksen ia long olgeta we oli stap “lukaot blong mekem i kamtru mo stanemap Saeon” (ves 6).
Toktok blong God i “laef mo i gat paoa.”
Lod i bin komperem toktok blong Hem long wan “naef blong faet we i sap long tufala saed” (Doktrin mo Ol Kavenan 14:2). ?Taem yu lukluk long hao Lod i komperem toktok blong hem lon naef blong faet ia, hemia i stap talem wanem long yu abaot toktok ia blong God? Eksampol: ?olsem wanem nao toktok blong Hem i laef, i gat paoa mo i sap? ?Long wanem wei nao yu bin gat eksperiens blong paoa ia blong toktok blong God long laef blong yu?
Tingting long ol nara wei we God i stap tokbaot toktok blong Hem. Eksampol, ?wanem nao yu lanem abaot tok blong God taem yu komperem wetem ol nara skripja ia?
Lod i komperem toktok blong Hem long wan naef blong faet.
Laef we i no save finis i “nambawan presen long evri presen blong God.”
Taem yu stap ridim Doktrin mo Ol Kavenan 14:7, tingting hevi long from wanem laef we i no save finis i “nambawan presen long evri presen blong God.” Niu lukluk ia we i kam long Presiden Russel M. Nelson i save help: “Anda long bigfala plan blong stap glad blong God, ol famli oli save sil long ol tempol, mo oli save rere blong gobak stap long tabu ples we Hem i stap long hem, blong oltaem. !Hemia nao laef we i no save finis!” (“Thanks Be to God,” Ensign o Liahona, May 2012, 77).
Tingting blong ademap ol kros refrens long ves 7 we bae i helpem yu blong andastanem moa abaot laef we i no save finis (luk long “Laef we I No Save Finis” insaed long Topical Guide, o long Gaed long Ol Skripja, olskripja.ChurchofJesusChrist.org). ?Wanem nao yu lanem we i givim insperesen long yu blong traehad blong kasem laef we i no save finis?
Blong stap tekem ol sol oli kam long Kraes, i impoten tumas.
Jon mo Pita Witma, tufala i bin wantem blong save wanem “bae i moa gud” long laef blong tufala (Doktrin mo Ol Kavenan 15:4; 16:4). ?Yu bin tingting long hemia long saed blong yuwan bakegen? Taem yu stap ridim Doktrin mo Ol Kavenan 15–16, tingting hevi se, from wanem nao, blong tekem ol sol oli kam long Kraes i wan samting we i moa gud yet. ?Olsem wanem nao yu save invaetem ol sol oli kam long Kraes?
Luk tu long Doktrin mo Ol Kavenan 18:10–16.
Lod i stap yusum ol witnes blong stanemap toktok blong Hem.
?Wanem nao i wan witnes? ?From wanem Lod i yusum olgeta witnes long wok blong Hem? (luk long 2 Korin 13:1). Tingting hevi long olgeta kwestin ia taem yu stap ridim ol toktok we God i talem long Olgeta Tri Witnes insaed long Doktrin mo Ol Kavenan 17. Bae i save help tu blong luklukbak long “Testemoni blong Olgeta Tri Witnes” insaed long Buk blong Momon. ?Olsem wanem nao ol witnes oli help blong mekem ol “stret mo gud stamba tingting” blong God oli hapen? (ves 4).
?Yu yu save se Meri Witma, hem tu i bin kasem wan witnes abaot ol buk we oli wokem long gol? Enjel Moronae i bin soem long hem blong luksave ol sakrifaes we hem i bin mekem taem we Josef, Ema, mo Oliva oli bin stap insaed long hom blong hem (luk long Saints, 1:70–71). ?Wanem nao yu lanem aot long eksperiens blong hem long saed blong kasem wan witnes?
Luk tu long Saints, 1:73–75; Ulisses Soares, “Taem we Buk blong Momon I Kamaot,” Liahona, Mei 2020, 32–35.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 14:1–4.Tingting blong invaetem famli blong yu blong faenem ol sentens we i go wetem fasin blong wok long fam insaed long ol ves ia. ?From wanem maet Lod i bin komperem wok blong Hem long wok blong stap pikimap kaekae insaed long wan bigfala garen? ?Wanem nao yumi save mekem blong help wetem wok ia blong Hem?
-
Doktrin mo Ol Kavenan 14:2.Aktiviti blong ves ia, i stap long “Ol Aedia blong Skripja Stadi blong Yuwan;” hem i gat wan lis blong ol skripja abaot toktok blong God. Mebi ol memba blong famli oli save ridim olgeta mo serem wanem we oli lanem. ?Olsem wanem nao ol skripja ia oli givim insperesen long yumi blong “folem gud” toktok blong God?
-
Doktrin mo Ol Kavenan 15:6; 16:6.Olgeta ves ia oli save stap olsem wan insperesen blong statem wan storian abaot ol samting we oli gud moa long famli blong yu (luk tu long Doktrin mo Ol Kavenan 18:10).
