“Japta 62: Ol Sent Oli Statem Winta Kwota: 1846–1847,” Ol Doktrin mo Kavenan Stori (2002), 222–24
“Japta 62,” Ol Doktrin mo Kavenan Stori, 222–24
Japta 62
Ol Sent Oli Statem Winta Kwota
1846–1847
Ol Sent oli bin hop se sam long olgeta oli save mekem blong kasem Ol Roki Maonten long 1846. Be Brigham Young i bin luksave se oli sud wet kasem nekis yia. Oli nid blong mekem rere gud olgeta. Oli nidim tu ol strong man from rod, mo plante long ol man oli bin stap yet wetem Momon Soldia Ami.
Sam Indian oli bin agri blong letem Ol Sent oli yusum sam graon narasaed long reva blong Kaonsel Blaf. Long Septemba, Ol Sent oli bin stat blong bildim wan taon longwe, we oli singaotem Winta Kwota (luk long map long pej “00”(190)). Oli bin planem ol kakae blong olgeta mo oli bin bildim ova 700 hom.
Brigham Young i bin serem Winta Kwota long ol wod mo jusum ol bisop blong lukaotem ol memba long wanwan wod. Ol paoenia oli bin bildim ol fanis raon long taon blong protektem olgeta.
Taem Ol Sent oli stap long Winta Kwota, Lod i bin givim long Brigham Young wan revelesen abaot rod blong olgeta i go daon long wes. Lod i bin talem long Brigham wanem nao Ol Sent oli sud mekem blong oli rere mo wanem oli sud mekem taem oli travel.
Lod i bin talem se ol pipol oli sud serem olgeta long ol smolsmol grup, wanwan wetem ol lida. Ol pipol oli sud obei long ol lida blong olgeta. Oli sud helpem wanwan long olgeta, speseli ol pua, ol wido, mo olgeta we oli nogat papa.
Lod i bin talem se wanwan grup i mas gat ol wagun blong olgeta mo kakae. Wanwan grup i sud gat ol pipol tu we oli save olsem wanem blong fiksim ol wagun, oli save bildim ol brij, bildim ol hom, mo planem ol kakae.
Lod i bin talem long Ol Sent se oli sud kipim ol komanmen blong Hem. Oli no sud faet. Oli sud talem ol gud samting abaot olgeta wanwan, be i no ol rabis samting. Oli sud talem trutok mo givimbak wanem we oli bin karemaot long narawan o wanem oli faenem.
Lod i bin wantem ol paoenia blong stap hapi. Hem i bin talem long olgeta blong oli singsing, danis, mo prea tugeta. Hem i bin promes blong helpem olgeta sapos oli harem nogud o fraet. Hem i talem se ol hadtaem blong olgeta bae i helpem olgeta blong rere blong kasem ol bigfala blesing we Hem i gat blong olgeta.
Brigham Young i bin mekem olsem Lod i bin talem long hem blong mekem. Hem i bin serem ol pipol long ol grup. Wanwan grup i gat evri samting we oli nidim blong bildim wan siti long ol maonten.
Ol manis we ol paoenia oli bin spendem long Winta Kwota i nogud tumas. Oli bin safa bigwan from ol sik, hanggri, mo kolkol, mo moa long 700 long olgeta oli bin ded. Ol hadtaem blong olgeta i bin soem se oli bin stap strong long fet we oli bin gat, mo oli bin wok had blong rere from rod blong olgeta.