“Japta 60: Ol Sent Oli Livim Nauvu: Septemba 1845–Septemba 1846,” Ol Doktrin mo Kavenan Stori (2002), 211–16
“Japta 60,” Ol Doktrin mo Kavenan Stori, 211–16
Japta 60
Ol Sent Oli Livim Nauvu
Septemba 1845–Septemba 1846
Afta long ded blong Josef Smit, ol rabis man oli stap ting se Jos bae i lus. Be Jos i bin stap strong anda long lidasip blong Ol Aposol, mo Nauvu i bin gohed blong gro. Hemia i bin mekem ol rabis man oli bin traehad moa blong spolem gud Jos mo ronemaot Ol Sent. Ol rabis man oli bin printim ol giaman toktok long ol niuspepa abaot olgeta.
Gavna blong Ilinoa i no save stopem ol rabis man. I no longtaem Ol Sent, oli bin luksave se bae oli nogat pis kasem taem bae oli livim Nauvu. Gavna i bin givim tingting long olgeta blong oli muv i go longwe long wes, long ples we bae oli save stap longwe long ol enemi blong olgeta mo bae oli save putum gavman blong olgetawan nomo. I no longtaem afta, Ol Sent oli agri blong aot, be oli nidim taem blong oli rere.
Ol Sent oli bin nidim taem blong tekem kakae mo ol klos blong longfala wokbaot blong olgeta. Oli bin nidim tu blong mekem ol wagun, pem ol buluk mo ol nara animol, mo salem ol hom blong olgeta. Ol Sent oli bin wok had blong rere blong livim Nauvu.
Ol rabis man oli no bin wantem givim taem long Ol Sent blong oli rere. Oli bin stilim ol ting mo bonem sam long ol hom blong olgeta.
Ol Sent oli bin plan blong aot long Epril 1846, be ol enemi blong olgeta oli bin tritim olgeta i nogud tumas i mekem se olgeta oli bin stat blong aot long Febware, taem ia i kolkol tumas.
Ol Sent oli bin putum ol ting blong olgeta long ol wagun. Afta oli putum ol wagun blong olgeta long ol flatbot mo oli bin go kros long Misisipi Reva.
Samples long tu (2) wik Ol fas Sent oli bin livim Nauvu, ples i kolkol tumas i mekem se reva i gat aes. Sam long Ol Sent oli bin pulum ol wagun blong olgeta i krosem reva long aes.
Ol Sent oli bin kamp long saed blong reva blong sam dei. Sam long olgeta oli nogat inaf klos mo sam oli bin kolkol tumas. Sam long olgeta oli no bin gat inaf kakae. Olgeta we oli bin gat inaf kakae mo klos, oli bin serem wetem ol narawan. Afta Ol Sent oli bin muv mo oli bin mekem ol nara kamp. Brigham Young i bin jusum ol lida we oli bin helpem ol pipol blong oganaesem olgeta mo rere from rod blong olgeta blong go long wes. Ol Sent we oli bin travel i go long wes oli bin singaotem olgeta ol paeonia.
Long Maj 1846 ol paoenia oli bin stat blong travel mo krosem Aeowa. Progres blong olgeta i slo from weta i nogud, hadtaem, mo ol nara problem. Brigham Young i bin sendem sam man blong go fastaem blong faenem ol gud ples blong nara kamp. Ol man ia oli bin katem ol tri mo mekem ol timba haos. Oli bin planem sam kakae tu mo oli bin bildim ol brij krosem ol wota. Oli bin mekem i isi blong ol paoenia oli travel.
Long Jun 1846, abaot fo manis afta oli livim Nauvu, ol fas grup blong paoenia oli bin tekem rod blong olgeta i go kros stret long Aeowa i go long Misuri Reva. Oli bin stop long wan ples we oli singaotem Kaonsel Blaf mo oli bin bildim wan feribot blong krosem reva. I no longtaem afta, Ol nara Sent oli bin kam joenem olgeta (luk long map long pej 190).
Taem plante long ol Sent oli bin livim Nauvu long Febware 1846, plante narawan i bin stap blong smol taem. Sam long olgeta oli bin kasem wok ia blong finisim tempol. Ol narawan oli bin traem blong salem sam long ol propeti. Long Septemba, kolosap evriwan long Ol Sent oli bin livim siti.
Taem Ol Sent oli bin livim Nauvu, oli bin luklukbak krosem reva mo oli luk naesfala siti blong olgeta, wetem tempol long hil. Oli bin harem nogud blong livim ples blong olgeta, be oli bin hapi from se oli bin finisim tempol blong Lod.
Plante long Ol Sent we oli bin livim Nauvu long ol nara manis afta, oli bin sik, pua tumas, o oli no bin rere blong travel. Plante handred long olgeta oli bin stap wanwan long saed blong reva mo oli bin gat smol selta o kakae. Be Lod i bin helpem olgeta, taem Hem i sendem ol hip blong ol pijin we oli singaotem kwel, we Ol Sent oli save kasem mo kakae.
Taem Brigham Young i bin harem abaot trabol blong Ol Sent ia, hem i sendem sam man blong helpem olgeta. Ol man ia oli bin sevem olgeta long hanggri mo oli bin helpem olgeta blong travel o go long Kaonsel Blaf mo ol nara ples long Aeowa, ples we Ol Sent oli bin kamp long hem.