“Japta 15: Wan Misin i go long Ol Lemanaet: Septemba 1830,” Ol Doktrin mo Kavenan Stori (2002), 58–60
“Japta 15,” Ol Doktrin mo Kavenan Stori, 58–60
Japta 15
Wan Misin i go long Ol Lemanaet
Septemba 1830
Jisas i bin wantem blong moa pipol oli harem abaot gospel blong Hem. Hem i wantem sam long Ol Sent blong go long ol misin. Hem i bin kolem Oliva Kowdri blong go long wan misin long ol Indian blong Amerika. Ol Indian ia, oli singaotem olgeta tu Ol Lemanaet from se sam long olgeta oli bin kamaot long laen blong Ol Lemanaet insaed long Buk blong Momon.
Jisas i bin wantem Ol Lemanaet blong ridim Buk blong Momon. Hem i bin promesem plante profet se Ol Lemanaet bae oli gat Buk blong Momon. Naoia i taem blong kipim promes ia.
Buk blong Momon i stap talem long Ol Lemanaet abaot ol bubu blong olgeta we oli bin laef plante handred yia bifo. Buk i bin talem long olgeta abaot ol impoten promes we Jisas i bin mekem wetem olgeta. Buk i bin helpem olgeta blong bilif long Jisas. Buk i bin tijim olgeta blong sakem sin mo baptaes.
Ol nara man oli bin wantem blong go wetem Oliva Kowdri blong prijim gospel long Ol Lemanaet. Lod i bin talem se tri (3) long ol man ia bae oli go.
Faswan, ol misinari oli bin go long sam traeb long Niu Yok. Ol misinari oli bin givim Buk blong Momon long ol pipol, be sam nomo oli save rid.
Afta ol misinari oli bin go prij long sam long Ol Lemanaet long Ohaeo. Ol pipol ia oli bin hapi blong harem abaot Buk blong Momon mo lanem abaot bubu blong olgeta bifo.
Ol misinari oli bin aot long Ohaeo mo oli bin go long wan taon we nem blong hem Indipenden hemia long Jekson Kaonti, Misuri.
I gat plante Lemanaet long Misuri. Ol misinari oli bin pijim gospel long olgeta mo oli bin givim Buk blong Momon long olgeta. Oli bin hapi tumas mo oli bin talem tangkyu long ol misinari from buk ia.
Ol nara pipol long Misuri oli no bin biliv long gospel we i bin kambak o Buk blong Momon. Oli bin talem long ol misinari blong oli no go kolosap long Ol Indian.
Ol pipol oli bin talem se ol soldia bae oli ronemaot ol misinari sapos oli no wantem go. Oli bin harem nogud, ol misinari oli bin go blong tijim ol nara pipol long Misuri.
Wan long ol misinari ia nem blong hem Parley P. Pratt. Hem i bin go long Ohaeo blong talem long Josef Smit wanem we oli bin mekem. Parley i bin talem se misin blong olgeta i gud tumas mo oli bin tijim gospel long plante pipol.