fam blong Martin Haris

Fam blong Martin Haris, i kam long Al Rounds

22–28 Febwari

Doktrin mo Ol Kavenan 18–19

“Praes blong Wan Sol I Bigwan”

Askem Papa long Heven blong helpem yu blong faenem ol prinsipol long Doktrin mo Ol Kavenan 19–6 we bae i gat fulap mining speseli long ol pikinini.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Ridim Doktrin mo Ol Kavenan 18:2, mo eksplenem se Spirit i bin helpem Oliva Kaodri blong save se ol skripja oli tru. Talem long ol pikinini abaot wan eksperiens we Spirit i bin testifae long yu se ol skripja oli tru. Mekem olgeta i serem ol eksperiens blong ol taem we oli bin filim se ol skripja oli tru.

tijing pikja bokis

Stap Tijim Doktrin: Ol Smol Pikinini

Doktrin mo Ol Kavenan 18:10–12

Wanwan long yumi i gat bigfala praes long God.

Taem ol pikinini oli save se Papa long Heven i lavem olgeta—mo evri pikinini blong Hem—bae oli no fraet mo sem mo stap kaen moa long ol narawan.

Samfala Aktiviti we Yu Save Mekem

• Helpem ol pikinini blong ripit wetem yu Doktrin mo Ol Kavenan 18:10 fulap taem. Eksplenem se, “wan sol,” i stap tokbaot evri pikinini blong God. Ripitim ves 10 wetem ol pikinini, mo long taem ia tekemaot toktok ia “wan sol” mo putum nem blong ol pikinini. (Luk tu long aktiviti pej blong wik ia.)

• Helpem ol pikinini blong tingting long ol samting we ol pipol oli tekem se oli gat valiu. Afta mekem ol pikinini oli lukluk long mira, wan afta wan, mo taem oli mekem, talem long wanwan pikinini se hem i wan pikinini blong God we i gat bigfala valiu. Testifae se, olgeta oli gat moa valiu long Papa long Heven bitim evri samting ia we oli bin stap tingting long hem bifo.

Doktrin mo Ol Kavenan 18:13–16.

Blong stap serem gospel, i mekem man i gat bigfala glad tumas.

?Olsem wanem bae yu givim insperesen long ol pikinini blong invaetem ol narawan blong kam long Kraes mo eksperiensem bigfala glad?

Samfala Aktiviti we Yu Save Mekem

• Talem long ol pikinini abaot wan samting we i mekem yu yu glad. Mekem wanwan pikinini i talem long yu abaot wan samting we i mekem olgeta i glad. Ridim Doktrin mo Ol Kavenan 18:13, 16. ?Wanem i mekem Lod i glad? ?Wanem nao Hem i talem se bae i mekem yumi glad?

• Singsing tugeta wan singsing abaot misinari wok, olsem “I Want to Be a Missionary Now” (Children’s Songbook, 168), mo helpem ol pikinini blong tingting long ol wei we oli save serem gospel, mo long hom blong olgeta tu. Talem abaot wan taem we yu bin serem gospel, mo mekem ol pikinini i serem eksperiens blong olgeta tu.

Doktrin mo Ol Kavenan 19:18–19, 23–24

Jisas Kraes i bin obei long Papa long Heven, nomata we i had.

Fasin blong Sevya blong wantem “dring kap ia we i konkon, mo [no] wantem holemtaet” (ves 18) i wan eksampol long yumi evriwan blong stap obei long tingting blong Papa God long Heven. Tingting long olsem wanem bae yu givim insperesen long ol pikinini blong folem eksampol blong Jisas Kraes.

Samfala Aktiviti we Yu Save Mekem

• Soem wan pikja blong Jisas Kraes we i stap harem nogud long Getsemane (luk long aotlaen blong wik ia long Kam Folem Mi—Blong Wanwan Man, Woman mo Famli). Askem ol pikinini blong talem long yu wanem oli save abaot wanem i stap hapen long pikja ia. Talem sot long ol toktok blong yuwan wanem Sevya i bin talem long Doktrin mo Ol Kavenan 19:18–19 abaot harem nogud blong Hem. Talemaot gud se harem nogud from ol sin blong yumi i samting we i had moa bitim evri nara samting we eni man i bin mekem, be from Jisas i bin lavem Papa blong Hem mo yumi, Hem i bin obei long wanem we God i wantem. ?Olsem wanem yumi save obei long Papa long Heven?

• Helpem ol pikinini blong tingting long sam simpol aksen we i go wetem ol sot sentens long Doktrin mo Ol Kavenan 19:23. Ridim ves ia fulap taem, long semtaem we ol pikinini oli stap mekem ol aksen. Helpem olgeta blong tingting long ol wei we yumi save lan abaot Kraes mo lisin long ol toktok blong Hem.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 18:10–12

Wanwan long yumi i gat bigfala praes long God.

Fulap man i stap fesem hadtaem wetem ol filing blong tingdaon long olgetawan; ol narawan oli no kaen long ol pipol we oli defren long olgeta. Mesej we i gat paoa long Doktrin mo Ol Kavenan 18:10 i save jenisim olsem wanem yumi stap luk yumiwan mo ol pipol raon long yumi.

