“Japta 22: Ol Sent oli Stat blong Stap Gud long Misuri: Julae–Ogis 1831,” Ol Doktrin mo Kavenan Stori (2002), 84–88
“Japta 22,” Ol Doktrin mo Kavenan Stori, 84–88
Japta 22
Ol Sent oli Stat blong Stap Gud long Misuri
Julae–Ogis 1831
Profet Josef Smit, Sidney Rigdon, Edward Partridge, mo ol narawan oli bin go long Misuri. Oli bin glad tumas blong go from se oli bin wantem blong lanem moa abaot olsem wanem blong bildim siti blong Saeon.
Oli bin go haf rod long wan bot. Taem oli bin kasem Misuri, Josef i bin wantem blong wokbaot. Hem i bin save se graon blong Misuri i tabu, mo hem i bin go blong luk.
Josef wetem ol fren blong hem oli bin wokbaot samples long 300 mael i krosem Misuri blong go long Jekson Kaonti.
Sam dei afta Josef Smit mo ol fren blong hem oli bin kasem Jekson Kaonti, Ol Sent long Niu Yok oli kasem longwe.
Ol misinari long Ketlan oli bin kasem Jekson Kaonti tu.
Josef Smit mo Bisop Edward Partridge i bin talem long ol pipol wanem bae oli mekem. Sam bae oli pem graon long Misuri. Oliva Kowdri mo William W. Phelps i mas statem ol skul. Bae tufala i jusum mo raetem sam buk tu, blong ol pikinini oli ridim long skul.
Josef i bin wantem blong save se weaples stret bae oli bildim siti blong Saeon. Hem i bin prea long Papa long Heven, mo hem i bin kasem ansa long prea blong hem.
Doctrine and Covenants 57, seksen heding
Lod i bin talemaot se siti blong Saeon bae oli bildim long Jekson Kaonti, long Misuri. Hem i bin talemaot tu se wan tempol bae oli bildim long Indipendens, wan taon long Jekson Kaonti (luk long map long pej 89). Lod i bin promes se olgeta we oli kipim ol komanmen blong Hem mo stap strong kasem en long ol hadtaem wetem fet bae oli save werem hat blong king wetem glori.
Lod i bin talem long Ol Sent long Misuri se bae oli mas obei long ol loa blong kantri. Bae oli sud luksave samting olgeta nomo blong mekem plante gud samting. Lod i bin promesem tu se taem ol pipol oli sakem sin, Hem bae i nomo tingbaot sin ia bakegen.
Lod i bin talem se Sidney Rigdon i sud dediketem graon ia. Sidney Rigdon i bin askem Ol Sent sapos oli bin kasem graon ia wetem tangkyu we i kam long ol hat mo sapos oli promes blong holem ol komanmen. Oli bin ansa “Yes,mifala i promes”. Afta Sidney Rigdon i bin prea mo dediketem graon ia.
Long nekis dei, Josef Smit, Oliva Kowdri, Sidney Rigdon, mo ol nara lida oli bin holem wan miting long wan spesel ples long Indipendens. Oli bin ridim ol skripja mo prea. Afta Josef Smit i bin dediketem ples ia blong oli bildim wan tempol long hem.
Long nekis dei evri Sent long Misuri oli bin go long wan konfrens. Oli bin fulap long Tabu Spirit, mo oli bin glad tumas. Josef i bin talem long olgeta se God bae i blesem olgeta sapos oli gat strong fet.
Sam dei afta, Jisas i bin givim long Josef wan revelesen abaot Sabat dei, o Sandei. Jisas i bin talem se Sandei hem i Tabu dei blong Hem. Long Sandei yumi sud mekem ol samting blong helpem yumi tingbaot Hem. Yumi sud spel long ol wok blong yumi. Yumi sud go long jos mo tekem sakramen. Yumi sud sakem sin blong yumi. Yumi sud livim kakae mo prea. Yumi sud talem tangkyu oltaem from ol blesing blong yumi.
Ol Sent we oli bin mekem samting ia, bae oli gat evri gud samting we oli wantem. Bae oli hapi, bae oli gat pis, mo bae oli kasem laef we i no save finis.