“Japta 6: Oli Givim Prishud long Josef mo Oliva: Mei 1829,” Ol Doktrin mo Kavenan Stori (2002), 26–30
“Japta 6,” Ol Doktrin mo Kavenan Stori, 26–30
Japta 6
Oli Givim Prishud long Josef mo Oliva
Mei 1829
Josef Smit mo Oliva Kowdri i stap transletem Buk blong Momon. Tufala i bin ridim abaot baptaes mo tufala i bin wantem blong save moa abaot baptaes.
Josef mo Oliva i bin tingting blong askem God. Tufala i gat fet se bae Hem i save helpem tufala blong lanem trutok. Long 15 Mei 1829, tufala i bin go long bus mo prea.
Wan mesenja blong heven i bin kam long Josef mo Oliva. Hem i Jon Baptaes, we hem i bin baptaesem Jisas longtaem bifo. Wan laet we i saen we i saen i bin raonem hem.
Jon Baptaes i bin kam blong givim Aronik Prishud long Josef mo Oliva. Prishud ia hem i paoa blong God. Aronik Prishud i tekem tu wetem hem atoriti blong baptaesem pipol.
Jon Baptaes i bin talem long Josef mo Oliva blong baptaesem wanwan long tufala. Josef i bin baptaesem Oliva, mo afta Oliva i bin baptaesem Josef. Tufala i bin draon andanit long wota taem tufala i baptaes.
Long taem bifo, Jon Baptaes i bin baptaesem Jisas long sem fasin. Jisas i bin draon andanit long wota taem Hem i bin baptaes.
Josef mo Oliva i bin fulap long Tabu Spirit afta long taem we tufala i bin baptaes. Tabu Spirit i bin talem long tufala, se tru Jos blong Jisas Kraes, i no longtaem bae i stap bakegen long wol.
Josef mo Oliva i bin talemaot long ol gud fren blong tufala se tufala i bin baptaes. Tufala i bin talem tu abaot prishud. Be Josef mo Oliva i no bin talem samting ia long ol nara pipol stret afta. Tufala i bin save se sam pipol bae oli no save bilivim tufala mo bae oli mekem sam trabol long tufala.
I no longtaem afta, trifala nara mesenja blong heven oli bin kam. Olgeta ia i gat Pita, Jemes, mo Jon, oli ol tri (3) stret Aposol blong Jisas. Pita, Jemes, mo Jon oli bin givim Melkesedek Prishud long Josef Smit mo Oliva Kowdri. Hemia oli bin singaotem tu se “hae” prishud.
Taem oli bin putumbak prishud, oli bin givim long ol man we oli stret mo gud, raet blong help blong mekem wok blong God long wol ia. Ol man we oli holem Melkesedek Prishud bae oli ol lida blong Jos. Oli save givim ol blesing long pipol. Oli save givim presen we i Tabu Spirit long ol pipol. Restoresen blong prishud i wan bigfala blesing.