“Japta 61: Momon Soldia Ami: Jun 1846–Julae 1847,” Ol Doktrin mo Kavenan Stori (2002), 217–21
“Japta 61,” Ol Doktrin mo Kavenan Stori, 217–21
Japta 61
Momon Soldia Ami
Jun 1846–Julae 1847
Taem Ol Sent oli bin stap long Aeowa, Kapten James Allen blong Yunaeted Stet Ami i bin kam blong luk Brigham Young. Kapten Allen i bin talem se presiden blong Yunaeted Stet i bin wantem 500 man blong Jos blong joenem ami blong help long wan faet wetem Meksiko.
Nating hemia i bin wan hadtaem tumas blong Ol Sent mo oli nidim ol man blong help long rod we i go long Wes, Brigham Young i bin leftemap tingting blong olgeta blong go. Ol mane we bae oli pem olgeta long hem bae oli save helpem ol famle blong olgeta, Ol Sent we oli pua, ol misinari. Blong mekem wok insaed long ami bae i soem tu strong fet blong ol memba blong Jos we oli gat long kantri blong olgeta.
Kapten Allen i bin toktok long ol man ia, mo 541 long olgeta oli bin joenem ami. Oli singaotem olgeta Momon Soldia Ami.
Brigham Young i bin talem long ol man ia se bae oli mas kam ol gud soldia long ami. Oli sud tekem Baebol mo Buk blong Momon wetem olgeta. Oli mas mekem olgeta i stret, klin, mo soem respek oltaem. Oli no sud swea o plei kad. Brigham Young i bin talem long ol man ia blong oli obei long ol komanmen blong God. Sapos oli mekem, bae oli no save faet.
Long Julae 1846 ol man blong Momon Soldia Ami oli bin go wetem Kapten Allen. I bin had tumas long olgeta blong oli livim ol woman blong olgeta mo pikinini long wan hadtaem olsem. Be Brigham Young i bin talem long olgeta se bae oli lukaotem gud ol famle blong olgeta, long taem ia we bae olgeta oli go.
Momon Soldia Ami oli bin go long Fot Leavenwot, ples ia oli bin kasem ol samting blong olgeta. Afta oli bin travel Saotwes i go stret long Kalifonia. Ol famle blong sam soldia oli bin go wetem olgeta.
I bin had tumas blong ol ami blong ol soldia ia oli travel. Ol rod oli nogud tumas, mo samtaem ol wagun oli stak. I bin had tumas blong faenem wota blong dring. Sam taem i nogat tri blong ol man oli spel andinit long hem.
Sam long ol pipol ia oli bin sik. Kapten i bin mekem tingting se ol woman mo ol pikinini, wetem olgeta soldia we oli sik, oli sud go long Kolorado mo stap long taon ia blong Pueblo. Bae oli spendem taem ia blong kolkol longwe. Long nekis taem blong hot bae oli mitim ol paoenia we bae oli krosem ol klia ples.
Plante long ol soldia long ami ia oli bin gohed blong maj. Samtaem oli bin digim sanbij blong faenem wota. Oli nogat inaf kakae. Evritaem oli nogat wud blong mekem ol faea, mekem se ol man oli mas bonem gras.
Ol soldia oli bin mitim ol indian mo ol nara pipol we oli gat kakae. Ol soldia oli nogat mane blong pem kakae, mekem se oli bin salem sam long ol klos blong olgeta long ol indian blong pem kakae.
I no longtaem afta, Momon Soldia Ami i bin kam long sam hil we oli go stret antap o i stip. Ol man oli mas taetem ol rop long ol wagun mo pulum olgeta i go antap long ol hil. Afta oli letem ol wagun i go daon long narasaed.
Wan dei sam wael buluk oli bin atakem ol soldia. Ol man ia oli faetem ol buluk ia mo ronemaot olgeta. Tri long ol soldia ia oli bin kasem kil.
Mo laswan, afta we oli bin maj moa long 2000 mael, Momon Soldia Ami i bin kasem Bigfala Solwota blong Pasifik long 29 Jenuware 1847. Ol man ia oli bin taet tumas, mo ol klos blong olgeta oli bin brokbrok. Oli bin glad from maj blong olgeta i kam long en.
Ol man ia oli bin wok long Kalifonia blong finisim yia blong seves blong olgeta insaed long ami. Afta oli bin letem olgeta blong go joenem ol famle blong olgeta bakegen. Olsem Brigham Young i bin promes, ol man blong Momon Soldia Ami oli no bin nid blong faet.
Sam long ol man ia oli bin stap long Kalifonia. Plante long olgeta oli bin go long Ol Roki Maonten blong go wetem ol famle blong olgeta mo Ol nara Sent we oli bin go tru longwe. (Luk long map long pej “00”(234) blong luk rod blong Momon Soldia Ami.)