“Japta 57: Oli Bin Kilim Profet: Jun 1844,” Ol Doktrin mo Kavenan Stori (2002), 201–5
“Japta 57,” Ol Doktrin mo Kavenan Stori, 201–5
Japta 57
Oli Bin Kilim Profet
Jun 1844
Olgeta we oli agensem Jos oli bin blemem Josef Smit from ol problem ia long Nauvu, mo oli bin wantem hem mo ol nara lida blong oli arestem olgeta. Be afta oli bin arestem Josef, wan jaj i bin talem se hem i neva mekem samting rong mo hem i bin letem hem i go.
Ol rabis man oli bin kros tumas from oli bin letem Josef Smit hem i go fri. Oli mekem blong atakem Nauvu. Oli bin mekem strong toktok tu se bae oli putum kolta mo feta long wan long ol jaj. Josef i bin askem gavna blong Ilinoa blong stopem ol rabis man, be gavna i bin bilif long ol giaman toktok blong ol rabis man mo hem i no bin helpem olgeta.
Josef Smit i bin save se bae oli putum hem bakegen long kalabus, mo hem i bin fraet se bae brata blong hem tu Haeram bae oli putum hem long kalabus. Josef i bin talem long Haeram blong tekem famle blong hem mo go long nara siti, be Haeram i no save lego brata blong hem.
Josef Smit i bin filim se sapos hem mo Haeram i aot long Nauvu, bae ol rabis man bae oli no mekem nogud long Ol Sent. Tufala i bin mekem tingting blong krosem reva mo haed. Afta bae tufala i go long wes blong faenem nara ples blong ol memba blong Jos blong bae oli go stap long hem.
Sam pipol oli stap tingting se Josef Smit i bin ronwe from se hem i bin fraet. Emma Smit, waef blong Josef Smit, i bin sendem sam fren blong faenem hem mo talem long hem blong kambak. Josef i stap tingting se bae oli kilim hem sapos hem i gobak long Nauvu, be hem i bin mekem olsem ol fren blong hem oli bin wantem hem blong mekem.
Long dei ia afta Josef mo Haeram i bin gobak long Nauvu, tufala mo ol lida blong siti oli bin go long Katej, wan taon hem i abaot 20 mael longwe. Long Katej oli bin arestem olgeta from ol giaman rong, mo oli bin putum Josef, Haeram, mo sam long ol fren blong tufala, long kalabus kasem taem oli pas long kot.
Josef, Haeram, mo ol fren blong tufala oli bin stap long kalabus blong tri dei. Long taem ia, ol rabis man oli tritim nogud olgeta mo oli talem ol rabis toktok abaot olgeta. Taem oli stap long kalabus, Josef mo ol fren blong hem oli bin prea mo ridim Buk blong Momon. John Taylor i bin singsing long wan long ol singsing blong Josef we hem i stap laekem tumas, singsing ia i abaot Jisas.
Long wan aftenun long 27 Jun 1844, Josef, Haeram, John Taylor, mo Willard Richards oli stap yet long kalabus long Katej. Long faef klok, wan grup blong ol rabis man we oli bitim 100 man, oli bin atakem kalabus. Sam long ol memba blong ol rabis man oli sut long ol windo, mo ol nara man oli ron bitim gad mo oli go andap long lada long rum we Josef mo ol fren blong hem oli bin stap.
Ol brata oli bin wantem holemtaet doa i sat, be i gat plante pipol tumas i mekem se oli no save difendem olgeta. Ol rabis man oli bin pusum doa i open mo oli bin sutum Haeram Smit. Taem Josef i bin luk se Haeram i ded, hem i krae strong, “O, dia brata Haeram!” Ol rabis man oli bin sutum John Taylor tu, hem i bin kasem kil be hem i no ded. Oli no bin sutum Willard Richards.
Afta oli bin sutum Haeram mo John Taylor, Josef Smit i bin ron i go long windo. Oli bin sutum hem long tu bolet, tufala i faea tru long doa blong rum mo namba tri bolet i faea aotsaed long kalabus. Hem i bin krae, “O Lod God blong mi!” mo hem i bin foldaon aot long windo. Profet i bin ded. Hem i bin givim laef blong hem from gospel blong Jisas Kraes.
Oli bin tekem bodi blong Josef mo Haeram Smit i go long Nauvu, ples ia nao oli bin berem tufala. Ol famle blong tufala mo ol nara memba blong Jos oli bin harem nogud tumas.
Profet Josef Smit i bin mekem plante impoten wok. Hem i bin transletem Buk blong Momon. Jisas i bin putumbak Jos blong Hem tru long Josef. Josef Smit i bin sendem ol misinari blong tijim gospel long nara kantri. Hem i bin lidim Ol Sent blong oli bildim wan naesfala siti. God i bin laekem Josef Smit. Ol Sent tu oli bin lavem hem. Josef Smit i bin mekem plante samting we i nogat nara man i save mekem be Jisas Kraes nomo, blong yumi save sef blong taem we i no save finis.