“Japta 29: Wan Revelesen abaot Prishud: Septemba 1832,” Ol Doktrin mo Kavenan Stori (2002), 113–16
“Japta 29,” Ol Doktrin mo Kavenan Stori, 113–16
Japta 29
Wan Revelesen abaot Prishud
Septemba 1832
Plante man blong Jos oli bin go long misin. Taem oli kambak long hom, oli bin go blong luk Josef Smit long Ketlan.
Ol man oli bin talem long Josef abaot misin blong olgeta. Oli bin baptaesem plante pipol. Oli bin hapi abaot misin blong olgeta, mo Josef hem i bin hapi tu.
Evri misinari ia oli gat prishud. Prishud hem i paoa blong God. Ol misinari oli bin wantem blong save moa abaot prishud.
Jisas i bin givim long Josef wan revelesen abaot prishud. Jisas i bin talem long hem abaot sam long ol man ia we oli gat prishud bifo. Adam, hem i fas man we hem i laef long wol, hem i bin gat prishud.
Evri profet long OlTesteman oli bin gat prishud. Sam long ol profet ia i gat Inok, Noa, Moses, Melkesedek, mo Ebraham. Melkesedek i bin givim prishud long Ebraham.
Jisas i bin talem se ol man oli mas holem prishud blong lidim Jos blong Hem. Ol man we oli holem prishud oli save baptaesem ol pipol mo givim presen we i Tabu Spirit long olgeta. Oli save blesem sakramen. Oli save givim ol blesing long ol sik pipol. Evri samting ia i helpem Ol Sent long taem blong laef blong olgeta long wol mo priperem olgeta blong laef bakegen wetem Papa long Heven.
Jisas i bin talem long Josef se ol man oli mas stret mo gud blong kasem prishud. Olgeta we oli kasem oli mekem wan kavenan, o promes, wetem God. Oli promes blong oli fetful mo yusum prishud blong helpem nara pipol. God i gat ol promes se sapos oli fetful, bae oli kam ol spesel pikinini boe blong Hem. Wan dei Hem bae i serem wanem we Hem i gat wetem olgeta.
Jisas i bin talem long Josef Smit se sam moa man oli sud go long misin. Oli sud prijim gospel long evri ples long wol. Oli sud tijim ol pipol blong sakem sin, mo oli sud baptaesem olgeta mo givim long olgeta presen we i Tabu Spirit.
Jisas i bin talem se ol misinari bae oli gat blesing sapos oli wok had. Ol enjel bae oli helpem olgeta, mo Papa long Heven bae i givim long olgeta wanem oli nidim.
Revelesen ia i bin en. Josef mo ol misinari oli bin hapi blong save moa abaot prishud. Oli wantem blong yusum prishud long stret fasin.
Long revelesen we Josef i jes kasem, Jisas i bin talem long Josef olsem wanem ol man oli sud yusum prishud. Ol man oli no sud yusum prishud olsem se olgeta oli bos blong talem evri samting o minim se oli save moa samting. God bae i givim prishud paoa long ol man we oli stret mo gud nomo.
Ol man oli sud yusum prishud wetem lav mo fasin blong stap kaen. Olgeta we oli lisin long Tabu Spirit bae oli gat prishud paoa evritaem.