“Japta 36: Kamp blong Saeon: Febware–Jun 1834,” Ol Doktrin mo Kavenan Stori (2002), 135–39
“Japta 36,” Ol Doktrin mo Kavenan Stori, 135–39
Japta 36
Kamp blong Saeon
Febware–Jun 1834
Taem ol pipol long Misuri oli mekem Ol Sent oli livim ol hom blong olgeta, Josef Smit hem i bin kam kolosap 1000 mael longwe long Ketlan, Ohaeo. Hem i bin prea blong save olsem wanem blong helpem Ol Sent long Misuri.
Long wan revelesen, Jisas i bin talem long Josef se sam long ol man long Jos oli sud go long Misuri blong helpem Ol Sent. Josef Smit i bin stap olsem lida blong olgeta. Lod i bin wantem 500 man blong go.
Josef i bin obei long Lod. Hem i bin talem long Ol Sent se 500 man oli sud go long graon blong Saeon long Misuri. Be afta long sam wik, i gat 100 nomo oli talem se bae oli go.
Olgeta 100 man ia oli aot long Ketlan mo stat blong go long Misuri. Ol grup ia oli singaotem olgeta Kamp blong Saeon. Ol man ia oli wokbaot 35 mael long wan dei, oli bin hanggri tumas, tosta, mo hot. Oli bin kamp tugeta long naet.
Long rod, i gat 100 moa man oli bin joenem olgeta. Be yet i no plante man olsem Lod i bin wantem.
Ol memba blong kamp oli bin travel 1000 mael. Sam long olgeta oli bin talem se trip ia i had tumas. Oli bin komplen mo raorao. Oli bin tok agensem Josef Smit taem i no bin gat inaf kakae. Oli talem se hem i no wan gud lida. Josef i bin talem long ol man ia blong oli sakem sin, o bae oli gat sik mo ded.
Plante long ol man long kamp oli stret mo gud. Oli bin helpem Josef mo obei long ol komanmen blong God.
I no longtaem afta, Kamp blong Saeon i kam kolosap long Jekson Kaonti, Misuri. Oli bin kamp long saed blong wan reva.
Ol memba blong ol rabis man oli bin spae long kamp mo save wanem i bin hapen. Long naet ol rabis man oli kam kolosap long kamp mo oli bin plan blong kilim olgeta.
God i bin protektem Kamp blong Saeon taem Hem i sendem wan bigfala hariken. Win i bloem daon ol tri. Ol bigfala ston blong aes oli foldaon long skae, mo laetning i hitim ol tri. Ol reva oli ron strong mo karemaot graon. Wan man long grup blong ol rabis man ia i bin ded long laetning, mo ol nara man oli bin kasem kil long hariken ia. I nogat wan man long Kamp blong Saeon we i bin kasem kil.
Ol man long grup blong ol rabis man oli bin fraet mo ronwe. Oli no bin mekem nogud long eniwan long Kamp blong Saeon.
Tri dei afta long hariken ia, Lod i bin givim long Josef Smit wan revelesen. Hem i bin talem se Ol Sent oli mas wet blong bildim siti blong Saeon. Oli nid blong kam blong obei moa, givim ol samting, mo mas gat yuniti. Oli nidim tu blong lanem moa abaot ol samting we Lod i bin askem olgeta blong mekem.
Lod i bin talem tu long ol man blong Kamp blong Saeon se oli no sud faet agensem ol rabis man long Misuri. Sam long ol man ia oli bin filim nogud abaot hemia. Oli filim se trip ia i no impoten sapos oli no faet blong helpem Ol Sent long Misuri.
Afta long sam dei i pas, plante man long Kamp blong Saeon oli bin sik tumas. Fotin long olgeta oli bin ded. Profet i bin talem long ol man ia se sik ia bae i gowe sapos oli putum tingting blong olgeta daon mo sakem sin. Promes ia i bin hapen.
Long en blong Kamp blong Saeon, Josef Smit i bin mit wetem Ol Sent long Misuri mo jusum ol man blong hae kaonsel. Sam dei i pas, hem wetem plante long ol man long Kamp blong Saeon oli bin stat blong gobak long Ketlan.
Iven ol man long Saeon Kamp oli no bin helpem Ol Sent long Misuri, be yet kamp ia i bin wan gud wan. I bin help blong priperem Brigham Young mo ol narawan blong lidim Jos. Oli bin mekem blong pruvum sapos oli save obei mo mekem sakrifaes blong mekem wok blong Lod. Sam manis i pas, plante long olgeta we oli fetful oli singaotem olgeta olsem ol lida blong Jos.