“Japta 58: Wan Niu Lida blong Jos: Julae–Ogis 1844,” Ol Doktrin mo Kavenan Stori (2002), 206–8
“Japta 58,” Ol Doktrin mo Kavenan Stori, 206–8
Japta 58
Wan Niu Lida blong Jos
Julae–Ogis 1844
Afta we oli bin kilim Profet Josef Smit, Jos i nogat wan Presiden. Ol Sent oli no sua se huia bae i lida blong olgeta.
Plante long Ol Aposol oli bin stap long ol misin.
Sidney Rigdon hem i bin kaonsela blong Josef Smit. Be hem i no bin obei long Lod mo hem i bin muv aot long Nauvu.
Taem Sidney Rigdon i bin harem se Josef Smit i bin ded, hem i bin kambak long Nauvu. Hem i bin wantem blong kam lida blong Jos.
Ol Aposol we oli bin stap long ol misin oli bin kambak tu long Nauvu taem oli bin lanem abaot ded blong Josef. Brigham Young hem i bin lida blong Ol Aposol. Hem i talem se Lod i bin givim long Ol Aposol raet blong lidim Jos kasem we bae oli jusum wan niu Presiden.
Ol memba blong Jos oli bin gat wan miting. Sidney Rigdon i bin toktok faswan long olgeta mo talem se hem nao hem i mas stap olsem lida blong Jos.
Afta Brigham Young i bin toktok mo talem se Ol Aposol oli sud lidim Jos. Tabu Spirit i bin stap wetem hem. Voes blong Brigham Young i bin saon olsem voes blong Josef Smit, mo ol nara pipol oli bin luk hem i olsem Josef Smit. Ol Sent oli save se God i bin jusum Ol Aposol blong lidim Jos, mo oli bin vot blong akseptem Ol Aposol olsem ol lida blong olgeta. Sidney Rigdon i bin kros tumas. Hem bin gobak long hom blong hem mo i bin statem wan jos blong hemwan. Hem i nomo memba blong Jos blong Jisas Kraes blong Ol Lata-dei Sent.