“Japta 54: God mo Ol Enjel: Febware–Epril 1843,” Ol Doktrin mo Kavenan Stori (2002), 194–97
“Japta 54,” Ol Doktrin mo Kavenan Stori, 194–97
Japta 54
God mo Ol Enjel
Febware–Epril 1843
Wan dei wan man i bin talem se hem i bin luk wan enjel i kam blong luk Josef Smit. Man ia i bin talem long Josef olsem wanem enjel hem i dresap. Josef i bin talem se man ia i no rili luk olsem wan enjel from se ol enjel oli no dresap long wei we man ia i talem.
Man ia i bin kros tumas. Hem i bin talem blong faea blong kam daon long heven blong bonem Profet mo haos blong hem. Be man ia i nogat paoa blong God, mo i no bin gat faea i kam daon long heven.
Jisas i bin givim wan revelesen long Josef Smit abaot ol enjel. Jisas i bin talem se ol enjel oli ol pipol we oli bin laef long wol ia, oli bin ded, mo oli bin laef bakegen long ded. Oli gat ol bodi blong mit mo bun.
Jisas i bin talem se Setan i bin traem blong trikim ol pipol. Samtaem hem i mekem ol pipol blong oli ting se hem i enjel. Hem i traem blong mekem ol pipol blong oli mekem ol rabis samting. Be ol pipol we oli stret mo gud oli save se Setan i stap traem blong trikim olgeta.
Afta, Josef Smit i bin talem ol nara trutok abaot heven. Hem i bin talem se ol enjel oli no laef long wan planet olsem wol ia. Be, oli bin laef wetem God. Josef i bin talem tu se pipol long heven bae oli save evri samting we oli bin lanem long wol ia.
Josef Smit i bin talem se evri loa blong God i bin stat long heven bifo yumi kam long wol. I gat ol blesing long wanwan loa. Yumi mas obei long loa blong yumi save kasem blesing.
Josef Smit i bin talem long Ol Sent abaot Jisas Kraes mo Papa long Heven. Jisas i luk olsem wan man mo hem i gat bodi blong mit mo bun.
Papa long Heven tu i gat bodi we i gat mit mo bun. Hem i stap laef long wan naesfala ples we i saen tumas.
Josef Smit i bin talem tu se Tabu Spirit i wan spirit. Tabu Spirit i nogat wan bodi blong mit mo bun.