“Japta 59: Ol Endaomen Oli Bin Tekem Ples insaed long Nauvu Tempol: Novemba 1845–Febware 1846,” Ol Doktrin mo Kavenan Stori (2002), 209–10
“Japta 59,” Ol Doktrin mo Kavenan Stori, 209–10
Japta 59
Ol Endaomen Oli Bin Tekem Ples insaed long Nauvu Tempol
Novemba 1845–Febware 1846
Afta long ded blong Josef Smit, Ol Sent oli bin gohed blong wokem Nauvu Tempol. Lod i bin talem long olgeta blong bildim tempol, mo oli bin wantem blong obei long Hem. Ol Sent oli bin wok had taem oli bin stap long trabol mo oli bin save se i no longtaem bae oli aot long Nauvu.
Taem wanwan pat blong tempol oli finis, Ol Sent oli bin dediketem mo oli bin stat blong yusum pat ia we i bin finis. Baptaes blong ol ded i bin tekem ples long tempol stat long 1841, taem ol rum insaed oli bin finis. Long Novemba 1845, sam long ol rum long namba tu (2) floa oli finis mo oli bin dediketem blong Ol Sent oli kasem tabu odinens blong endaomem (luk tu long japta 50).
Ol Sent oli bin glad tumas blong kasem ol tempol odinens blong olgeta, i mekem se oli bin yusum tempol long dei mo naet. Long ol las wik bifo Ol Sent oli aot long Nauvu, Brigham Young mo ol narawan oli bin givim taem blong olgeta blong helpem Ol Sent blong oli kasem ol odinens blong olgeta. Long taem ia we Ol Sent oli bin aot, kolosap 6000 long olgeta oli bin kasem ol endaomen blong olgeta long Nauvu Tempol. Ol odinens oli bin wan bigfala blesing long olgeta taem oli bin fetful kasem en tru long ol hadtaem we oli bin kasem long ol yia we i bin kam afta.