“Japta 33: Wan Revelesen abaot Jisas Kraes: Mei 1833,” Ol Doktrin mo Kavenan Stori (2002), 126–27
“Japta 33,” Ol Doktrin mo Kavenan Stori, 126–27
Japta 33
Wan Revelesen abaot Jisas Kraes
Mei 1833
Long wan long ol revelesen i go long profet Josef Smit, Jisas i bin talem abaot Hemwan. Hem i talem se bae ol pipol bae oli luk fes blong Hem mo save Hem sapos oli obei long ol komanmen blong Hem mo prea.
Jisas i bin talem se Hem i Laet blong Wol. Hem i soem yumi stret fasin blong laef.
Jisas i bin laef wetem Papa long Heven bifo oli mekem wol ia. Jisas i bin krietem wol ia mo evri samting we i stap insaed long hem.
Fastaem Jisas i no bin olsem Papa blong Hem long Heven. Hem i no bin save evri samting we Papa blong Hem i save, mo Hem i no bin gat evri paoa mo glori we Papa blong Hem i gat. Jisas i bin traehad blong kam olsem Papa blong Hem. Sloslo Hem i bin kasem paoa mo glori blong Papa blong Hem.
Jisas i bin talem se yumi sud obei long ol komanmen blong God. Taem yumi obei, bae yumi kam blong save evri samting. Yumi save kam olsem God tu mo kasem fulnes blong ol blesing blong Hem.
Jisas i bin talem se Setan i no wantem ol pipol blong save trutok mo kam olsem God. Jisas i bin talem long Josef blong tijim famle blong hem abaot trutok.
Jisas i bin talem tu long Frederik G. Wiliam mo Sidney Rigdon blong tijim ol famle blong olgeta abaot trutok mo blong obei long ol komanmen. Afta bae Setan bae i nogat paoa ova long olgeta.