“Japta 42: Fa Wes, Misuri: Jenuware–Julae 1838,” Ol Doktrin mo Kavenan Stori (2002), 161–63
“Japta 42,” Ol Doktrin mo Kavenan Stori, 161–63
Japta 42
Fa Wes, Misuri
Jenuware–Julae 1838
Josef Smit i bin lego Ketlan, Ohaeo, from se sam pipol longwe oli bin traem blong kilim hem i ded. Hem i winta mo ples i kolkol tumas. Ol enemi blong Josef oli bin folem hem, oli bin karem naef mo masket.
Josef i mas haed. Lod i bin protektem hem mekem se ol enemi blong hem oli no save faenem hem. Wan naet hem i bin stap long sem haos we ol enemi blong hem oli stap long hem, be oli no bin save se hem i stap.
Long wan nara taem ol enemi blong Josef oli no bin luksave hem taem oli bitim hem long rod.
Josef i bin travel kolosap 1000 mael i go long Fa Wes, Misuri. Ol Sent long Misuri oli bin bildim taon ia afta we oli fosem olgeta blong livim ol nara pat blong kantri. Oli bin hapi blong luk Profet.
Sam lida blong Jos long Misuri oli no bin obei long ol komanmen. Sam long olgeta oli bin traem blong gat plante mane. Sam taem oli bin stap kros wetem wanwan long olgeta mo oli no bin agri long wei blong lidim Ol Sent. Sam long olgeta oli bin kros long Josef Smit.
Oli bin sakem Oliva Kowdri, Deved Witma, mo ol nara pipol aot long Jos. Hemia i minim se membasip blong olgeta long Jos oli bin karemaot. Josef i bin harem nogud from se ol man ia oli bin ol fren blong hem.
Oli bin jusum ol nara man blong lidim Jos long Fa Wes. I no long taem afta, Jos i bin stat blong gro bakegen long eria ia.
Long Mei 1838, profet mo ol fren blong hem oli bin stap lukaotem ol nara ples blong Ol Sent oli bildim ol taon. Wan dei oli bin kam long wan spesel ples, we Jisas i bin talem se nem blong ples ia hem i Adam-ondi-Aman. Jisas i bin toktok wetem Adam long ples ia bifo. Adam i bin tekem ol famle blong hem tugeta long ples ia mo hem i bin blesem olgeta bifo hem i ded. Wan dei Jisas mo Adam mo ol nara pipol we oli bin stap stret mo gud, bae oli mit long ples ia bakegen.