“Japta 9: Oganaesesen blong Jos blong Jisas Kraes: 6 Epril 1830,” Ol Doktrin mo Kavenan Stori (2002), 40–42
“Japta 9,” Ol Doktrin mo Kavenan Stori, 40–42
Japta 9
Oganaesesen blong Jos blong Jisas Kraes
6 Epril 1830
Josef Smit i bin laef long taon ia Feyet long stet blong Niu Yok. Jisas i bin talem long Josef se i taem blong tru Jos blong Hem blong i stap bakegen long wol. Hem i bin talem long Josef blong oganaesem Jos ia.
Long 6 Epril 1830, Josef i bin holem wan miting blong oganaesem Jos. Oliva Kowdri, Haeram Smit, Samuel Smit, Deved Witma, mo Pita Witma oli bin kam blong helpem hem. Olgeta evriwan oli bin baptaes. Ol nara pipol tu oli bin kam long miting.
l man ia oli bin prea long Papa long Heven. Josef i bin odenem Oliva i kam olsem wan elda insaed long Jos. Afta Oliva i bin odenem Josef.
Josef mo Oliva i bin blesem sakramen. Tufala i bin givim long ol memba.
Josef mo Oliva i bin putum ol han blong tufala long hed blong wanwan blong konfemem hem blong kam wan memba blong Jos blong Jisas Kraes mo givim presen we i Tabu Spirit long hem.
Josef mo Oliva i bin odenem sam long ol nara man ia blong gat prishud. Ol man ia oli bin glad tumas. Oli bin talem se oli lavem God mo oli stap talem olsem wanem Hem i bin blesem olgeta.
Jisas i bin givim wan revelesen long Josef Smit long miting. Jisas i bin talem se Josef hem i wan profet. Wan tru profet i toktok long bihaf blong Jisas. Taem wan profet i toktok long bihaf blong Jisas, ol memba blong Jos oli sud lisin long hem.
Afta long miting, plante pipol oli bin baptaes wetem mama mo papa blong Josef Smit. Hem i bin wan gudfala dei! Jos blong Jisas Kraes i bin stap bakegen long wol.