“Japta 49: Ol Misinari long Ol Nara Ples: Jun 1837–Oktoba 1841,” Ol Doktrin mo Kavenan Stori (2002), 180–82
“Japta 49,” Ol Doktrin mo Kavenan Stori, 180–82
Japta 49
Ol Misinari long Ol Nara Ples
Jun 1837–Oktoba 1841
Lod i bin wantem ol pipol long ol nara ples oli lanem abaot gospel. Long 1837, taem plante long Ol Sent oli bin stap long Ketlan, Lod i bin talem long Josef Smit se bae Elda Heber C. Kimball bae hem i go long wan misin long Inglan. Elda Kimball i wan long Olgeta Twelef Aposol, mo hem wetem sikis nara misinari oli bin sel i go long Inglan long wan sip.
Ol misinari oli bin mit wetem wan lida blong wan nara jos we hem i bin letem olgeta oli prij long jos blong hem. Plante long ol pipol oli bin biliv long ol misinari mo oli bin wantem blong baptaes. Lida ia i bin kros mo talem long ol misinari blong oli no mas prij long jos blong hem bakegen.
Ol misinari oli bin prij long ol hom blong ol pipol. Plante long ol pipol oli bin joenem Jos.
Long 1839, afta we Ol Sent oli bin bildim Nauvu, Ol Twelef Aposol oli bin kolem olgeta blong go long Inglan blong gohed blong prijim gospel longwe. Bifo oli go, Josef Smit i bin mit wetem olgeta mo talem long olgeta wanem oli sud tijim.
Josef i bin talem long ol misinari blong obei long ol komanmen blong God. Hem i bin talem long olgeta abaot prishud. Hem i talem se Jos blong Jisas Kraes nomo i gat prishud.
Ol man ia oli rere blong go long misin blong olgeta. Hem i had tumas blong go from oli nogat inaf mane, plante long olgeta oli sik, mo sam long ol waef blong olgeta mo ol pikinini oli sik. Be ol man ia oli gat fet se Papa long Heven bae Hem i helpem olgeta mo bae i blesem ol famle blong olgeta.
Ol misinari ia oli bin go long Inglan mo oli bin prij long plante taon. Plante taosen pipol oli bin biliv long gospel mo oli bin joenem Jos. Plante long olgeta we oli bin baptaes oli bin kam long Amerika mo oli bin stanap strong long Jos.
Oson Hyde i wan long Ol Aposol. Josef Smit i talem se Orson i gat spesel wok blong mekem long ol pipol blong Jiu. Afta sam manis long Yurop, Elda Hyde i bin go long Holi Lan, ples we Jisas i bin laef long hem taem Hem i bin stap long wol. Long 24 Oktoba 1841, Elda Hyde i bin talem wan prea blong dediketem Holi Lan.
Long prea blong hem, Elda Hyde i bin askem God blong blesem lan ia blong ol man Jiu bae oli kam tugeta bakegen. Hem i talem se God i bin givim lan ia long Ebraham mo ol pikinini blong hem, we ol pikinini ia oli bin go wanwan, mo bae oli luk fored blong fulfilim promes blong God. Elda Hyde i bin blesem lan ia tu blong bae i gat wota, blong kakae i save gro.
Long yia ia taem Elda Hyde i bin mekem prea, plante pipol blong Jiu mo ol pikinini blong Ebraham oli bin kam tugeta long Holi Lan. Long 1979, Presiden Spenser W. Kimball i bin talem wan prea blong dediketem wan garen longwe. Oli singaotem Orson Hyde Memorial Garen.