“Japta 35: Ol Sent oli Bin Livim Jekson Kaonti, Misuri: Septemba–Disemba 1833,” Ol Doktrin mo Kavenan Stori (2002), 132–34
“Japta 35,” Ol Doktrin mo Kavenan Stori, 132–34
Japta 35
Ol Sent oli Bin Livim Jekson Kaonti, Misuri
Septemba–Disemba 1833
From se ol rabis man long Jekson Kaonti oli bin mekem tumas trabol, Ol Sent oli bin traem kasem help long gavna blong Misuri. Wiliam Phelps mo Oson Hyde i bin go blong luk gavna. Tufala i bin talem long hem abaot ol rabis man mo olsem wanem oli bin spolem gud ol hom blong olgeta.
Gavna i no save helpem olgeta. Hem i talem long olgeta blong oli askem ol jaj blong oli helpem olgeta. Be ol jaj oli ol fren blong ol rabis man, mo oli no helpem olgeta nating.
Ol rabis man oli bin atakem Ol Sent blong sikis dei. Oli bin brekem daon ol hom blong olgeta, oli faetem ol man, mo brekem wan stoa mo sakem evri samting long floa.
Ol rabis man oli mekem Ol Sent oli livim ol hom blong olgeta. Taem ia i taem blong kolkol, mo plante pipol oli bin ded from oli nogat hom long taem blong kolkol mo taem blong ren. Ol Sent oli bin go long ol nara pat blong Misuri blong oli ronwe long ol rabis man.
Ol Sent oli harem nogud. Ol hom blong olgeta, ol fam, mo ol stoa oli bin smasgud. Oli bin stilim ol animol blong olgeta. Gavna mo ol jaj oli no save helpem olgeta.
Be Ol Sent oli gat fet yet long God. Oli save se Jos blong Jisas Kraes i tru, mo oli save se Josef Smit i wan profet blong God.
Taem Ol Sent oli fesem hadtaem long Misuri, Josef Smit i stap long Ketlan, Ohaeo. Jisas i bin givim wan revelesen long Josef mo eksplenem from wanem Ol Sent long Misuri oli gat trabol.
Jisas i bin talem se sam long Ol Sent oli no bin obei long ol komanmen. Oli no bin gat yuniti, blong stap olsem ol pipol blong Saeon. Sam long olgeta oli raorao mo oli minim blong talem ol samting we i no stret long olgeta wanwan bakegen. Sam oli bin gat jalus, mo sam oli no stap serem ol samting blong olgeta.
Nomata long ol problem ia, Jisas i bin talem se Hem i bin lavem Ol Sent mo bae Hem i no save fogetem olgeta. Hem i bin talem se bae oli sud gat kamfot from se tru long klin hat bae samdei bae oli gobak blong bildim Saeon. Jisas i bin talem long Ol Sent blong rere from taem bae Hem i kambak long wol bakegen. Taem bae Hem i kam, ol pipol bae oli lavem wanwan long olgeta mo i gat pis. Olgeta we oli fesem hadtaem from oli bin folem Jisas bae oli gat blesing. Setan bae i nogat paoa blong traem ol pipol. Bae i nogat ded olsem we yumi save tedei. Evriwan bae oli hapi.