Fastok

Bifo long Doctrine and Covenants

Yumi bin laef wetem Papa long Heven bifo yumi kam daon long wol. Yumi nogat ol bodi blong mit mo bun olsem naoia we yumi gat. Yumi ol spirit. Papa blong yumi long Heven i bin mekem wan plan from yumi, blong kasem ol bodi mo kam moa olsem Hem. Hemia oli singaotem plan blong sevem man. Plan ia i bin mekem yumi blong livim Hem blong smol taem mo kam long wol ia. Sapos yumi folem plan ia, bae yumi save gobak blong laef wetem Hem.

Jisas i bin laef wetem yumi long heven. Hem i bin wantem blong folem plan blong Papa long Heven. Jisas i bin talem se bae Hem i kam long wol blong mekem i posibol blong yumi save gobak long heven.

Setan tu i bin laef wetem yumi long heven. Hem i no bin folem plan blong Papa long Heven, mekem se Papa long Heven i bin mekem hem i kamaot. Setan i bin wantem blong spolem gud plan blong sevem man.

Jisas i bin mekem wol ia blong ol pikinini blong Papa long Heven oli laef long hem. Jisas i bin sendem ol profet blong tijim ol pipol blong oli gud.

Sam pipol oli bin obei long ol profet. Ol narafala pipol oli bin obei long Setan mo oli kam nogud.

OlTesteman i tokbaot ol pipol we oli bin laef bifo Jisas i bon. Ol profet oli bin tijim ol pipol ia se Jisas bae Hem i kam long wol blong mekem i posibol long olgeta blong oli save klin long ol sin mo blong oli winim ded.

Buk blong Momon i tokbaot ol narafala pipol we oli bin laef longtaem bifo. Ol pipol ia oli bin kamaot long Jerusalem mo go long Amerika. Ol profet oli bin tijim tu ol pipol ia abaot Jisas. Jisas i bin visitim olgeta afta we Hem i bin laef bakegen long ded.

Niu Testeman i tokbaot laef blong Jisas long wol ia. I tokbaot taem Hem i bon, ol tijing blong Hem, mo ded blong Hem mo taem Hem i bin laef bakegen long ded. Jisas i bin tijim ol pipol abaot gospel blong Hem. Hem i bin tijim olgeta blong oli obei long ol komanmen blong Papa long Heven.

Jisas i bin jusum twelef man blong kam Ol Aposol mo Hem i bin givim prishud long olgeta. Hem i bin statem Jos blong Hem. Plante pipol oli bin lavem Jisas. Oli bin stret mo gud mo oli bin obei long ol tijing blong Hem.

Setan i no wantem ol pipol blong folem Jisas. Hem i stap temtem o traem ol pipol blong oli no laekem Jisas, mo sam long olgeta oli bin nilim Hem long kros mo kilim Hem i ded.

Tri dei afta we Jisas i ded, Hem i bin laef bakegen long ded. Hem i bin laef bakegen! Hem i bin toktok wetem Ol Aposol blong Hem mo talem long olgeta blong tijim gospel blong Hem long evri pipol. Jisas i bin visitim tu ol pipol we oli stret mo gud long Amerika. Afta Hem i bin go long heven blong stap wetem Papa blong Hem.

Ol Aposol oli ol lida blong Jos blong Jisas Kraes. Oli bin go long plante ples mo tijim ol pipol abaot Jisas. Plante pipol oli bin bilif long Hem mo oli bin baptaes. Ol Aposol oli bin givim prishud long ol man we oli stret mo gud. I bin gat plante memba blong Jos.

Setan i bin wantem blong spolem gud Jos. Hem i bin temtem ol pipol blong oli stop blong no bilif long Jisas. Oli bin kilim ded Ol Aposol mo plante nara memba blong Jos. Afta i nomo gat ol lida blong gaedem Jos. Papa long Heven i bin tekembak prishud long wol.

Jos ia we Jisas i bin statem i bin lus. Ol pipol oli bin statem ol jos blong olgeta nomo. Oli bin jenisim plante long ol tijing blong Jisas. Oli bin jenisim tu sam long ol komanmen.

Plante handred yia i bin pas. I bin gat plante jos long wol, be i nogat wan long olgeta i tru Jos blong Jisas Kraes. Ol memba blong ol jos ia oli bin bilif long Jisas, be ol jos ia oli nogat tru gospel. Oli nogat atoriti blong prishud. Oli nogat ol profet o ol aposol.

Jisas i bin talem se Hem bae i kam long wol bakegen. Be Jos blong Hem, bae i mas kambak fastaem. Prishud bae i kambak tu. Ol blesing ia bae oli kambak bakegen tru long Profet Josef Smit.

Papa long Heven i bin singaotem ol profet mo ol aposol bakegen blong lidim Jos long dei blong yumi. Jisas i bin givim ol revelesen long ol profet mo ol aposol blong oli talem long yumi wanem we Hem i wantem yumi blong save mo mekem.

Ol Doktrin mo Kavenan i wan buk blong ol revelesen we i kam long Jisas. Plante long ol revelesen ia oli bin givim long Profet Josef Smit. Long ol revelesen ia, Jisas i stap givim ol daereksen long Jos blong Hem mo tijim ol doktrin blong gospel blong Hem.

Buk ia we yu stap ridim i stap tokbaot sam long ol revelesen insaed long Doctrine and Covenants. I tokbaot tu sam long ol stori abaot restoresen mo eli histri blong Jos blong Jisas Kraes long ol las dei ia.