“Japta 31: Tok blong Waes: Febware 1833,” Ol Doktrin mo Kavenan Stori (2002), 119–22
“Japta 31,” Ol Doktrin mo Kavenan Stori, 119–22
Japta 31
Tok blong Waes
Febware 1833
Josef Smit i bin statem wan skul blong ol man long Jos. Oli bin singaotem se Skul blong ol Profet.
Skul ia oli bin holem long wan rum insaed long stoa blong Newel Whitney long Ketlan, Ohaeo. Long skul ia, Josef mo ol lida blong Jos oli stap tijim olgeta wanwan abaot prishud, ol skripja, mo ol nara samting. Skul ia i blong helpem ol man blong priperem olgeta long saed blong lidasip insaed long Jos mo misinari seves.
Plante long ol man ia oli bin stap smokem ol paep o sikaret, we i mekem rum i fulap wetem smok. Sam long ol man ia oli kakae tobako mo spet long floa, i mekem se floa i doti tumas.
Emma Smit, waef blong Josef, i stap klinim rum afta long wanwan miting. Hem wetem Josef i kam blong wari abaot ol brata we oli yusum tobako. Josef i stap tingting sapos ol pipol oli sud smok o kakae tobako.
Josef i bin prea blong save wanem i stret. Jisas i bin givim long hem wan revelesen we oli singaotem Tok blong Waes. Jisas i bin talem se sam pipol oli bin wantem ol narawan blong mekem ol samting we oli no stret long ol bodi blong olgeta. Long Tok blong Waes, Jisas i bin talem long Ol Sent abaot ol samting we i nogud long ol bodi blong olgeta. Hem i bin talem long olgeta tu abaot ol samting we i gud long bodi blong olgeta.
Jisas i bin talem se alkohol i nogud long ol pipol. Oli no mas dring ol dring we alkohol i stap insaed long hem. Alkohol oli sud yusum nomo aotsaed long bodi.
Jisas i bin talem se tobako i nogud long ol pipol. Oli no sud smok sikaret, ol sika, o ol paep. Oli no sud kakae tobako.
Jisas i bin talem se Ol Sent oli no mas dring ol hot dring olsem ol ti mo kofi. Ol dring ia oli no gud long bodi.
Jisas i bin talem se plante plan mo ol animol oli gud blong ol pipol i kakae. Ol pipol oli sud talem tangkyu long Papa long Heven from ol gudfala kakae.
Jisas i bin talem se ol pipol oli no mas kakae tumas mit.
Lod i bin talem se ol sid oli gud long bodi. Sam long ol sid ia oli ol wit, raes, kon, mo ol ot. Frut mo ol vejetebol, olgeta tu oli gud blong bodi.
Jisas i bin promesem ol bigfala blesing long olgeta we oli obei long Tok blong Waes. Ol bodi blong olgeta bae oli strong mo helti bitim sapos oli no obei. Ol maen blong olgeta bae oli helti tu, mo bae oli kasem waes mo save we i stap.