Japta 63

Ol Paeonea Oli Go long Sol Lek Vale

Epril–Julae 1847

Ol fas grup blong ol paoenia oli bin aot long Winta Kwota long Epril 1847 blong statem rod blong olgeta i go long Wes. Brigham Young i bin lidim grup ia we i gat 143 man, 3 woman, mo 2 pikinini.

Long taem blong fas rod, graon we ol paoenia oli bin krosem i gat plante flat ples mo ol tolfala gras i kavremap. Kaen graon ia oli singaotem ples we i klia. Ol Indian oli bin laef long ol ples we i klia. I nogat ol siti o ol fanis blong ol animol.

Evriwan i gat wok blong mekem long rod. Ol woman oli bin lukaotem ol pikinini mo kukum kakae. Ol man oli mekem ol mak blong folem, bildim ol brij, riperem ol wagun, mo lukaotem kakae.

Ol paoenia oli bin travel evri dei. Long naet oli putum ol wagun raon mo oli kamp. Ol pipol mo ol animol oli bin stap insaed long sekol. Oli bin bildim ol faea mo kukum ol kakae blong olgeta.

Evritaem ol paoenia oli bin danis mo singsing. Wan long ol singsing ia we oli bin laekem tumas hem i “Kam, Kam, Ol Sent.” Singsing ia i bin helpem olgeta blong gat strong tingting blong fesem ol hadtaem we oli gat. Brigham Young i bin talem long Ol Sent blong spel mo blong wosipim God long evri Sandei. Ol Sent oli bin prea, stadi long ol skripja, mo oli bin holem sakramen miting.

Evri moning long faef klok, wan man i stap blo long wan trampet blong talem long olgeta se i taem blong girap. Bae oli prea, kakae, fidim ol animol, mo rere blong go long seven klok.

Ol paoenia oli bin travel long fo manis i go kros long ol klia ples. Oli bin mitim sam nara pipol long rod. Sam long olgeta oli ol man blong kasem wael animol we oli bin talem long Brigham Young blong oli no go long Ol Roki Maonten from se bae i had blong oli planem ol kakae longwe.

Ol nara pipol oli bin talem long Brigham Young blong tekem Ol Sent blong go long Kalifonia from se graon i rij mo weta i gud. Be Brigham Young i bin talem se Lod i bin soem long hem weaples Ol Sent oli sud go.

I no long taem ol paoenia oli bin kasem Ol Roki Maonten, ples we i had tumas long olgeta blong travel.

Brigham Young i bin sik mo hem i no save travel hariap. Hem i bin jusum sam man blong go fastaem long bigfala Sol Lek Vale mo stat blong planem ol kakae.

Ol man oli bin tekem ol wagun blong olgeta ova long ol maonten. Oli bin go daon long ol vale mo oli bin kamp kolosap long wan wota.

Oli bin dediketem graon ia mo askem Lod blong blesem ol sid we bae oli planem. Afta oli planem ol sid.

Tri dei afta, Brigham Young mo ol nara grup oli bin kamaot long ol hil mo oli luk daon long vale. Taem Brigham Young i luk ples ia, hem i save se ples ia nao we Lod i bin wantem Ol Sent blong laef long hem. Hem i talem se, “Hemia nao i stret ples. Wokbaot i go.” Ol Sent oli pulum ol wagun blong olgeta i go daon long vale. Hem i 24 Julae 1847. Afta we oli bin travel 1000 mael krosem ol klia ples mo ol hil, Ol Sent oli bin faenem wan ples we bae oli stap long hem. Oli bin glad tumas se God i bin lidim olgeta i go long wan ples we i gat pis mo sefti, nating we oli save se bae oli save fesem plante moa jalenj.