15–21 Febwari

Doktrin mo Ol Kavenan 14–17

“Stanap Olsem Wan Witnes”

?Olsem wanem nao yu save helpem ol pikinini blong stanap olsem ol witnes blong gospel? Ol aktiviti long aotlaen ia i save givim sam aedia long yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Tingting blong invaetem sam pikinini blong serem wan samting oli bin lanem long wik ia, long hom o long Praemeri, we oli bilivim se i tru.

Stap Tijim Doktrin: Ol Smol Pikinini

Doktrin mo Ol Kavenan 14:1–7

Mi save help blong mekem wok blong Lod.

Tingting long olsem wanem ol toktok blong Lod i go long Deved Witma i save helpem ol pikinini blong andastanem olsem wanem oli save pat long wok blong God.

Samfala Aktiviti we Yu Save Mekem

• Serem sot sam smosmol samting abaot famli Witma (luk long Saints, 1:68–71 o aotlaen blong wik ia long Kam Folem Mi—Blong Wanwan Man, Woman mo Famli). Eksampol, stori long olgeta huia Deved Witma, mo olsem wanem famli blong hem i bin helpem Josef Smit taem hem i stap transletem Buk blong Momon.

• Helpem ol pikinini blong andastanem wanem i semmak, mo wanem i defren, blong stap wok long wan garen mo stap tekpat long wan “bigfala mo gudfala wok” blong God (ves 1). Eksampol, blong stap karem ol kaekae blong garen i stap olsem wan saen blong karem ol sol oli kam long Kraes. Yu save soem wan pikja blong wan fama, karem sam klos blong ol fama i kam blong ol pikinini i traem werem, o tokbaot raon long ol evri dei wok we wan fama i stap mekem. Eksplenem se Deved Witma i bin wan fama we i bin wantem save olsem wanem hem i save helpem Lod. Ridim Doktrin mo Ol Kavenan 14:3–4 i go long ol pikinini, mo helpem olgeta blong faenem wanem Lod i bin talem long Deved Witma blong mekem. ?Olsem wanem nao yumi save help long wok blong Lod?

• Yusum wan presen blong tijim ol pikinini abaot presen blong God we i laef ia we i no save finis. Eksampol. Soem wan presen, long ol pikinini, we i gat wan pepa insaed we i talem se, “Laef We I No Save Finis” (Doktrin mo Ol Kavenan 14:7). Mekem wan pikinini i openem presen, mo ridim Doktrin mo Ol Kavenan 14:7 laod. Serem se, laef we i no save finis i minim blong laef blong oltaem wetem God, mo blong kam olsem Hem. Serem testemoni blong yu abaot ol blesing blong stap kipim ol komanmen mo kasem laef we i no save finis.

  

  Wok blong misinari i wan wei we yumi save helpem Lod blong mekem wok blong Hem.

Doktrin mo Ol Kavenan 15:6; 16:6

Mi save helpem ol narawan blong kam moa kolosap long Jisas Kraes.

Jon Witma mo Pita Witma Junia, oli ol brata blong Deved Witma. Olsem Deved, oli bin wantem save olsem wanem oli save helpem Lod. Hem i bin askem olgeta blong help blong “karem ol sol i kam long” Hem.

Samfala Aktiviti we Yu Save Mekem

• Askem ol pikinini blong tokbaot gud wan samting we i impoten o gat valiu long olgeta (olsem ol pleplei, buk, o gem). Ridim Doktrin mo Ol Kavenan 15:6 o 16:6, mo askem ol pikinini blong leftemap han blong olgeta taem oli harem wanem nao Lod i talem we “bambae i moa gud.”

• Wetem ol pikinini, mekem wan lis blong ol wei we ol pikinini oli save helpem wan man blong folem Jisas Kraes, olsem blong stap fren wetem ol narawan, stap serem ol skripja wetem wan fren, o stap prea from wan man we i gat nid. Blong givim sam aedia long ol pikinini, yu save soem sam pikja we i go wetem topik ia; ol pikja ia oli stap long ol magasin blong Jos, o long Gospel Art Buk. O, ol pikinini oli save droem ol pikja blong olgetawan. Invaetem olgeta blong traem wan samting long lis blong olgeta truaot long wik.

Doktrin mo Ol Kavenan 17

Mi save stap olsem wan witnes blong ol samting we God i bin mekem blong mi.

Deved Witma i bin kam wan long Olgeta Tri Witnes blong Buk blong Momon, mo fo long ol brata blong hem oli Olgeta Eit Witnes. Olsem Deved mo ol brata blong hem, wanwan long yumi i save “stanap olsem wan witnes” blong trutok (Doktrin mo Ol Kavenan 14:8).

Samfala Aktiviti we Yu Save Mekem

• Talem long ol pikinini abaot Olgeta Tri mo Olgeta Eit Witnes (luk long “Japta 7: Ol Witnes Oli bin Luk Ol Buk we Oli Wokem long Gol” [Ol Doktrin mo Kavenan Stori, 31–33], o vidio we i go wetem long ChurchofJesusChrist.org). Invaetem ol pikinini blong droem wan pikja blong ol witnes we oli stap luk ol buk ia.

