“Japta 48: Josef Smit I Askem Help long Presiden: Maj–Novemba 1839,” Ol Doktrin mo Kavenan Stori (2002), 176–79
“Japta 48,” Ol Doktrin mo Kavenan Stori, 176–79
Japta 48
Josef Smit I Askem Help long Presiden
Maj–Novemba 1839
Josef Smit i bin raetem ol leta i go long Ol Sent taem hem i bin stap long kalabus long Libeti. Hem i bin talem long olgeta blong raetem daon ol nogud fasin we ol rabis man oli bin mekem long olgeta. Hem i bin talem se oli sud sendem wanem oli bin raetem long ol lida blong kantri.
Josef i bin talem long Ol Sent blong raetem ol nem blong ol pipol we oli bin mekem nogud long olgeta. Hem i bin talem se bae oli talemaot olsem wanem oli bin spolem ol hom mo ol animol blong olgeta.
Afta Josef mo ol fren blong hem oli bin stap long kalabus long Libeti moa long fo manis, sam gad oli bin tekemaot olgeta i go long nara taon blong mekem nogud long olgeta. Josef mo ol fren blong hem oli bin pem tu (2) hos long ol gad. Oli bin givim sam klos long ol gad blong pem wan hos mo oli bin promes blong pem nara hos afta.
Wan naet sam long ol gad oli drong mo oli bin go slip. Nara gad i bin helpem Josef mo ol fren blong hem oli kamaot.
Josef mo ol fren blong hem oli klaem long tufala hos, wan afta wan. Afta 10 dei oli kam tru long Kwensi, Ilinoa, ples we oli faenem ol famle blong olgeta.
Josef mo ol fren blong hem oli bin hapi blong stap wetem ol famle blong olgeta bakegen.
Ol Sent oli bin wantem blong faenem wan ples long Ilinoa blong bildim siti blong olgeta. Oli bin pem sam graon we oli wetwet mo i gat plante sofmad narasaed long Misisipi Reva. Josef mo Ol Sent oli bin wok had blong digim ol dren blong wota long graon ia blong oli save bildim ol hom mo planem ol garen blong olgeta. Oli bin stat blong bildim wan naes siti, we oli singaotem Nauvu. Nauvu i minim se, i naes.
Taem Ol Sent oli bin stat blong bildim Nauvu, Josef Smit i bin go blong luk presiden blong Yunaeted Stet. Josef i bin talem long presiden abaot ol rabis man long Misuri. Hem i bin talem long hem olsem wanem ol rabis man oli bin bonem ol hom blong Ol Sent, oli bin stilim ol animol blong olgeta, mo fosem olgeta blong aot long lan blong olgeta.
Josef i bin talem se oli bin kilim ded sam long olgeta Sent. Ol narawan oli bin putum olgeta long kalabus. Hem i bin soem long presiden wanem Ol Sent oli bin raetem abaot ol nogud fasin we ol rabis man oli bin mekem long olgeta. Josef i talem se ol lida long Misuri oli no bin helpem Ol Sent. Hem i bin askem presiden blong helpem olgeta.
Presiden i talem se hem i save se Ol Sent oli bin safa, be bae hem i no save mekem eni samting blong helpem olgeta. Sapos hem i helpem Ol Sent, ol pipol long Misuri bae oli kros.
Josef i bin harem nogud tumas from se presiden bae i no save helpem Ol Sent. Hem i bin gobak long Nauvu.