Japta 7

Ol Witnes Oli Bin Luk Ol Gol Plet

1829–1830

Josef Smit mo Oliva Kowdri i bin finis transletem Buk blong Momon. Jisas i bin wantem ol pipol blong oli ridim buk ia. Hem i bin wantem tu blong oli save se Josef i bin talem trutok abaot ol gol plet.

Doctrine and Covenants 17:4–5

Jisas i bin jusum trifala nara man blong oli luk ol gol plet mo blong witnesem se oli tru. Ol man ia, Martin Haris, Oliva Kowdri, mo Deved Witma.

Josef i bin tekem ol trifala witnes ia oli bin go long bus, mo oli bin stap prea. Wan enjel i bin kam mo soem ol gol plet long olgeta. Jisas i bin talem long ol trifala witnes blong oli talem long ol pipol wanem oli bin luk.

Doctrine and Covenants 17:3, 5

“Testemoni blong Ol Tri Witnes” (luk long Fas TokTok long ol fas pej blong Buk blong Momon)

Josef Smit i bin glad tumas. Ol trifala witnes ia bae oli talemaot long ol pipol abaot ol gol plet, mo plante moa pipol bae oli bilif se Josef i stap talem trutok.

Jisas i bin talem long Josef blong soem ol plet long eit (8) moa witnes. Ol eit witnes ia oli bin holem ol gol plet long ol han blong olgeta mo oli bin luk raeting long ol plet.

“Testemoni blong Ol Eit Witnes” (luk long Fas TokTok long ol fas pej blong Buk blong Momon)

Evri witnes oli bin raetem abaot ol gol plet. Oli talem se oli bin luk ol gol plet, mo oli bin testefae se ol plet ia oli tru. Ol toktok blong ol witnes oli stap long Buk blong Momon.

“Testemoni blong Ol Tri Witnes” mo “Testemoni blong Ol Eit Witnes” (luk long Fas TokTok long ol fas pej long Buk blong Momon)

Afta we Josef Smit i bin transletem ol plet mo ol witnes oli bin luk olgeta, Josef i nomo nidim olgeta. Enjel Moronae i bin kamaot, Josef i bin givimbak ol gol plet long hem.

Afta we Josef i bin finis blong transletem Buk blong Momon, hem i bin tekem buk ia i go long wan printa. Josef i no bin gat mane blong pem printa. Martin Haris i bin gat inaf mane, mo long wan revelesen Lod i bin askem hem blong serem mane blong hem blong pem printa.

Doctrine and Covenants 19:26, 35

Setan i no bin wantem blong oli printim Buk blong Momon. Hem i no bin wantem ol pipol blong oli ridim Buk blong Momon. Ol rabis man oli bin traem blong stopem printa.

Wan man i bin go long ples blong printing long Sandei mo stilim sam long ol pej blong Buk blong Momon. Hem i bin printim ol pej ia long wan niuspepa kasem taem we sam nara man oli stopem hem blong i stilim olgeta pej ia.

Ol pipol we oli bin traem blong stopem printing oli no save mekem from se olgeta we oli stap olsem ol rabis man oli no save stopem wok blong Jisas. Afta plante manis, oli bin finisim printing blong Buk blong Momon.