“Japta 26: Ol Trifala Kingdom blong Heven: 16 Febware 1832,” Ol Doktrin mo Kavenan Stori (2002), 97–103
“Japta 26,” Ol Doktrin mo Kavenan Stori, 97–103
Japta 26
Ol Trifala Kingdom blong Heven
16 Febware 1832
Wan dei Josef Smit mo Sidney Rigdon i stap ridim Niu Testeman. Niu Testeman i bin talem se ol gudfala pipol bae oli go long heven afta we bae oli laef bakegen long ded. Josef i bin stap askem hemwan sapos evri pipol i go long sem ples long heven.
Doctrine and Covenants 76, seksen heding
Taem Josef mo Sidney i stap tingting abaot hemia, Papa long Heven i bin givim long tufala wan gudfala visen. Long visen ia tufala i bin luk heven. Tufala i bin luk Papa long Heven mo Jisas wetem laet i raonem Tufala. Afta tufala i bin luk ol enjel oli bin stap wosipim Papa long Heven mo Jisas.
Doctrine and Covenants 76, seksen heding
Taem Josef mo Sidney i bin raetem abaot visen ia, Tufala i bin testefae se Jisas i laef. Tufala i bin luk Hem! Mo tufala i bin harem wan voes i talem se Hem i Pikinini blong God. Voes ia i bin talem tu long tufala se Jisas i bin kam long wol blong mekem i posibol blong evri pipol blong gobak blong laef bakegen wetem Papa long Heven.
Long nekis pat blong visen, Josef mo Sidney tufala i bin luk ples we ol pipol bae oli go long hem taem oli laef bakegen long ded. I gat tri ples o kingdom, blong ol pipol blong oli go long heven. Ol Sent we oli stret mo gud bae oli go long selestial kingdom blong heven afta we bae oli laef bakegen long ded. Selestial kingdom i ples we Papa long Heven mo Jisas i stap long hem.
Olgeta we oli stap long selestial kingdom oli bin bilif long Jisas Kraes taem oli stap long wol ia. Oli bin baptaes mo kasem Tabu Spirit.
Olgeta long selestial kingdom oli bin gat plante hadtaem taem oli stap long wol ia, be oli bin go tru long olgeta hadtaem ia tru long fet blong olgeta long Jisas Kraes. Oli bin traehad blong obei long ol komanmen blong God, mo oli bin sakem sin taem oli no bin obei.
Ol Sent we oli stret mo gud bae oli kam olsem Papa long Heven mo Jisas. Evri samting bae i blong olgeta. Bae oli laef wetem Papa long Heven mo Jisas blong oltaem.
Nekiswan Josef mo Sidney i bin luk terestrial kingdom blong heven.
Ol pipol long terestrial kingdom oli ol gud pipol long wol, be ol pipol we oli nogud oli bin giaman long olgeta. Oli bin obei sam long ol komanmen be oli no strong long testemoni blong olgeta abaot Jisas.
Terestrial kingdom i tekem tu ol pipol we oli no biliv long gospel taem oli bin harem long wol ia mo afta oli bin bilif taem oli harem afta oli ded.
Ol pipol long terestrial kingdom bae oli luk Jisas. Be bae oli no laef wetem Papa long Heven mo Jisas.
Nekiswan Josef mo Sidney i bin luk telestial kingdom blong heven. Ol pipol we oli go long telestial kingdom oli no stret mo gud long wol.
Ol pipol ia oli no bilif long Jisas o gospel blong Hem. Oli no bilif long ol profet mo oli no bin obei long ol komanmen blong God.
Ol pipol long telestial kingdom bae oli no save luk Jisas o Papa long Heven mo bae oli no save laef wetem Tufala. Be, ol enjel bae oli visitim ol pipol ia, mo bae Tabu Spirit bae i tijim olgeta.
Ol pipol we bae oli go long ol kingdom blong selestial mo terestrial bae oli laef bakegen long ded taem Jisas bae i kambak bakegen long wol. Ol pipol we bae oli go long telestial kingdom bae oli no laef bakegen long ded kasem 1000 yia afta we Jisas i kambak bakegen.
Long visen ia, Josef mo Sidney i bin luk ples we ol pipol we oli rabis tumas bae oli go long hem. Bae oli stap wetem Setan. Bae oli no save stap wetem Papa long Heven, Jisas, o Tabu Spirit.
Ol pipol we bae oli stap wetem Setan oli bin lanem abaot Jisas mo gospel blong Hem taem oli stap long wol. Tabu Spirit i bin testefae long olgeta abaot Jisas Kraes. Oli bin save se Hem i bin laef mo Hem i bin ded from yumi.
Be afta ol pipol ia oli bin mekem ol samting we i nogud tumas. Oli bin tanem baksaed long trutok mo mekem paoa blong God i doti. Oli bin tanem baksaed long Tabu Spirit. Oli bin talem se oli no biliv bakegen long Jisas. Ol pipol ia bae oli safa blong oltaem.
Josef mo Sidney i bin luk ol nara samting long visen blong tufala, be Jisas i bin talem long tufala blong tufala i no mas raetem daon evri samting we tufala i bin luk. Tru long paoa blong Tabu Spirit, Ol Sent we oli stret mo gud bae oli luk mo save ol samting ia olgetawan. Josef mo Sidney tufala i bin talem tangkyu long God from naesfala visen ia.