“Japta 34: God I Bin Wonem Ol Pipol blong Saeon: Julae–Ogis 1833,” Ol Doktrin mo Kavenan Stori (2002), 128–31
“Japta 34,” Ol Doktrin mo Kavenan Stori, 128–31
Japta 34
God I Bin Wonem Ol Pipol blong Saeon
Julae–Ogis 1833
God i bin komandem moa long Ol Sent blong go long Jekson Kaonti, Misuri. Niu pipol i bin kasem longwe kolosap evri wik, mo oli bildim ol hom, ol stoa, mo wan stoa blong printim buk.
Ol Sent long Misuri oli bin gat pis mo hapines blong smol taem. Be, i no long taem ol problem oli kam antap. Sam long Ol Sent oli no stap obei mo oli no kaen. Sam long olgeta oli bin stap raorao wetem ol lida blong olgeta. Ol nara pipol we oli bin laef longwe oli stat blong wari from plante Sent tumas oli bin muv i go long eria ia. Ol pipol ia oli bin wantem Ol Sent blong aot long ples ia.
Wan grup blong ol rabis pipol we oli kros oli bin holem wan miting. Oli sendem sam man blong talem long ol lida blong Jos se bae Ol Sent oli mas kamaot long Jekson Kaonti. Be ol lida oli bin save se God i wantem olgeta blong bildim siti blong Saeon long Jekson Kaonti. Oli talem long ol man ia se Ol Sent bae oli no save go aot.
Ol man insaed long grup blong ol rabis man oli bin kros tumas. Oli bin brekem stoa blong printing mo spolem gud ples ia.
Nekiswan, ol rabis man oli karem Bisop Partridge mo Charles Allen mo putum kolta mo feta long skin blong tufala. Ol rabis man oli faetem sam long Ol nara Sent.
Tri dei afta, ol memba blong ol rabis man oli go tru long taon mo sutum ol bilding wetem masket blong olgeta. Oli minim blong singaot strong long Ol Sent mo oli talem se bae oli wipim eniwan we oli karem. Oli bin bonem ol kakae long garen mo spolem gud ol hom, ol fam, bilding, mo ol stoa.
Oliva Kowdri i wan long ol lida blong Jos long Misuri. Oli bin sendem hem i go long Ketlan blong luk Josef Smit.
Taem Oliva i bin go tru long Ketlan, hem i talem long Josef wanem we i bin hapen long Jekson Kaonti. Ol Sent longwe oli wantem blong save wanem nao bae oli mekem.
Josef i bin talem long Oliva abaot sam revelesen we hem i bin kasem. Lod i bin talemaot se bae Ol Sent oli sud bildim wan tempol long Saeon. Mane blong bildim tempol bae i kam long taeting blong ol pipol. Jisas i bin talem long Josef se Saeon bae i kam bigwan sapos Ol Sent oli stap obei. Be Ol Sent bae oli panis sapos oli no obei.
Jisas i bin talem se Ol Sent oli sud obei long ol loa blong kantri. Oli sud vot long ol pipol we oli stret mo gud blong oli kam ol lida blong kantri. Taem ol rabis pipol oli kam ol lida, ol pipol oli harem nogud.
Lod i bin komandem Ol Sent blong obei long evri toktok blong Hem. Hem i bin talem se bae oli no mas fraet long ol enemi blong olgeta. Be long hemia, Ol Sent oli sud fogivim ol enemi blong olgeta. Oli no sud faetem ol enemi blong olgeta, be nomo sapos God bae i komandem olgeta blong faet. Lod i bin talem se bae Hem i panisim ol rabis pipol.
Sam wik afta, Jisas i bin talem se Ol Sent long Saeon bae oli gat trabol blong smol taem, from se oli no bin obei long ol komanmen. Be, Jisas i bin promes se wan dei, Hem bae i helpem Ol Sent blong bildim Saeon.