-
Doktrin mo Ol Kavenan 17.Maet bae famli blong yu i laekem blong droem ol pikja blong wanwan long ol samting ia we Olgeta Tri Witnes oli bin luk (luk long ves 1). Taem yu stap ridim seksen 17, lukaotem ol sentens we oli stap tij abaot hamas Buk blong Momon i impoten. ?Olsem wanem nao yumi save stap olsem ol witnes blong Buk blong Momon? Famli blong yu i save wajem vidio ia: “A Day for the Eternities” (ChurchofJesusChrist.org).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Talem Se Mi Redi blong Go, Masta,” STSP, pej 46.
Ol Voes blong Restoresen
Lusi Mak Smit mo Olgeta Tri mo Olgeta Eit Witnes
Enjel Moronae i bin soem ol buk we oli wokem long gol i go long Josef Smit, Oliva Kaodri, Deved Witma, mo Martin Haris insaed long ol bus blong ol tri kolosap long hom blong Famli Witma, long Feyet, Niu Yok. Papa mo mama blong Josef oli bin pas blong visitim Famli Witma long tetaem ia. Lusi Mak Smit, mama blong Josef, i tokbaot wanem merikel eksperiens ia i bin mekem long ol witnes.
“Hem i bitwin tri mo fo klok. Masta Witma mo Masta Smit mo mi, mifala tri i bin stap sidaon long wan bedrum. Mi sidaon long saed blong bed. Taem we Josef i kam, hem i bin kam slakem hem long saed blong mi. ‘!Papa! !Mama!’ hem i talem. ‘Yutufala i no save hamas nao mi mi hapi. Lod i bin mekem se bae oli soem ol buk ia long trifala moa wetem mi, we mi bin luk wan enjel mo bae mi mas testifae se wanem mi talem i tru. From olgeta oli save gud we bae mi mi no stap go blong trikim ol pipol. Mo from hemia, mi filim olsem se wan bigfala hevi samting i kamaot long mi, we hem i tumas blong mi blong tekem i go. Be naoia, bae oli mas tekem wan pat blong hem, mo sol blong mi i glad se bae mi no nid blong mi stap miwan long medel blong wol ia.’ Nao Martin Haris i kam insaed. I luk se glad hat we i bigwan tumas i fulumap hem. Afta, hem i bin testifae long wanem hem i bin luk mo harem, semmak olsem ol narawan, Oliva mo Deved. Testemoni blong olgeta i talem semmak long wanem we i bin stap long Buk blong Momon.
“Martin Haris, i luk se hem i no save stap blong talemaot ol filing blong hem. Hem i talem: ‘Naoia, mi bin luk wan enjel we i kam long Heven, we i tru, i testifae abaot trutok blong evri samting we mi bin harem long saed blong histri ia, mo ol ae blong mi oli bin luk hem. Mi bin luk tu ol buk ia, mo mi tajem olgeta wetem ol han blong mi, mo mi save testifae abaot sem samting long ful wol. Be mi bin kasem wan witnes blong miwan we ol toktok oli no naf blong talemaot, we i no gat lanwis i save tokbaot, mo mi blesem God wetem tru hat blong sol blong mi, se hem i bin kam daon blong mekem mi, iven mi ia, i kam wan witnes blong wok blong Hem mo ol plan blong Hem long bihaf blong ol pikinini blong ol man.’ Oliva mo Deved, tufala tu i bin joenem hem blong presem God long tabu fasin from gudfala fasin mo sore blong Hem. Mifala i gobak hom long Palmaera, Niu Yok long nekis dei, we mifala i wan smol grup we mifala i gladglad mo stap hapi.”1
Pikja blong fes blong Oliva Kaodri, Deved Witma, mo Martin Haris, i kam long Lewis A. Ramsey
Lusi Mak Smit i bin stap tu taem Olgeta Eit Witnes oli bin kambak afta long eksperiens blong olgeta
“Afta we olgeta witnes ia oli kambak long haos, enjel i kamkamaot bakegen long Josef; long tetaem ia Josef i bin givim ol buk ia long han blong enjel. Long naet ia, mifala i bin holem wan miting, mo evri witnes oli bin talem testemoni blong olgeta se ol samting ia antap ia, oli hapen tru; mo evri memba blong famli blong mifala, iven kasem Don Karlos Smit, we i bin 14 yia, i bin testifae se lata-dei dispensesen ia i tru—mo i bin stat fulwan finis.”2
Ston we oli katem mo i soem Josef Smit mo Olgeta Eit Witnes, i kam long Gary Ernest Smith
Enjel Moronae I Stap Soem Ol Buk we Oli Wokem long Gol, i go long Josef Smit, Oliva Kaodri, mo Deved Witma, i kam long Gary B. Smith