Japta 47

Ol Sent Oli Livim Misuri

Winta 1839

Taem Josef Smit hem i bin stap long kalabus, oli bin putum plante wok blong lidim Ol Sent long han blong Brigham Young, wan long Ol Aposol. Hem i bin holem wan miting blong talem long Ol Sent blong oli mas stat blong rere blong aot long Misuri. Plante long Ol Sent oli pua mo oli nogat ol wagun o hos. Long miting, ol man oli talem se bae oli helpem Ol Sent we oli nogat samting blong oli muv.

Ol Sent oli bin stat blong aot long Misuri long Febware 1839, taem ples i kolkol tumas. Oli bin talem long olgeta se ating ol pipol long stet blong Ilinoa bae oli save gud fren long olgeta, mekem se oli bin wokbaot abaot 200 mael i go long Wes Ilinoa. Plante long olgeta oli bin go long taon blong Kwensi, mo long ples ia ol pipol oli bin kaen mo oli bin givim olgeta haos, kakae, mo wok.

Gavna Bogg wetem ol fren blong hem oli bin glad se Ol Sent oli aot long Misuri.