“Japta 53: Trabol long Nauvu: Mei–Ogis 1842,” Ol Doktrin mo Kavenan Stori (2002), 191–93
“Japta 53,” Ol Doktrin mo Kavenan Stori, 191–93
Japta 53
Trabol long Nauvu
Mei–Ogis 1842
Ol taosen long Ol Sent oli bin go blong stap long Nauvu. Oli bin bildim wan naesfala siti mo oli stat blong bildim wan tempol.
Ol Sent oli bin jusum John C. Bennett blong kam meya blong Nauvu. Fastaem hem i bin wan gud meya, be afta hem i stat blong mekem rabis samting mo stap agensem Josef Smit.
Ol pipol long Nauvu oli bin wantem blong gat wan spesel holidei, wetem ol soldia blong Nauvu Lejin we bae oli bin maj long pablik.
John Bennett i bin mekem tingting se ol soldia oli sud gat wan giaman faet.
Mista Bennett i bin askem Josef Smit blong lidim wan grup blong ol soldia long faet, be Josef i no save mekem. Tabu Spirit i bin talem long Josef se John Bennett i bin planem blong yusum faet ia blong kilim Josef Smit. John Bennett i bin kros.
From se John Bennett i bin go agensem Profet mo mekem sam nogud samting, oli bin sakemaot hem long Jos mo hem i nomo meya blong Nauvu. Josef Smit i bin kam niu meya.
John Bennett i bin kros. Hem i bin kamaot long Nauvu mo stat blong talem mo raetem sam rabis toktok abaot Josef Smit mo Jos. Hem i bin mekem sam pipol oli bin joenem hem.
Josef Smit i bin talem long sam man long Jos se bae Ol Sent bae oli gat moa trabol. Samdei bae oli mas livim Nauvu. Josef i bin luk se bae oli go long Ol Roki Maonten mo bildim ol siti longwe. Bae oli obei long God mo bae oli kam ol strong pipol.