Japta 52

Rilif Sosaeti

Maj 1842

Ol Sent oli bin bildim tempol long Nauvu. Ol klos blong ol man oli bin brokbrok, mo ol woman oli bin wantem blong helpem olgeta. Wan woman i bin talem se hem bae i somap ol klos blong ol man, be hem i nogat mane blong pem kaliko.

Sera Kimbol i bin talem se hem bae i givim sam kaliko long woman ia. Sista Kimball i bin askem ol nara woman blong oli help. Ol woman ia oli gat wan miting long haos blong Sista Kimball mo oli tekem tingting ia blong statem wan sosaeti blong ol woman insaed long Jos.

Ol woman ia oli askem Eliza R. Snow blong raetem sam rul blong sosaeti. Hem i bin tekem ol rul ia i go long Josef Smit. Hem i bin talem se ol rul ia oli gud, be hem i bin talem tu se Lod i bin gat wan gudfala plan blong ol woman.

Josef Smit i bin askem ol woman blong kam long wan miting. Hem i bin talem se ol prishud lida bae oli helpem ol woman wetem sosaeti blong olgeta. Oli bin jusum Emma Smit blong kam lida blong ol woman. Oli bin singaotem grup blong olgeta se Rilif Sosaeti.

Josef Smit i bin talem long ol woman blong helpem ol pipol we oli sik o oli nogat samting. Oli sud helpem eni kaen pipol we oli gat nid. Bisop bae i helpem ol woman, long wanem blong mekem.

Ol woman oli bin gat ol miting blong lanem ol samting we oli nid blong save. Oli bin glad tumas blong oli helpem ol memba blong Jos.

Ol woman oli bin mekem ol klos blong ol man we oli bildim tempol. Oli bin mekem tu sam samting blong yusum long tempol.

Ol woman oli bin tekem kakae i go long ol pipol we oli nidim. Oli bin lukaotem gud ol pipol we oli sik mo oli bin mekem plante nara samting blong helpem Ol Sent.

Evri woman long Jos oli blong Rilif Sosaeti. Oli bin helpem pipol. Oli bin lanem abaot gospel. Oli bin lanem abaot ol gudfala buk, miusik, mo filing blong mekem samting. Oli bin lanem olsem wanem blong mekem ol famle oli kam strong moa. (Ol tul blong japta ia: History of Relief Society, 1842–1966 [1967].)