“Japta 44: Taeting: Julae 1838,” Ol Doktrin mo Kavenan Stori (2002), 165–66
“Japta 44,” Ol Doktrin mo Kavenan Stori, 165–66
Japta 44
Taeting
Julae 1838
Lod i bin talem long Josef Smit se bae ol memba blong Jos oli sud pem taeting. Taem Josef i stap long Fa Wes, Misuri, hem i bin prea blong askem se hamas taeting Ol Sent oli sud pem. Lod i bin talemaot se Ol Sent oli sud pem wan aot long ten long evri samting we oli gat blong pem taeting.
Doctrine and Covenants 119, seksen heding
Sapos oli kasem 100 vatu, oli sud givim 10 vatu blong taeting. Sapos oli kasem 1000 vatu, oli sud givim 100 vatu.
Ol Sent oli pem taeting long narafala fasin tu. Oli givim wan aot long ten blong ol krop we oli planem, olsem ol raes mo kon. Oli givim tu wan aot long ten faol blong olgeta mo ol nara animol. Oli bin pem taeting tu long melek mo ol vejetebol.
Taeting, oli yusum blong bildim mo riperem ol tempol, ol miting haos, mo ol nara Jos bilding. Taeting, oli yusum tu blong helpem misinari wok. Antap long hemia, oli yusum taeting tu blong helpem blong pem translesen mo pablisim ol skripja mo ol nara buk blong Jos.
Taeting oli yusum blong helpem ol memba. Taeting mo ol nara ofring oli yusum blong pem kakae mo ol klos blong ol pipol we oli stap long nid.
Lod i bin stap wantem yumi blong pem wan ful taeting. Yumi givim taeting blong yumi long bisop. Bisop i sendem taeting i go long stamba ofis blong Jos, we profet mo ol nara lida blong Jos oli prea from blong disaed olsem wanem blong yusum.
Papa long Heven i givim gudfala blesing long Ol Sent we oli pem taeting. Ol Sent we oli no pem taeting bae oli no save gat evri blesing ia. Baebol i talem se Ol Sent we oli no pem taeting oli stap stilim God.