• Invaetem ol pikinini blong kala aktiviti pej blong wik ia, mo yusum blong talem stori blong Olgeta Tri Witnes.

• Holem wan kopi blong Buk blong Momon, mo rid i go long ol pikinini las laen blong Doktrin mo Ol Kavenan 17:6: “Olsem we Lod blong yufala mo God blong yufala i stap laef.” Talem long ol pikinini olsem wanem yu save se Buk blong Momon i tru. Invaetem ol pikinini blong kam olsem ol witnes blong Buk blong Momon taem oli stap ridim mo prea blong save sapos hem i tru mo stap serem testemoni blong olgeta wetem ol narawan.

Stap Tijim Doktrin: Ol Bigfala Pikinini

Doktrin mo Ol Kavenan 14–16

Mi save help blong mekem wok blong Lod.

Taem yu stap toktok raon long ol revelesen we Lod i talemaot long ol Witma brata, yu save serem sam wei we Lod i stap invaetem wanwan long yumi blong helpem Hem long wok blong Hem.

Samfala Aktiviti we Yu Save Mekem

• Serem sam stori abaot Deved Witma mo famli blong hem we yu filim se bae i givim insperesen long ol pikinini (luk long Saints, 1:68–71). ?Olsem wanem Lod i yusum ol Witma blong help blong bildim kingdom blong Hem?

• Long ol smol pis pepa, raetem ol simpol kwestin we i go wetem ol skripja refrens long Doktrin mo Ol Kavenan 14–16. Eksampol: ?Tok blong God i olsem wanem? (14:2). ?Wanem i bigfala presen blong God? (14:7). ? Wanem nao Lod i talem se bambae i gud moa? (15:6; 16:6). Invaetem wanwan pikinini blong jusum wan kwestin mo faenem ol ansa long ol ves ia.

• Raetem tu heding long bod: Wok blong Fam mo Wok blong Lod. Helpem ol pikinini blong lukaotem, insaed long Doktrin mo Ol Kavenan 14:3–4, ol sot sentens we i go wetem wok blong fam, mo raetem olgeta andanit long fas heding. ?Wanem nao ol sot sentens ia oli tij abaot wok blong God? Raetem ol ansa blong ol pikinini andanit long nambatu taetol. ?Olsem wanem nao yumi save helpem wok blong Lod?

Doktrin mo Ol Kavenan 17

Mi save stap olsem wan witnes blong ol samting we God i bin mekem blong mi.

Long Doktrin mo Ol Kavenan 17, Lod i bin talem long Oliva, Deved Witma, mo Martin Haris se bae oli Olgeta Tri Witnes blong Buk blong Momon. Helpem ol pikinini blong lanem olsem wanem oli save stap olsem ol witnes blong trutok tu.

• Invaetem ol pikinini blong kam rere blong serem stori blong Olgeta Tri Witnes (luk long “Japta 7: Ol Witnes Oli Bin Luk Ol Buk we Oli Wokem long Gol” [Ol Doktrin mo Kavenan Stori, 31–33], o vidio we i go wetem long ChurchofJesusChrist.org). ?Wanem nao yumi lanem aot long stori ia abaot olsem wanem yumi mas no gat fraet? Maet yu save soem sam pat blong vidio ia: “A Day for the Eternities” (ChurchofJesusChrist.org; pat ia abaot Olgeta Tri Witnes i stat samples long 15:00).

• Ridim tugeta promes blong Lod long Doktrin mo Ol Kavenan 17:1–3, mo helpem ol pikinini blong faenem olsem wanem i kam tru long “Testemoni blong Olgeta Tri Witnes” insaed long Buk blong Momon.

• Ridim tugeta Doktrin mo Ol Kavenan 17:3–5 blong faenemaot wanem oli bin askem Oliva Kaodri, Martin Haris, mo Deved Witma afta we oli bin luk ol buk blong gol. ?Wanem sam trutok we yumi save testifae long hem? Talem abaot olsem wanem yu bin serem testemoni blong yu wetem ol narawan, mo invaetem ol pikinini blong serem eni eksperiens we oli bin gat.

Stap Leftemap Tingting blong Lanem Samting long Hom

Invaetem ol pikinini blong stanap olsem wan witnes blong wan samting we oli bin lanem long klas tedei. Askem olgeta blong serem olsem wanem oli bin mekem hemia long klas blong nekis wik.

Stap Kam Antap long Fasin blong Yumi blong Stap Tij

Letem ol pikinini oli muvmuv. Yu save invaetem ol pikinini blong aktemaot wan stori o mekem sam aksen we i go wetem wan singsing o sot sentens blong skripja blong mekem oli muvmuv. (Luk long Teaching in the Savior’s Way, 25–26.)