Samfala Aktiviti we Yu Save Mekem

• Askem wanwan pikinini blong raetem nem blong hem long wan pis pepa mo pasem ol pepa ia raon long rum. Invaetem olgeta blong raetem wan samting we oli laekem abaot man ia long wanwan pepa we oli kasem. Leftemap tingting blong olgeta blong stap kaen mo tingbaot ol narawan long ol komen blong olgeta. Afta helpem ol pikinini blong ridim Doktrin mo Ol Kavenan 18:10–12, mo invaetem olgeta blong serem wanem oli lanem abaot olsem wanem God i stap filim abaot yumi. Eksplenem se yumi evriwan i gat bigfala valiu long God from yumi ol pikinini blong hem.

• Soem long ol pikinini wan samting we i gat fulap valiu tumas long yu. ?Olsem wanem nao yumi tritim ol samting we oli gat valiu long yumi? Askem wan pikinini blong ridim Doktrin mo Ol Kavenan 18:10. ?Olsem wanem nao yumi save soem long ol nara man se “praes blong sol [blong olgeta] i bigwan” long ae blong yumi?

  Jisas i stap holem wan smol boe

  Praes blong Wan Sol, i kam long Liz Lemon Swindle

Doktrin mo Ol Kavenan 7:16–19

Jisas Kraes i bin safa from mi.

?Olsem wanem bae yu invaetem wan spirit blong stap revren long klas blong yu mekem se Tabu Spirit i save testifae long ol pikinini se Jisas Kraes i bin pem praes blong sin blong olgeta?

Samfala Aktiviti we Yu Save Mekem

• Serem stori blong Jisas Kraes we i stap harem nogud from ol sin blong yumi (luk long “Japta 51:Jisas I Safa long Garen blogn Getsemane,” Ol Niu Testeman Stori, 129–32, o vidio we i go wetem long ChurchofJesusChrist.org). Invaetem ol pikinini blong talem stori ia bakegen long toktok blong olgetawan, mo afta invaetem olgeta blong ridim olsem wanem Sevya i tokbaot gud eksperiens ia long Doktrin mo Ol Kavenan 19:16–19. ?Wanem nao yumi lanem aot long wanem Hem i tokbaot gud?

• Invaetem ol pikinini blong sarem ae blong olgeta taem yu ridim Doktrin mo Ol Kavenan 19:16–19 mo blong tingbaot olsem wanem oli filim abaot Sevya. Helpem ol pikinini blong lukluk long Hymns o long Children’s Songbook o long Singsing Tau mo Singsing blong Ol Pikinini, blong faenem ol singsing we i helpem olgeta blong talemaot ol filing blong olgeta abaot Jisas Kraes (luk long ol topik indeks long ol buk ia). Invaetem ol pikinini blong singsing ol singsing we oli bin jusum mo serem testemoni blong olgeta.

• Helpem ol pikinini blong lanem baehat namba eit toktok blong bilif.

Doktrin mo Ol Kavenan 19:26, 34–35, 38

Ol blesing blong God oli bigwan bitim ol rij samting blong wol.

I bin sas blong printim Buk blong Momon, mo Josef Smit i no save pem. Lod i bin askem Martin Haris blong “Givim wan pat blong propeti blong [hem],” fam blong hem we i gud tumas, blong pem printa (ves 34). Yumi bin kasem ol bigfala blesing tumas from ol sakrifaes blong Martin mo fulap narawan.

Samfala Aktiviti we Yu Save Mekem

• Raetem ol kwestin olsem ia long bod blong helpem ol pikinini blong andastanem Doktrin mo Ol Kavenan 19:26, 34–35, 38: ?Wanem nao Lod i bin askem Martin Haris blong mekem? ?From wanem nao Hem i askem Martin Haris blong mekem? ?Wanem nao Hem i promesem i kambak? Invaetem ol pikinini blong wok tu tu blong faenem ol ansa long ol ves ia. Askem olgeta olsem wanem bae oli filim sapos olgeta nao Martin Haris.

• Soem long ol pikinini wan kopi blong Buk blong Momon, mo talem long olgeta, wan samting we yu lavem abaot Blong Buk blong Momon. Invaetem ol pikinini blong serem olsem wanem nao oli fil abaot Buk blong Momon. Tokbaot sot abaot sakrifaes we Martin i bin mekem blong mekem se oli save printim Buk blong Momon (Ol Doktrin mo Ol Kavenan Stori, 33) ?Wanem nao Lod i talem long Martin long Doktrin mo Ol Kavenan 19:38 we maet i bin save helpem hem blong stap fetful mo stap obei? Helpem ol pikinini blong tingting long wan samting we oli save sakrifaesem blong obei God o help long wok blong Hem.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong tingting long wan man we oli save helpem, mo yusum wanem oli bin lanem long Doktrin mo Ol Kavenan 18 o 19—eksampol: se yumi gat bigfala valiu long God. Leftemap tingting blong olgeta blong mekem wan plan long olsem wanem bae oli serem wanem oli bin lanem wetem man ia.

Stap Kam Antap long Fasin blong Yumi blong Stap Tij

Helpem ol pikinini blong lanem samting aot long skripja. Sam pikinini i faenem i had blong ridim ol skripja. Yu save lukluk nomo long wan ves ia nomo, o wan ki sentens blong helpem olgeta.

aktiviti pej: Mi gat bigfala valiu